Nawku Hpung Shiga ( Church News ) 22 June 2020

Wa Sarabyin kawn,  Hkawnsek Maria kaw akyu hpyi htinglu htinglai ai Litany akyu hpyi ga ni hta akyu hpyi ga (3) bai jat bang da ai shiga.

 “Matsan dum chye ai Nu Maria e”, Latin hku nna, “Mater misericordiae”, English hku,“Mother of mercy”, “Myit mada shara Nu Maria e”, bai, Latin hku nna, “Mater spei”, English hku,“Mohter of hope”, “Htawt sit hkawm ra ai ni hpe shalan shabran ya ai Kanu Nu Maria e”, Latin hku nna, “Solacium migrantium”, English hku nna, “Solace of migrants”, ngu ai akyu hpyi ga masum hpe Loreto Litany hta jat bang dat sai. Wa Sarabyin Francis gaw ndai akyu hpyi ga myu masum hpe Loreto Litany kaw jat bang da sai lam June Shata 20, bat 6 ya, mara n kap ai hkawnset maria poi nhtoi hta hpung masha yawng hpe ndau dat sai rai nga  ai. Mungkan shara shagu na Hkristan hpung masha ni Hkawnset Maria hpe Yesu hte hkrum lu na jaw ang dik ai lam rai nna ahkaw ahkang kaba nan re ngu kam nga ma ai lam hpe, Mungdan shagu na Saradaw Conferece ningbaw ni hpe shagun laika hta Cardinal Robert Sarah hte Saradaw kaba Arthur Roche yan tsun da ma ai. “Gara de mung n jau jau rai nga ai majaw hkrit tsang taw nga ra ai daini aten ni hta Karai Kasang a myusha ni Nu Maria hpe ‘tsaw ra myit kaba hte kam hpa myit kaba hte hkung ga lara di akyu hpyi htinglu htinglai lam galaw nga ma ai” nga nna mung matut tsun da ma ai. Ndai masa lam hpe mu chye ya nga ai Wa Sarabyin Francis gaw “Matsan dum chye ai Nu Maria e”, “Mater misericordiae”(latin), “Mother of mercy” (english). “Myit mada shara Nu Maria e”, “Mater spei” (latin), “Mohter of hope” (english).“Htawt sit hkawm ra ai ni hpe shalan shabran ya ai Kanu Nu Maria e”, “Solacium migrantium” (latin), “Solace of migrants”, (english), ngu ai akyu hpyi ga masum hpe Loreto Litany hta jat bang dat ai re lam mung sang lang da ma ai. Jat bang na shara ni hpe mung matsun da nga ai. Mother of mercy ngu ai “Matsan dum chye ai Nu Maria e” akyu hpi ga hpe Mother of Church ngu ai Nawku hpung a Kanu Nu Maria e” ngu ai akyu hpyi ga na hpang kaw bang na. Mother of hope ngu ai “Myit mada shara Nu Maria e” ngu ai akyu hpyi ga hpe gaw Mother of Divine Grace ngu ai “Karai chyeju hpying ai Nu Maria e” ngu ai akyu hpyi ga a hpang kaw bang na. Solace of migrants ngu ai “Htawt sit hkawm ra ai ni hpe shalan shabran ya ai Kanu Nu Maria e” akyu hpyi ga hpe gaw Refuge of sinners ngu ai Mara lu ai ni hpe makawp maga ai wa” ngu ai akyu hpyi ga hpang kaw bang na matu matsun da ma ai.

Saradaw kaba Roche hte Vatican shiga dap kawn san htai ai shaloi, “Ndai akyu hpyi ga ni gaw ya anhte ni nga pra ai prat hte grau nan htuk manu ai akyu hpyi ga ni re,” ngu tsun da nga ai.  Mungkan masha ni, ya ten hta chyam bra nga ai Covid -19 tsin-yam hkrum sha ra ai majaw sha n ga, matsan jam jau lam, nhkrum nra ai lam, hte kaga mayak mahkak lam ni law law a tsin-yam hkrum hkra machyi taw nga ma ai majaw mung Nu Maria hpe kam hpa nga ma ai.

