Mexico Mungdan Hta Hka Tung Kaba Wa Nna Jam Jau Hkrum Sha Nga Ai Mung Shawa Masha Ni A Matu Wa Sarabyin Akyu Hpyi Ya

Mexico mungdan, Hidalgo mungdaw hta hka tung kaba nna masha marai 17 lahta de si mat sai lam chye lu ai. September 19, laban ya shani, San Peter Shawa Pa hta, “Madu A Lamu Kasa Akyu Hpyi Ga” tsun ngut ten Mexico mungdan, hka tung kaba ai hta si mat sai ni a matu Wa Sarabyin Francis hkum nan laksan akyu hpyi ya let hka tsin-yam hkrum masha ni yawng hpe garum madi shadaw la na matu, bai, maigan mungdan ni hta du hkawm nna ruyak jam jau garen gari yak hkak hkrum sha taw nga ai ni yawng tinang a dum nta de bai nhtang wa lu na matu mung akyu hpyi ya let shanhte hpe garum shingtau ya na matu saw shaga garum hpyi da ya nga ai.

Lai wa sai September 7 ya shani, Mexico mungdan, Tula hte Rosas hka mayan hta marang kaba htu hka tung shang hpang wa nna, dai hka mayan na hka hkinggau ni hpe adawt shagyi kau ya ai hte, dum nta ni, lam maw ni hte tsirung kaba ni hpe mung jahten kau ai lam chye lu ai.

Covid-19 ana kap machyi masha ni hpe yu gawn lajang ya taw nga ai shinggyim nauna makawp maga wuhpung ni hpaw da ai tsirung kaba mung hka tung kaba ai hta lawm ai majaw tsi tsi hkam la nga ai Covid 19 ana kap machyi masha marai 17 gaw dai hka tung kaba ai hta si mat ai lam Vatican shiga dap kaw nna shana dat ma ai.

By Paul Maran Zau Jum

#vaticannews

#rvakachinservice