Mungkan Ting Hpe Madi Nna Htawn Tsun Ai Wa Sarabyin Francis a Hkristmas Mungga

“Hpu nau zawn tsawra let myit hkrum gahkyin kumdin ai Mungka byin tai nga u ga, lahput hputdi let Nawku nga ga” nga nna Mungkan ting hpe tsun shaga ai Hkristmas mungga hta Wa Sarabyin Francis tsun dat nga ai.

December 25 ya, Hkristmas shani, San Peter pa kaba kaw nna Mungkan ting hpe tsun shaga ai " Urbi et Orbi" ngu ai Hkristmas Mungga hta lahta na zawn Wa Sarabyin tsun dat ai lam rai nga ai.

Wa Sarabyin tsun ai hta, “Sagu rem ni galaw ai zawn lahput hputdi let Nawku nga ga, ma Yesu anhte hpe jaw ya nga ai Hkristmas Mungga gaw, Karai Kasang gaw mai kaja ai kawa rai nga ai, anhte yawng gaw hpu nau ni rai nga ga ai, ‘hpu nau ni rai ga ai’ ngu ai Madu Yesu jaw ya ai chyeju kum hpe nlawm ai sha grau tsawm htap mai kaja ai Mungkan byin tai hkra gaw gap shakut nga ai lam gaw Kaman lila sha rai na rai nga ai, dai re majaw ‘hpu nau zawn tsawra hkat nga ga’ ngu nna Hkristmas shakram nga ai lam rai nga ai, masha shagu amyu htung hking makam masham ngu ai n gying hka ai sha hpu nau ni zawn tsawra hkat nga lu mu ga” nga nna Wa Sarabyin tsun dat nga ai.

Shaning 70 ning daram na byin nga sai Israel hte Palenstine Mungdan lahkawng lapran na kasat gala majan mang hkang hpe jahkrum bawng ban mahtai tam nna simsa lam gaw gap la lu mu ga, majan a majaw Mungdan kaw nna hprawng htaw hkawm mat wa ai Syria Mungdan masha ni tinang a Mungdan de bai gin htang wa lu mu ga, majan a majaw hku hku kaw si hpang gara hkrum nga ai Yemen Mungdan na mung chying sha ni, ma kaji ni shalan shabran lam lu la mu ga, Arfrica dan hta byin nga ai kasat gala lam ni hpe Ma Yesu shazim kau ya u ga,

Korea zin lawng Mungdan lahkawng hta shanu nga ai hpu nau ni shada dai ning na aten laman bai hkrum zup wa lu nna hpu nau tsawra makyit mahkai lam grau ngang kang wa u ga, Venezuela Mungdan kata myit bra hkat nga ai mung chying sha shada lapran pri nem lam bai gaw gap lu la mu ga, Ukraine Mungdan the jet ai simsa lam nga wa u ga, Nicaragu Mungdan hta shada htingram hkat lam bai gaw gap la lu mu ga: makam masham hte seng nna lachyen ging hka adip arip di hkrum ai masa lapran Hkristmas poi hpe galaw nga ra ai masha ni yawng hkungga lara ai lam ni hkam la lu let, makam masham the seng nna wang lu wang lang Nawku kam sham na ahkaw ahkang ni lu la mu ga, ushat wa kang hta shangai wa ai ma chya ngai Yesu Mungkan masha yawng hpe yu mada mara lakawn lam galaw ya nga u ga, nga nna akyu hpyi ya ai lam, Mungkan ting hpe madi nna htawn tsun lai wa sai rai nga ai.

Ga Gale : Fr.Bernard Dashi Tang Ji

Source :Vatican News