Myit Shawang Kaba Ai Hte Karai Kasang A Mungga Nli Hpe Gat Hkai Ai Ni Tai Ga

Wa Sarabyin Francis kawn lai wa sai laban shani na Missa hkungga hta Karai Kasang a Sumsing mungdan kaning re ai lam ngu ai hpe Karai Kasang gaw anhte hta shi a ga hkaw hte chyeju nli ngu na rau anhte a makam masham hpe lani hte lani galu kaba wa hkra galoi mung garum ya nga ai hte maren dai mungga nli ni hpe lani hte lani shi hte shi gau ngwi rai tu kaba wa hkra galaw lajang ya nga ai gaw hkauna madu hte bung nga ai hpe tsun san lang dan lai wa ai. Dai shani hti ang ai kabu gara shiga hta na Madu Yesu kawn Karai Kasang a Mungdan hpe anhte ni nli tum  hkai ai zawn lani hte lani tu galu kaba wa hkra galaw ai hkrang hku nna tsun san lang dan lai wa ai.

 Wa Sarabyin kawn shara byin yan yawng nawng hpe aten la nna tinang a kamsham ai myit hte rau kanawn mazum shang lawm ra nga ai majaw Karai Kasang gaw anhte hpe kam sham myit mada ai lam nga na matu saw shaga nga ai lam tsun lai wa ai.

Nli tum kaja ai hte ga sau kaja ai rai tim hkai ai hte jang jang e kaba wa ai gaw n rai nga ai majaw “hkauna madu” gaw kam ai myit hte myit naw galu ra nga ai lam hpe tsun lai wa ai. Hpang jahtum hta nli tum gaw ga sau kaja kaw nna gau ngwi ngwi rai tu kaba wa nna apu asi ni di la lu ai hpun byin tai wa ai, dai gaw ga kata hta na mau hpa galu kaba wa shangun ai lam rai nga ai. Matut nna hkai da ai ten na wa ai hte maren n mu lu ai hpun a apu asi ni gaw hpang jahtum hta mu lu wa ai gaw kaba dik ai hpun a galu kaba lam sha re ai hpe kahtap nna tsun lai wa ai, ndai zawn byin wa hkra myit marai rawng nna ala nga ai hku sha n rai hpun hpe hka jaw ya ai, ga ni hpe pawm ya ai, nam hpun bang ya ai hte hpun tu pru wa hkra jasan jaseng galaw ya ai lam ni mung naw ra nga ai.Chyum laika hta lawm ai Karai Kasang a Mungdan lam mung ndai zawn sha rai nga ai. Karai Kasang gaw shi a mungga hte shaman chyeju ni, kaja ai nli tum ngu na ni hpe anhte hta bang da ya nna myit galu ai hte anhte hte rau galoi mung anhte a makau hta manang tai ya nga ai. 

Kawa a kam ai myit hte Madu Karai Kasang gaw anhte a hkum galu kaba wa ai shaloi galoi mung lanu lahku ya nga ai hpe tsun lai wa ai, bai nna Karai Kasang gaw ya zawn anhte shi a nli tum rai nga ai ni hpe tu kaba wa nna apu asi si wa na matu ahkyin aten jaw nga ai hpe Wa Sarabyin tsun shadum lai wa ai. Karai Kasang gaw anhte langai mi mung sum mat na hpe nra sharawng nga ai, chyum laika hta anhte na la lu ai nli tum zawn lam shagu hta galu kaba wa ai hpe ra sharawng nga ai.

Karai Kasang gaw anhte du ai shara hta shi a mungga nli ngu na hpe gat hkai hkaw tsun na matu sharin ya ai, anhte kawn masha ni hta hkai da ai nli tum ni kaba wa nna asi si wa ai du hkra myit galu ai lam ni nga ra ai hpe mung sharin ya nga ai nga nna tsun lai wa ai. Ndai lam hta e “Confident Patience” ngu na myit galu hkam sharang ai lam gaw madung rai nga ai, anhte ni byin mayu ai lam ni jang jang e n byin wa ai ten hta mung myit ndaw mat na hpe tsun da nga ai. Anhte ni ntsa lam hta lai nna anhte a magam bungli hta “mau hpa” gin lam ni gaw aten du ai hte asi si wa na re ai hpe shi kawn na ading tawk sha tsun lu nga ai hpe tsun lai wa ai.

Wa Sarabyin kawn daini na ten gade daram “Karai Kasang a mungga” hpe anhte a prat hta gat hkai nga ai kun, anhte ni myit mada nga ai mahtai hpe n mu ai rai tim anhte a myit nyan marai ma hkra hte myit galu nna shi madu hpe kam nga na matu mung tsun madi madun ya lai wa ai. “Karai Kasang a nli tum hpe hkap la nna galu kaba wa shangun ai Kanu Maria zawn anhte mung “myit kaba ai hte myit marai rawng let Karai Kasang a mungga nli hpe gat hkai ai ni byin tai wa na matu garum ya rit.” ngu nna akyu hpyi ya lai wa ai.