Jat bang ai ndai akyu hpyi ga ni gaw hpung masha ni n hkau chyap da yu ai laklai nnan sing mung n rai nga ai. Kaga akyu hpyi ga ni hte  nawku mahkawn ni hta lawm nga sai re. Ga shadawn “Salve hkawhkam jan akyu hpyi ga hta “Hail Holy Queen, Mother of mercy, Hail our hope….,” ngu ai anhte a myit mada shara, matsan dum ai Nu Maria, Lamu hkawhkam jan hpe shakawn mu….,” ngu ai akyu hpyi ga hta mu lu nga ai. Dai majaw ndai akyu hpyi ga ni hpe mungkan shara shagu nga ai nawku hpung masha ni ra sharawng nga ma ai re; mungkan masha ni ra kadawn nga ai hpe jahkrum shatsup ya ai a marang e, anhte a kam hpa shara Kanu Nu Maria mung akyu hpyi htinglu htinglai ya na re ngu mung tsun da ai.

Loreto Litany ngu ai gaw hpa rai ta?

Loreto Litany gaw Italy Mungdan, Loreto, na Maria lungpu mying hpe lakap nna la ai gahtap gahtap nna hpyi ai akyu hpyi ga ni rai nga ai. Dai akyu hpyi ga hpe 1531 kaw na jai lang wa sai rai nna, 1587 hta Wa Sarabyin Sixtu V kawn Nawku hpung hta tara shang jai lang akyu hpyi na matu ndau da lai wa ai. Dai ten hta, Loreto Litany akyu hpyi ga gaw Maria hte seng ai Litany akyu hpyi ga ni hta na langai sha re ai masat shagrin da ai litany akyu hpyi ga re lam chye lu ai. Raitim, Maria hte seng nna kaga Litany akyu hpyi ga ni hpe tinghkrai mungdan, shing nrai, wuhpung wuhpawng ni hta, dam lada ai hku jai lam akyu hpyi nga ma ai.

Loreto Litany hta hpang daw de Sarabyin ni kawn bai jat bang ai akyu hpyi ga nlaw htum 7 nga ai lam chye lu ai. 1980 hta, “Mother of the church” ngu ai “Nawku hpung a Kanu Nu Maria e” akyu hpyi ga hte  1995 hta, “Queen of families” ngu ai “Kun ding hku nta masha ni a Hkawhkam Jan” akyu hpyi ga hpe Wa Sarabyin Yawhan II kawn jat ba da lai wa sai lam chye lu ai.

Loreto Litany zawn kaga Litany akyu hpyi ga ni rai nga ai “San pra ai ni kaw akyu hpyi ai” litany  akyu hpyi ga ni, “Yesu a Mying ningsang hpe nawku hkungga ai” litany  akyu hpyi ga, “Yesu a Salum Ningsang hpe nawku hkungga ai” litany  akyu hpyi ga, “San Yawsep hpe hkungga shakawn ai” litany akyu hpyi ga (1909), “Yesu a Hkum hte Sai hpe nawku hkungga ai” litany  akyu hpyi ga, hte, “Karai Kasang a Matsan dum lama ai hpe Nawku hkungga ai” litany  akyu hpyi ga ni mung nga ai.

Loreto Litany akyu hpyi ga hta jat bang ai akyu hpyi ga lawm ai Litany akyu hpyi ga laika hpe RVA Jinghpaw website, facebook, Wechat, Instegram, Twitter ni hta shang yu nna copy galaw la ga, ngu, shana ya let, Vatican shiga dap kaw nna, shana dat ai hpe, RVA Jinghpaw nseng shapoi dap kawn htawn shana ya dat ga ai.

Ka Lajang ai  - Fr. Patrick Gaw Maw Hkawng Yae

                         Coordinator Of RVA Kachin

                         Myitkyina.