Nawku Hpung Shiga ( Church News ) 13 May 2020

Title

Wa Sarabyin a Misa Hkungga: Bungli kata re ai ni a matu lak san ap nawng

Summary

Chyam bra nga ai Covid – 19 ana zingli a majaw bungli shamat kau ai ni a matu misa nawng jau ya let Karai Kasang anhte ni a ntsa Chyoi Pra ai Wenyi hpe shangun dat ai gaw anhte a prat hkrun lam tup hta hkam jan lu hkra arau nga nga na matu re lam hpe sumru woi da ai.

Caption                 

Wa Sarabyin Francis gaw May 11, bat 1 ya jahpawt, Casa Santa Marta nawku htingnu hta nawng jau ai misa hkungga hta Chyam bra nga ai Covid – 19 ana zingli a majaw bungli shamat kau ai ni a matu misa nawng jau ya let Karai Kasang anhte ni a ntsa Chyoi Pra ai Wenyi hpe shangun dat ai gaw anhte a prat hkrun lam tup hta hkam jan lu na matu arau nga nga na re lam hpe sumru woi da ai.

“Daini na nhtoi ni hta masha law law shanhte a bungli ni hpe galaw nlu mat masai. Bungli tam nlu ma ai hta n ga, bungli galaw ku (saboi) ntsa kaw pyi galaw nlu nga ma ai” nga nna Wa Sarabyin tsun da nga ai.

Matut nna mung “Bungli nnga ai, yawm wa ai a majaw yak hkak jamjau taw nga ai anhte a hpunau, nauna ni a matu akyu hpyi ya nga ga ai” nga nna akyu hpyi ya nga ai lam tsun da nga ai.

Shi a Mungga hpe dai shani hti ang ai Yawhan laika 14:21-26 kaw na lakap nna hkaw tsun da nga ai. Yesu hte kasa ni a hpang jahtum daw sha poi hpe aten la nna galaw ma ai rai nna, Madu Yesu shi a kasa ni hpe galoi mung kau da na nre lam bai tsun shagrin nga ai lam hpe madi madun da nga ai.

“Yesu gaw, Ngai e tsaw ra ai wa rai yang gaw, nye a sharin shaga ai ga hpe madat mara hkan sa shatup na ra ai. Nye Wa mung dai wa hpe tsaw ra na wu ai rai nna an lahkawng gaw dai wa kaw sa nna, shi hte rau shanu nga na ga ai. Ngai hpe n tsaw ra ai wa gaw nye a sharin shaga ai ga hpe n hkan shatup lu ai; nanhte na la lu ai mungga gaw, nye a ga n rai li ai, ngai hpe shangun dat ai nye Wa a mungga rai nga lu ai. Ngai nanhte hte rau naw nga nga yang, ga ndai ngai nahte hpe tsun dan ma sade ai. Nye a mying nsang hte nye a Wa shagnun dat na ra ai Karum ai Wa ngu ai Chyi Pra ai Wenyi gaw, nanhte hpe lam magup sharin ya nna, ngai nanhte hpe tsun da ai ga yawng mayawng nanhte hpe shadum shahprang na ra ai.” (Yawhan 14:23-26)

Ga ndai gaw Chyoi Pra ai Wenyi shangun dat na matu Kawa Karai Kasang hte Kasha Karai Kasang anhte hte rau nga let garum ya na matu jaw da ai ga sadi rai nga ai nga nna Wa Sarabyin sanglang da nga ai.

Chyoi Pra ai wenyi gaw anhte hpe tinghkrai galoi nkau da ai.

Chyoi Pra ai Wenyi hpe “Paraclete shing nrai the Advocate” ngu mung shaga shamying ai. Hpa majaw nga yang Shi anhte hpe n gun ban ya nga ai; Shi anhte hte arau nga nga nna garum ya nga ai majaw anhte ni n-hkrat sum mat ai,” ngu Wa Sarabyin tsun ai. Bai shi tsun ai “ndai zawn madi shadaw garum ya na matu anhte hpe chyeju jaw nga ai Karai Kasang a ga sadi rai nga ai” re da.

