Mungkan A Prat Laru Ni Hte San Jep Hkrum Ai Ten Madu Hta Ngai Gaw Manoi Nga Ai Kun?

Wa Sarabyin Francis kawn lai wa sai laban shani na Missa hkungga hta kam sham ai hpung masha ni hpe n grin ai lam ni hte hkrit tsang ra ai lam ni a lapran hta anhte a myit kata na laru ni hpe galoi mung shazim ya lu ai Madu Yesu hpe n hkrit nkang ai sha shaga na lam hpe tsun lai wa ai. Anhte hta nchyi nmu ai hte myit tsang lam ni hkrum ai ten hta rai tim, galoi shagu shi Madu hpe kam nna anhte a hkum hpe shi kaw ap da ra nga ai.

Wa Sarabyin kawn San Peter Shawa pa kaba hta du sa ai hkying hku re ai hpung masha ni hpe Marku a kabu Gara shiga na Madu Yesu hte Kasa ni a lam hpe la kap nna Madu Yesu hte Kasa ni hka li hta rau rai nna hkawm sa wa ai shaloi nbung laru wa nna hka leng kaba ni hta wa ai hte hka li hka kaw lup wa maw ai shaloi Madu Yesu gaw naw yup pyaw taw ai shaloi Madu hpe Kasa ni hkrit kajawng nga ai lam hpe tsun lai wa ai.

Hpang jahtum hta Madu gaw rawt nna yawng hpe shazim kau nna shanhte a kam sham myit ningra ai majaw tsun daru ai hte shi hpe kam na nga lam sharin ya lai wa ai. Wa Sarabyin kawn ndai mabyin hku nna shanhte ni a man e Madu Yesu a ah tsam hte hpung shingkang hpe madun dan ai lam gaw Madu Yesu gaw shi a Kasa ni a kam sham ai myit hpe san jep mayu ai lam rai nga ai hpe tsun lai wa ai.

Ndai zawn hkrit tsang ra ai lam gaw shanhte hpe grau nna mayak manghkang lam ni hkrum wa ai ten, bai shi Madu a kabu gara shiga hpe hkaw tsun na hkrit tsang ai myit ni hpe gwi gwi galaw sa wa na matu re ai hpe tsun sang lang dan lai wa ai. Hpa majaw Karai Kasang dai hku di ai.. shanhte a Makam Masham grau ngang kang ai hte gwi ai myit atsam ni grau jat wa na matu mung rai nga ai hpe Wa Sarabyin kawn tsun jahpra lai wa ai.

“Shi Madu hte rau ndai mayak lam ni hpe tawt lai ngut ai hpang” kabu gara shiga hpe htawn tsun na matu masha law law hte gara hku hkrum wa chye ai, Wudang hta jen da hkrum ai hte magrau grang ai hku si hkrum na hpe chye ning leng masha ni a matu kabu gara shi ga hpe hkaw tsun wa na rai nga ai hpe Wa Sarabyin kawn tsun lai wa ai. Wa Sarabyin kawn Madu Yesu gaw daini e anhte hpe mung dai hte maren hkan galaw na matu ra sharawng nga ai hpe tsun shadum lai wa ai.

“Grau nna anhte ni Chyoi pra hkum hta shanu nga ai, “Madu Yesu gaw galoi mung shi hkum nan anhte a makau hta nga nga ai, shi a Hkum hte Sai hku nna anhte hpe makawp maga ya nga ai.”

Ndai mahkrum madup hku nna “Karai Kasang gaw anhte ni na la ai hte hkam la lu ai lam mahkra hpe masha ni hte rau anhte a shani shagu na prat hkrun lam hta yak hkak ai mi rai tim gam garan gachyan nga na hpe saw shaga lai wa ai.Karai Kasang gaw anhte ni hpe yak hkak ai lam ni hkrum ai ten hta anhte hpe galoi mung n gabai da ai ..dai lam ni hpe hparan lu na matu she karum ya nga ai. Dai majaw shi a karum ya ai lam hte tawt lai lu nna, grau nna mai kaja lam ni hpe hkaja let anhte galaw lu ai atsam hta grau ai shi a hpung shingkang hpe kam nna shi hta manoi nga na matu tsun lai wa ai.

“Madu Yesu hpe tawn kau ai rai yang gaw anhte a prat hta “gara hku byin wa na re hpe nchye ai hte jam jau nga ai lam ni hpe tawt lai lu na mung nloi nga ai” bai anhte hta myit kaba ai hte gwi hkrim ai myit hte masha shagu hpe Karai Kasang a Mungdan gaw ya anhte hta a pran du nga sai hpe tsun nna, Madu Yesu gaw anhte rau nga ai rai yang anhte hpe pat shing dan da ai lam ni hpe Shi hte anhte rau tawt lai lu na re hpe Wa Sarabyin kawn tsun shadum lai wa ai.

Mabyin lam ni hpe tsun dan let Wa Sarabyin kawn kam sham ai hpung masha ni hpe tinang hkum tinang ga san san na hpe saw shaga lai wa ai. “Anhte hta mayak hkrum nga ai ten” Bai anthe sak hkrung nga ai prat hta Karai Kasang a garum ya ai hpe hkam la lu ai mahkrum madup ni hpe dum nga ai kun?“Matut nna prat a nbung laru ni ja wa ai ten hta tinang hkum tinang hpe dai laru e ka-up kau shangun nga ai kun shing nrai Shi Madu hta manoi nna anhte a makam masham hpe shada da karan kachyan nga ai kun, hkungga nawku ai lam galaw ai kun, shi a nsen hpe madat nna azim sha nga ai hte akyu hpyi nna dai laru ni hpe shazim nna simsa na matu galaw nga ai kun?

Wa Sarabyin Francis kawn hpang jahtum hku nna Karai Kasang a myit ra ai lam hpe shagrit shanyem ai hte gwi hkrim ai myit hte hkap la lai wa ai Kanu Maria zawn anhte ni a jam jau yak hkak lam hkrum ai ten hta shi hta manoi nna hkrum nga ai lam ni hpe kau da lu na matu tawt lai lu na matu karum hpyi let shangut lai wa ai.

https://www.vaticannews.va/en/pope/news/2024-06/pope-francis-at-angelus-23-june-2024.html