Mungkan Bu Htawt Hkawm Masha Hte, Tsinyam Hkrum Masha Ni A Masat Nhtoi A Matu Wa Sarabyin A Matsun Mungga

Danai Hpyen ye ni Nawku Jawng Kaw shingbyi nga yang / Soe Zeya Tun / Reuters

Du wa September shata 29 ya shani galaw na rai nga ai, “World Day of Migrants and Refugees” ngu ai ‘Bu htawt hkawm masha hte, tsinyam hkrum masha ni a Mungkan masat nhtoi’ a matu Wa Sarabyin Francis a matsun mungga hpe May shata 27, bat langai ya shani Vatican kaw nna ndau shapraw dat nga ai.

Wa Sarabyin a mastun mungga hpe “Bu htawt hkawm masha ni a lam sha nrai” ngu ai ga baw shatut nna ndau shapraw dat ai re, nga ai. Ndai gaw bu htawt hkawm masha, tsin yam hkrum masha ni hte seng ai lam san san sha nrai, anhte yawng hte seng ai lam, shinggyim masha ni a dai ni na aten hte, du wa na shawng lam aten ni yawng hte seng ai lam madaw she rai nga ai, nga nna wa sarabyin tsun dat nga ai.

Wa Sarabyin matsun mungga hta, “ndai bu htawt hkawm masha, tsin yam hkrum masha ni hpe lakawn la ai lam gaw, anhte tinang a hkum hpe lakawn la ai lam nan rai nga ai. Shanhte hpe lakawn la ai lam galaw nga ai hta anhte hkum nan mung galu kaba kung hpan wa ai, shanhte tsun shaga ai lam hpe madat ya nga ga ai aten, dai ni na prat masha ni nau ahkyak n shatai ya kam ai lam ni hpe anhte hkum nan n sen shapraw dat ai lam mung tai wa ai,” nga nna Wa Sarabyin tsun dat nga ai. Grau chye madat hkra ga shadawn law law hpe mung Wa Sarabyin shi a matsun mungga hta tsun shalawm dat nga ai.

Wa Sarabyin tsun ai ga shadawn langai mi gaw, anhte hkrit tsang nga lam rai nga ai. Ndai hte seng nna Wa Sarabyin tsun ai hta, “anhte hkrit tsang nga ai lam ni gaw kalang lang kaja wa myit tsang gying ai lam ni rai nga ma ai, raitim mung, ndai hkrit tsang ai lam ni gaw anhte a mying mang ai, shamu shamawt galaw sa ai lam ni hpe dingbai dingna jaw ai madang de du wa ai, dai hta grau nna, myit thing kup ai, amyu baw sang lachyen ginghka ai madang masa du hkra byin shangun mat wa lu nga ai. Dai re majaw, hkrit tsang ai lam gaw, kaga masha ni hta Madu Yesu hpe nmu mada mat hkra anhte hpe shing dang kau ya lu nga ai.” nga nna Wa Sarabyin tsun ai.

Kadai hpe mung lachyen ginghka kau ai lam nmai galaw ai lam hte seng nna Wa Sarabyin tsun ai hta gaw, “kadai hpe mung lachyen ginghka nna shingdu de tawn kau ai lam nmai galaw ai, hpa majaw nga yang, dai ni prat mungkan hta, byin ai ram ai masha ni hpe chyu masha zawn mu mada na ngu ai masa ni grau grau sawng wa ai hte, lachyen ginghka da hkrum ai masha ni a ntsa grai mazup ai prat rai nga ai majaw rai nga ai. Kasat gala majan ni byin ai hte, dai majan a tsin yam lam ni hkrum sha ra ai shara   Mungdan ni gaw mungkan mungdan shara n kau ni hkan, raitim mung, majan hta lang ai sinat lak nak ni hpe gin shapraw dut shabra lam galaw nga ai gaw kaga shara Mungdan ni, shanhte gin shapraw dut shabra dat ai sinat laknak ni hte byin nga ai majan mang hkang lam ni a majaw ru pru wa ai tsin yam hkrum masha ni hpe hkap la na gaw shanhte bai nkam rai nga ma ai, tsin yam hkrum ra, hkam sha ra ai ni gaw galoi mung matsan mayam masha ni, daw hka loi ai ntai nmai re ai masha ni chyu rai ma ai” nga nna Wa Sarabyin a mungga hta tsun dat nga ai

Source:Vatican News

 

Add new comment

2 + 18 =