Nanghpam Hpe Galaw Shapraw Ai, Dut Ai Lam Hpe Pat Shingdang Na Gaw Anhte Hta Lit Nga Ai

Pope Francis

 Wa Sarabyin Francis kawn Mungkan ting na “Nanghpam” hpe tara nshang galaw ai hte n jaw ai hku jai lang ai hpe pat shingdang ai nhtoi hku masat da ai shani hta ndai zawn re ai “Nanghpam” hpe galaw shapraw ai, dut lu dut sha ai hpe jahkring na lam hte makawp maga na gaw anhte yawng a lit rai nga ai hpe tsun lai wa ai.Nanghpam malu masha a majaw  ya byin mat sai ni hte shanhte a nta masha ni yawn hpa mabyin ni du pru wa na hpe mu chye lu ai majaw ndai gaw anhte yawng a matu manghkang hpe byin shangun ai majaw dai hpe e ninghkap na matu anhte shinggyim masha shagu a lit mung rai nga ai hpe tsun lai wa ai.

Lai wa sai Bat  Masum ya shani shawa masha ni hte hkrum lai wa ai hta daini gaw Mungkan ting na Nanghpam hte seng ai lam hpe masa lam n re ai hku jai lang nga ai hte dut lu dut sha nga ai ni hpe ning hkap ai nhtoi rai nga ai, ndai nhtoi hpe lai wa sai 1987 ning hta United Nation General Assembly kawn woi awn galaw hpang sa wa ai lam re hpe mung tsun lai wa ai.“Dai ni na Ga Baw   gaw sak se sak gan ni asan rai nna makawp maga ai hta shakut shaja ga” Wa Sarabyin kawn Nanghpam lu sha ai gaw anhte shinggyim wuhpawng a nsam hpe shagrit kau shangun nga ai lam tsun let Nanghpam lu sha ai masha shagu mung Karai Kasang a sari sadang hpring ai kashu kasha ni rai (dignity of child of God) nga ai, ndai zawn “nanghpam” lu sha ai lam gaw anhte wuhpung wuhpawng a nga sat nga sa ai sari sadang madang ngu na hpe grai hkra machyi shangun ai lam rai nga ai hpe tsun shadum lai wa ai.

Nanghpam malu masha sha taw ai ni hte dut mari ai hpe galaw nga ai ni a  n kaja ai yaw shada lam ni hpe saw sawn di galaw na n mai nga ai, dai hte maren Mungdan n kau hkan gaw tang madun da sai shing nrai   ta tut hkrang shapraw galaw sa nga sai hta e malu masha hpe shayawm ai lam hku galaw sa ai gaw n awng dang nga ai hpe tsun lai wa ai.

Mung kang ting hta masha mun mun sen sen hku ndai malu masha a majaw jam jau hkrum nga ai hte ndai nanghpam lu sha ni hpe n re ai hku jai lang nna dut mari ai lam galaw nga ai ni hpe anhte ni n chye ai zawn nga shalai kau ai lam n galaw na matu yawng hpe hpyi shawn lai wa ai. “Ndai zawn re ai hta Madu Yesu a tsawra myit kasi hpe la nna galaw sa wa na hpe mung tsun lai wa ai. Nanghpam a mayam rai mat sai ni hpe anhte ni garai n hten bya ai hte  machyi ai n hkrum shi yang gara hku na anhte lakawn la nga ai hte myit n dik nna hkrap nga ai hpe chye hkra madat nna tinang du ai shara hta jahkring kau nna bai nhtang wa na matu yawng hpe shaga nga ai lam tsun lai wa ai. Wa Sarabyin Francis kawn “Power and Money” Arawng aya hte ja gumhpraw a majaw masha kade daram wa si hkrum mat sai kun, ndai zawn n kaja ai hte si hkrum shangun ai katsi majan hpe byin shangun nga ai ndai tsin -yam gaw anhte wuhpung wuhpawng yawng kawn atsam dat nna pat shingdang galaw sa wa na hpe hpyi shawn nga ai lam tsun lai wa ai.

 “Ndai zawn Nanghpam hpe galaw shapraw ai hte dut mari ai hpaga galaw ai gaw ‘Amazon’hta na  mabyin hpe yu nna anhte a makau grup yin hpe hkra machyi shangun taw nga ai hpe mu mada lu nga ai lam tsun lai wa ai. Ndai lam ma hkra gaw “Nanghpam hpe nre hku jai lang nga ai hte dut mari ai hpe tau nna makawp maga ai hpe galaw na matu “tara rap ra lam hpe rawt jat hkra galaw ya ai, ramma ni hpe tinang hkum tinang manu shadan ai hte tinang a prat hpe tinang gaw sharawt lu hkra hpaji ni sharin ra ai, bai nna kaja wa ra kadawn ai lam ni hpe karum ya ai hte shanhte hpe ban dung myit yaw shada ai lam nga wa hkra galaw ya ai lam ni ra nga ai hpe tsun lai wa ai.

Wa Sarabyin kawn shi a Apostolic journey hpe myit dum let sa du ai wuhpung wuhpawng hpe chyum lai ka hte la kap let “Samaritan” masha ni zawn makam masham a matu myit sadi dung ai hte ngang kang ai sak se ni tai ai Jau ni, Num, La ni yawng sari sadang hpring ai hku nga sa na hpe tsun lai wa ai.Nanghpam lu sha ai lam hpe ning hkap ai hte seng nna tara hpe grau nna shaja na hte ndai zawn re ai awu asin hpe pat shing dang na matu Wa Saradaw kaba ni a zuphpawng hta shakut nna galaw taw ai hpe chye lu ai majaw grai myit dik n gun lu ai lam tsun lai wa ai.Hkristan ni hte Nawku hpung ni yawng hpe dai ni na Mungkan Nanghpam Ninghkap nhtoi hte seng ai yaw shada lam hte anhte a ga shaka la tawn ai bungli a matu aja wa kyu hpyi na hpe tsun shadum lai wa ai lam Vatican shiga dap kaw na chye lu ga ai.

https://www.vaticannews.va/en/pope/news/2024-06/pope-at-audience-moral-duty-to-stop-production-of-drugs.html
 

 

Add new comment

17 + 2 =