Nawku Hpung Shiga ( 26 August 2021 )

Wa Sarabyin: Nawku Daw Jau Hkrang Masa Gaw Hkristan Makam Hta Wa Daju Ra Ai

Italian Liturgical Conference zuphpang hta shang lawm ai ni hpang de Wa Sarabyin Francis, message sa, hkrum shaga, n-gun jaw da ai hpe Vatican Shiga Dap kaw nna August 23, bat 1 ya shani ndau da ya ma ai.

(71) lang na National Liturgical Week hta Italy Jau wuhpung wuhpawng kaw lawm ai ni hte Nawku hpung masha ni Cremona mare kaba a dingdung maga hta rau hpawng de zuphpawng ai lamang hpe galaw ai mali ya tup re ai lam chye lu ai.

Lai sai shaning hta chyam bra ana Covid-19 tsin-yam a majaw atsawm n lu hpawng la lu ai hte seng nna myit n pyaw myit n dik ai lam mung Wa Sarabyin Francis tsun da nga ai.

Daining na zuphpawng ga baw ginlam, “theme” hpe “Where two or three are gathered in my name” ngu Madu Yesu ga sadi tawn da ai hpe jai lang na matu mung Wa Sarabyin Francis tang shawn da nga ai. “Marai lahkawng masum nye a mying hpe gang nna zuphpawng nga ma yang gaw, dai yang e shanhte a ka-ang e ngai mung lawm nga nngai” (Mt 18:20) ngu Yesu Madu ga sadi tawn da ai ga yan hpe tang shawn ai rai nga ai.  Cummunity, liturgies, and territories ngu ai hpe mung matut bang da nga ai. Dai gaw wuhpung wuphawng hta, nawku daw jau lamang ni hta, lamu ga jarit n bung hkat ai buga ginra ni hta dai Madu Yesu a ga sadi gaw yawng hte seng ai hpe lachyum shalen ai rai nga ai.

Chyam bra ana tsin-yam a majaw Misa Hkungga ni hpe shawoi na hte maren hpung masha ni hte wanglu wangla n lu ga law ai majaw mung, myit n pyaw ai ngu matut tsun da nga ai.

Raitim, Karai Kasang hpe tsaw ra ai, sagu rem magam hpe masa lam hta hkan nna ladat shaw gun hpai ai, Hpung masha ni hkum nan mung myit hkrum ginlum kahkying gumding nga ai, makam masham lam hta shakut shaja ai, nau na myit jasat ni hte shada garum shingtau hkat ai lam ni nga nga ai majaw myit dik myit pyaw lam lu ai hte Misa Hkungga nawng jau ai hpe bai hkam la lu na hpe myit mada ai, ngu mung n-gun jaw, n-gun awai la ga hte mung n-gun jaw da nga ai.

Misa Hkungga gaw makam masham a daju re, Laban Misa Hkungga hte nawku daw jau ai hta hpawng de ai lam hpe ningnan re ai mahkrun lam hte Jau Ginwang ni hta ladat shaw galaw sa wa lu na hpe mung myit mada ai lam Italy Jau wuhpung wuhpawng ni hte hpung masha ni hkrum zup bawngban ai nawku daw jau lamang hkrang masa hte seng ai zuphpawng kaw sa du hpawng lawm masha ni hpe Wa Sarabyin Francis n-gun jaw mungga tsun da ai. Vatican Shiga Dap kaw nna ndau da ma ai hpe RVA Jinghpaw Nsen Shapoi Dap kaw nna shalai ndau dat ya ga ai.

By Fr. Patrick Gawmaw Hkawng Yae

#vaticannews

#rvakachinservice