Chyoi Pra ai Wenyi anhte hta n hpa ni galaw nga a ta?

Chyoi Pra ai Wenyi gaw anhte hpe Makam masham mung sung lam ni hpe shang yu chye na wa na matu sharing ya nga ai. Madu Yesu a sharing shaga ai tara mungga ni hpe chye na hkap la na matu sharing ya ai. Anhte ni shut shai ai lam n nga ai sha makam masham hta kung hpan galu kaba wa na matu lam woi ya ai,” nga nna Wa Sarabyin sang lang da nga ai. “Madu Yesu a sharing shaga ai lam ni hpe chye na hkap la ai hta kung hpan galu kaba wa ding yang rai nna, galoi mung jaw ai lam de sha woi hkawm nga ai re. Dai majaw Chyoi Pra ai Wenyi gaw anhte ni mung sung ga sung ni hpe grau grau chye na wa na matu garum shing tau ya nga ai re,” nga nna Wa Sarabyin matu sang lang da nga ai.

Chyoi Pra ai Wenyi gaw anhte ni kung hpan wa na matu, ginhka chye wa na matu, dum hprang nga na matu sharing shaga ya nga ai re. Anhte mung sung ga sung ni hpe chye na ai lam hta hpun ni tu kaba wa ai zawn rai nga ai: Shanhte gaw maren sha rai nga tim kaba grau wa ai, galu grau wa ai hte apu asi shapraw ya ai. Raitim shanhte gaw dai hpun gaw dai hpun sha rai nga ai.

Nawku hpung a sharing shaga ai lam gaw zin sha nga taw ai nre; sharing shaga lam galang galaw da ai hte n’shazim da ai; naw jat bang ai lam ni nga ai; raitim mi na nga taw ai hpe n shamat kau ai sha, dai hpe ru jung nna sha jat bang nga ai re. Wenyi gaw dai nga taw sai sharing shaga lam ni hpe makawp maga ya ai hte Yesu a sharing shaga ai lam ni hpe  chye na hkawn hkrang rawt jat wa na matu makawp maga bau sin ya nga ai.

Wenyi gaw Madu Yesu tsun da sai lam ni hpe bai myit dum lu na matu shadum shahprang ya ai. Wenyi gaw dum hprang ai wa zawn rai nga ai; Shi anhte hpe jasu sharawt ya nga ai; Karai Kasang hte seng ai lam ni hpe Shi anhte kaw shadum shana ya ai; Anhte ni Karai Kasang hte hkrum ten hta rai tim, tsang gang hkra nga taw tim Shi anhte a prat hpe dum hprang shangun nga ai.

Matu nna Wa Sarabyin tsun ai gaw “Wenyi gaw hkye hkrang la ai hte seng ai dum hprang lam ni hpe anhte kaw gun sa ya ai; Dai dum hprang ai lam gaw prat a hkrun lam hte seng ai dum hprang lam rai nga ai; Kaja ai hte n kaja ai hpe garan ginhka chye na matu Shi anhte hpe lam matsun ya nga ai.” nga rai nga ai.

Chyoi Pra ai Wenyi gaw Karai Kasang a Kumhpa re.

“Wenyi gaw anhte ni a prat hkrun lam labau matsing nyan atsam hpe lam woi ya nga ai,” nga nna Wa Sarabyin tsun da ai.

“Wenyi gaw shani shagu anhte ni a daw dan kaji kaba lam ni hta garum ya nga ai. Yawng mayawng sharing ya nga ai re,” nga nna mung tsun da nga ai.

Hpang jahtum hta Wenyi gaw Karai Kasang a Kumhpa re ngu tsun let Yawhan laika hta na “Ngai nanhte hpe kau da na nrai; nanhte hpe lam magup sharin ya nna, nanhte hpe galoi mung nkau da na Wenyi hpe nanhte kaw shangun dat na nngai” ngu ai mungga hte ginchyum dat da nga ai.

Ka Lajang ai  - Fr. Patrick Gaw Maw Hkawng Yae

                         Coordinator Of RVA Kachin

                         Myitkyina.