Mauritius Asuya Hpe Wa Sarabyin Tsun Htet Da Ai Mungga Ni

Bu htawt hkawm masha ni hpe hkap hkalum la ga, ramma ni yawng kan bau magam bungli lu na matu sut lu nga mai lam hpe grau dam lada wa hkra n gun dat galaw ga, nga nna Mauritius Mungdan asuya hpe Wa Sarabyin Francis tsun shadut dat nga ai.

Mauritius Mungdan hta du nga ai Wa Sarabyin Francis, bat langai ya shani, Mungdan asuya ning baw ni, Mungchying mung shawa hte seng ai uhpung uhpawng ning baw ni, Mauritius Mungdan hte seng ai sumtsan hkring mang ni hte laksan hkrum ai hpawng hta lahta na zawn Wa Sarabyin tsun dat ai lam rai nga ai.

2018 ning hta kan bau magam bungli nlu ai ramma ni tsa htam shadang 23 jan nga ai, nga nna World Bank kaw nna ndau shapraw da ai sumtang laika hta madi madun da nga ai.

Mungdan a masing masa jahkrat galaw ai lam hta mungchying mung shawa hpe madung da myit nna galaw ra ai nga nna mung Wa Sarabyin tsun madi madun dat nga ai.

 Matut nna Wa sarabyin tsun ai hta,

 “Mungdan shang lawt lu ai 1968 ning kaw nna Mauritius Mungdan a sut lu nga mai lam ni gau ngwi ngwi rawt jat bawng ring wa ai lam ni nga ai ngu ai raitim, ndai sut lu nga mai jat wa ai lam ni a akyu hpe yawng maren mara nhkam sha lu nga ai ngu ai masa mung dan dawng nga ai, grau nna ramma ni hku nna nhkam sha lu nga ma ai, dai re majaw Mungdan hpe woi awn nga ai ni hku nna mungchying sha ni hpe madung da ai sut masa lam byin hkra ladat shaw n gun dat galaw ra ai, magam bungli nnan law law nga pru wa hkra gin shapraw ya ra ai, matsan masha ni, shanhte a matsan tsinyam kaw nna lawt pru wa lu hkra lam magup myit shalawm ai bawng ring lam masing masa jahkra galaw ra ai, akyu amyat lu na lam hpe sha yu nna, tinang a sut masa awng dang lam a matu masha law law hpe jam jau hkrum shangun ai sut masa lam n galaw ga” nga nna  Mauritius Mungdan asuya lit nga ai ni hpe Wa Sarabyin Francis tsun shadut dat nga ai.

Bu htawt hkawm masha ni hpe hkap hkalum hkap tau la chye ra ai lam hte seng nna Wa sarabyin tsun ai hta gaw, “Mauritius zinlawng Mungdan gaw, shara magup kaw nna du zup nga ai masha ni jawm shanu nga ai Mungdan re, nbung ai makam masham, nbung ai htung hkying maka kumla ni law law nga ai Mungdan re, mungchying sha yawng wan mi jan nga ai hta na, tsa htam shadang 48 daram gaw Hindu ni re, tsahtam shadang 33 daram gaw Hkristian nirai ma ai, Muslim ni mung tsa htam shadang 17 daram nga nga ai. Tinang hkum nan mung bu htawt hkawm nna ndai zinlawng Mungdan de du nga ai re ngu ai tinang a labau hpe myit dum nga nna, kan bau bungli lu na myit mada let matut du shang wa ai bu htawt hkawm masha ni hpe hkap tau garum la ra ai, yak hkak hkrum nga ai shanhte a kun dinghku ni hpe grau mai kaja wa hkra jawm pawn ba la ra ai, nga nna mung Wa Sarabyin tsun shadut dat nga ai  lam Vatican shiga dap kaw nna shana dat nga ai.        

Source : Vatican News