Missa Hkungga Gaw Anhte Yawng A Matu, Ap Nawng Daw Jau Ya Ai Madu Yesu A Asak Rai Nga Ai Nga Nna Wa Sarabyim Francis Tsun Dat Ai Shiga

 

June 19, Chyoi Pra Ai Hkum hte Sai Poi laban shani, San Peter Shawa Pa hta, “Madu A Lamu Kasa Akyu Hpyi Ga” tsun ten, Wa Sarabyin Frncis, “Chyoi Pra Hkum hta shanu nga ai Madu Karai gaw anhte marai hkum shagu a myit masin salum hta mung shanu nga ai, anthe marai hkum shagu hpe bau sin makawp maga ya nga ai, anhte ra kadawn ai lam ni hpe jahkum shatsup ya ai, manang tai ya nga ai hte shalan shabran ya nga ai,” ngu nna hkaw tsun da nga ai.

Hpang jahtum daw sha poi hta gaw de da ai “Daw Sha Poi, Missa Hkungga” gaw Madu Yesu hkum nan kumla law law hte, grau nna muk hte nga hpe shalaw ai kumla hte, shabyin da ai rai nga ai (Lk 9:11b-17).

Masha hkum shagu gaw Madu Karai a tsaw ra myit kaba hte yu sin nga ai hpe hkam sha lu na ga ai.

Madu Yesu gaw shi a hpang hkan shawa hpawng hpe mungga htawn ya ai, satan a gumshen ai lam ni hta na shalawt ya ai, muk tawng manga hte nga lahkawng hpe akyu hpyi ap nawng ngut jang, ahkyep alep di nna shawa masha ni hpe daw jau na matu kasa ni hpe lit jaw ai. Shawa masha yawng mung dai hpe hkru hkru kat kat sha ngu ai hpang angam ni hpe hta mahkawng yang, mung shi lahkawng (12) tup naw ngam ai.

Kam sham myit hte Madu Hkristu a Hkum hte Sai hpe lu sha ai ni gaw dai hpe sha lu ai sha n-ga, myit dik lam nan mung lu la ai. Ndai gaw Missa Hkungga hta hkam la lu ai madung ahkyak ai lam lahkawng mung rai nga ai.

Madu Yesu gaw nga yawng nga pra hpe bau sin makawp maga ya ai. Shawa masha ni Yesu hte kasa ni daw jau ai lusha hpe sha nna Madu Yesu gaw nga yawng nga pra hpe bau sin makawp maga ai wa rai nga ai hpe myit dum wa ma ai. Dai gaw Madu Karai Missa Hkungga hta shanu nga ai lam nan rai nga ai.

Shi anhte hpe, “sumsing lamu mungdan na masha ni” ngu shaga shamying ai. Dai hpe hkam la lu na matu, anhte gaw ndai mungkan ga kaw hkrunlam hkawm ai ni tai nga ga ai.

Missa Hkungga gaw anhte a shani shagu prat hte n tsan gang ai.  Missa Hkungga hpe n jaw n ang ai ningmu hte masat shingdang ai lam ni nga chye ma ai.  Raitimung, dai gaw anhte a shani shagu prat hta chye na hkawn hkwng lu ai makam hte n tsan ai. Madu Karai gaw anhte a ra kadawn ai lam ni hpe anhte a masin salum hta nan jaw bang da ya ai.

“Madu Yesu zawn htingbu hpu nau ni hpe bau sin makawp maga ai ten hte Chyoi Pra Hkum kawan ai ten hta masam maram la lu na ga ai,” ngu Wa Sarabyin sharin shaga da ai. Anhte gaw Madu Yesu a Hkum hpe sha nna hpu nau ni hpe mung daw jau ra ga ai.

Missa Hkungga Hta Madu Yesu Anhte Marai Hkum Shagu Matu Shi a Asak hpe Ap Nau Da Ya Ai.

Lu sha ngut ai hpang myit dik ai lam hte seng nna mung Wa Sarabyin Francis matut sang lang da ai. Lu sha ngut ai hpang myit dik lam lu ai hpe n mai malap da ga ai. Anhte hkum a matu lusha hkam la ga ai hte dai lusha a majaw myit dik lam mung nga ra ga ai. Jahkru shakat ai lam gaw anhte hpe tsaw ra myit majing hte jaw ya ai hpe myit dum ra ga ai.

Madu Hkristu a Hkum hte Sai hta Madu Yesu hkum nan rawng nga ai hpe anhte mu lu ga ai. Dai Shi a asak gaw anhte marai hkum shagu hpe jaw ya nga ai.

Shi n lawm ai lam ni yawng gaw wan hkut zawn mawng mat nga ten sha rai nga ai.

Chyoi Pra Hkum kawan nawku daw jau nna Madu kaw anhte a myit masin mahkra hte akyu hpyi nga ga: “Madu e, shani shagu anhte ra ai lu sha daini anhte hpe jaw rit; dai lusha hta nang Madu nga nga ai hpe myit dum let myit dik myit pyaw lam lu la na ga ai.”

 

Fr. Patrick Gawmaw Hkawng Yae

#vaticannews

#rvakachinservice

#popefrancis

https://www.vaticannews.va/en/pope/news/2022-06/pope-corpus-christi-eucharist-angelus.html

 

Add new comment

2 + 16 =