Mu Chye Na Hte Hkai Chye Na Matu Sharin Hka Ja Nga Mu 27 July 2023

Vertican news

Nhtoi: 23-7-2023

Karai Kasang A Amu Magam Ni Hpe Mu Chye Na Hte Hkai Chye Na Matu Sharin Hka Ja Nga Mu

Laban shani ka ang na Angelus ngu na madu a lamu kasa akyu hpyi ga tsun ai ten Wa sarabyin Francis hku nna kam sham ai hpung masha ni hpe “prat a dam lada ai shara hta” Karai Kasang gaw anhte hpe sha nre mungkan ting hpe shi a tsawra myit madun dan lai wa sai hpe mu chye shangun let gara hku bai hkai shakut sa wa ra na ngu ai lam hte seng nna n-gun jaw lai wa ai, shing rai yang she grai kaja ai lam ni gaw grau grau nna law htam wa ai hte anhte ni dan la lu na ra ai hpe tsun shadun n-gun jaw lai wa sai rai nga ai.

shani ka ang na missa hte Wa sarabyin Francis kawn Saint Peter’s Basilica ngu ai hta (Mungkan ting na Masum lang ngu na kaji kawa ni hte  asak kaba sai (GrandParent hte Elderly) ni a matu missa hkungga hpe St.Peter’s pa kaba hta nawng ya lai wa sai.

Laban shani na chyum mungga rai nga ai hkaulan mam nli hte tsing du (Wheat hte Weed) (*sHK eSif h jrufyif)yan a lam hpe bai myit sumru yu yang, hkau na hkai ai wa gaw shi a hkau na pa hta kaja ai nli hpe gat hkai da ngut ai ten shana na aten hta gumlau wa ngu na myit n san seng ai masha wa gaw sa nna n kaja ai nli rai nga ai tsing tum ni hpe sa gat hkai kau da ai hpe mu chye lu nga ai.

Karai kasang gaw anhte Mungkan ga ting hpe shi a hkau na pa langai zawn nli kaja ni hpe gat hkai da ai zawn Tsa Dan mung n kaja ai nli hpe gat hkai taw ai a majaw kaja ai hte n kaja ai gaw rau galu kaba wa nga ai lam rai nga ai tsun da nga ai. Wa sarabyin hku nna tsun ai hta anhte ni grau kaja dik ai Mungkan hpe galaw shakut nga ai teng hta anhte ni a n kaja ai nli ngu na myit ni paw pru wa hkra gunglau hkrum ai teng ni mung nga chye nga ai, dais ha nre anhte ni n kaja ai ru pawt hpe la kau na rai yang kalang lang kaja ai lam ni hta mung hkra machyi wa chye ai hpe dum chye da ra ai nga nna mung tsun lai wa ai.

Wa sarabyin kawn anhte ni tingnang a myit masin hta gara shara kaw kaja wa nan jasan jaseng ra nga ai hpe myit sawn la let anhte ni ta tut mai shang galaw ra ai hpe mung  tsun shadum lai wa sai. Anhte a prat hta kaja ai nli hte n kaja ai nli hpe kam ai hku mai lata la na hku shangun da nga ai hpe anhte ni a myit masin hta matsing da chye ra ai. Bai Wa sarabyin kawn tsun sanglang dan ai hta anthe ni grau dam lada ai mung kan de hkawm sa wa ai ten hta n kaja ai nli ni ngu ai agung alau hpe hkrum sha wa yang kaja ai lam hpe galoi mung myit dum manu shadan let galaw chye ai lam mung nga ra ai hpe tsun lai wa sai.

Anhte ni kaja ai hte n kaja ai lam hpe dum chye nga lu na matu tingnang hkum tingnang san jep ai lam hpe gaw galoi mung galaw nga ra ai, bai anhte a myit masin kraw lawang hta hpa ni byin taw nga ai hpe mung mu chye lu na matu karai kasang a nhtoi shanip ngu na mungga hta teng n teng san jep yu mai nga ai.

Wa sarabyin gaw masum shara (Third area) ngu na anhte a makau grup yin htingbu ni hte seng ai hkau na pa hta n kaja ai nli hku nna sha anhte ni daw dan ai lam n galaw ai sha tingnang hkum nan shakut nna anhte a htingbu ni hpe kaja ai nli ngu na hpe galu gaba wa hkra hkai dan ai lam ni hpe mung galaw saw a dan ra nga ai.

Karai Kasang gaw anhte hte Mungkan ting hpe madun dan ai tsawm htap ai lam hpe anhte ni mu chye la shangun ai lam gaw “ahpa atang hte hkan sa na lam” n rai na hpe n-gun jaw shadum lai wa ai, anthe ni kaja wa kam sham ai hpung masha langai rai teng yang gaw Mungkan ting ngu na Hkau na hta hkai ai Karai Kasang gaw kaja ai hte kaja ai lam hpe grau galu kaba wa hkra galaw ai hte dan la na ra sharawng nga ai re ai majaw anthe kam sham nga sai marai hkum shagu gaw ndai lam ni hpe bai lit la galaw sa wa na hpe ra nga ai.

Hpang jahtum hku nna Wa sarabyin gaw anhte ni tingnang nang a prat hpe sawn ding lik yu let, laga masha ni a gawng kya ai lam hpe n yu ai sha kaja ai lam hpe chyu sha myit mada let anhte ni yawng myit mang langai sha hte anhte hpe n kaja ai de gunglau nga ai lam hpe rau chyawm ning hkap sa wa ga. Anhte ni tingnang hkum hta na n kaja ai myit kyang lailen ni hpe Karai a tsawra ai wan hta bang nat kau na matu tingnang hkum hpe shajin da sai kun, san jep da sai kun? Wa sarabyin gaw anhte ni yawng hpe ndai ga san hte san nga ai, anhte ni yawng rau jawm shakut galaw sa ai rai yang grau ai apu asi ni hpe anhte dan la lu na lam tsun lai wa sai.

Anhte a prat ngu na hkauna hta Karai Kasang hku nna gat hkai da ya sai hpe anhte ni myit galu ai hte dan la shu la lu na matu Chyoi pra ai Maria anhte hpe matsan dum hpyi karum ya rit.

 

 

By; Fr. Patrick Nawlang Zau Jat Awng

Coordinator Of  Kachin Jinghpaw

 

https://www.vaticannews.va/en/pope/news/2023-07/pope-at-angelus-learn-to-see-and-cultivate-the-works-of-god.html

Add new comment

2 + 0 =