Makam Masham Hka Ja Ai Lam

Photo : Life Teen

N-dai makam masham hka ja ai ndai lamang kaw nna Wa sarabyin Francis hkaw tsun lai wa ai mungga ni hpe shapoi ya nga ai rai nga ai.

Ya ndai bat na mungga gaw , ja chyum mungga ,Luke 9:7-9 hta rawng ai

 “Shing rai byin ai lam yawng hpe Herod munggyi na la nna, myit ung ang nga ai: kaning rai nme law, n-kau mi gaw, Yawhan si ai kaw na bai hkrung rawt wa sai; nkau mi gaw, Elia paw pru ra ai; bai kaga ni mung, Shawng na myihtoi langai ngai bai rawt sai, nga nna tsun shajang ma ai. Herod mahtang gaw, Yawhan hpe ngai baw htau kau se ai; rai ti mung, ndai hte wa ngai na ai gaw, kadai wa rai ta? nga nna, Yesu hpe mu yu na tam nga ai.” nga ai ja chyum mungga hpe n-pawt la nna hkaw tsun ai Mungga rai nga ai.

       “Yawhan hpe ngai baw htau kau se ai; rai yang, ndai wa gaw, kadai wa rai ta?” nga nna Madu Yesu a lam hte seng nna Herod hkaw hkam san ai ga san gaw, kaja wa yang Madu Yesu hpe hkrung kadup ai anhte yawg san pru wa ai anhte hkum shagu a ga san rai nga ai. Sharawng ai myit hte chye mayu ai majaw san ai ga san byin mai ai zawn, hkrit tsang ai lam ni nga ai majaw byin pru wa lu mai ai mang hkang ni hpe tau nau nna jasan kau lu hkra ngu ai yaw shada ai lam the san ai ga san mung byin mai nga ai. Kabu gara ai shiga hta na mabyin hpe hti sum ru yu ai shaloi, Madu Yesu a lam hte seng nna, ndai wa gaw mung masa lam the seng nna Yuda masha ni hpe woi awn nna Roma ni a lata kaw nna lawt lu hkra rawt malan galaw woi na wa mi rai kun, nga nna myit tsang ai ni nga ma ai lam mu lu nga ai. Dai re majaw Luke 9: 8 hte 9 hta, Herod Munggyi Yesu a lam na la nna, myit ung ang nga ai: kaning rai nme law, nkau mi gaw, Yawhan si ai kaw na bai hkrung rawt wa sai; nkau mi gaw, Elia paw pru ra ai; bai kaga ni mung, Shawng na myihtoi langai ngai bai rawt sai, nga nna tsun shajang ma ai. Herod mahtang gaw, Yawhan hpe ngai baw htau kau se ai; rai yang ndai wa gaw, kadai wa rai ta? nga nna, Herod tsun let madu Yesu hpe mu yu na tam nga ai, nga ai lam hpe mu lu nga ga ai rai nga ai. Herot a matu Madu Yesu gaw mang hkang nan rai nga ai, kaja wa Madu Yesu mung mang hkang shabyin ai wa rai nga ai.

        Madu Yesu shabyin ai mang hkang lama ma nhkrum ai sha Madu Yesu hpe chye lu na matu nbyin mai nga ai. Asan sha  tsun ga nga yang, anhte a prat hta mang hkang lama ma hkrum katut mayu ai rai yang, lam nmaw de pru wa nna Madu Yesu hpe mu hkra, chye lu hkra sha galaw dat u, teng sha mang hkang ni tinang hpang de du shang wa na re. Mang hkang langai sha pyi nrai law law hkrum katut lu mai nga ga ai. Ratim mung Madu Yesu hpe chye lu hkra galaw ai lam gaw ndai lam langai sha nga nga ai. Asim asa re ai masa nga nga nna Madu Yesu hpe chye wa lu na lam nbyin mai ai, Library ngu ai laika hti dum ni hkan laika buk ni hta hti dung taw nna sha mung Madu Yesu hpe nchye lu mai ai.

       Makam masham sharin ya ai Tara laika ni hta Madu Yesu hte seng ai lam ni law law lawm nga ai majaw, tara laika sharin hkam la ai hku nna Madu Yesu hpe chye lu mai ai nga ai. Madu Yesu gaw Karai Kasang a kasha re ai lam, anhte hpe hkye la na matu yu hkrat sa wa ai Madu rai nga ai lam, tsawm htap ai hkye hkrang la ai labau lam ni, bai kawa Karai Kasang a mai kaja tsawm htap ai tsawra myit kaba hte seng ai lam ni, ndai lam ni law law hpe tara laika sharin hkam la, hti hka ja ai lam ni galaw ai hta mu chye lu mai nga ga ai. Raitim mung, mang hkang gaw Catechsim of the Catholic Church ngu ai Nawku Hpung a makam masham sharin ya ai tara laika buk hpe nnan htuk shapraw shabra dat ai aten kaw nna dai ni du hkra kaja wa gaw hti yu saga ai kun, ngu ai lam rai nga ai.

       Tara laika sharin hkaja la ai lam ni hku nna Madu Yesu hpe mu chye wa hkra anhte galaw na ra ga ai, ahkyak ga ai. raitim mung ndai hte hte sha nram nga ai, ndai gaw tsang ning gam langai sha naw rai nga ai, Madu Yesu hte tsun shaga ai, tsun jahta lam galaw ai, akyu hpyi ai, lahput hput di nna shi a lam sum ru ru ai, ndai lam ni galaw nna Madu Yesu hpe grau chye wa hkra anhte galaw ra ga ai. Anhte akyu nhpyi ga ai rai yang, Madu Yesu  hta tsun shaga jahta ai lam ni n galaw yu ga ai rai yang, Madu Yesu hpe anhte nchye ga ai. Sharin hkaja ai lam ni galaw nna, Madu Yesu hpe anhte a myit hte chye hkra galaw ra ga ai zawn, akyu hpyi ai, shi Madu the ga tsun shaga ai lam ni galaw nna anhte a myit masin kaw nna Madu Yesu hpe chye hkra mung galaw ra ga ai. Ndai hte lu galaw yang anhte a matu ram daw Madu Yesu hpe chye lu na rai ga ai, raitim mung ndai hte hte sha garai naw nram shi nga ai. Madu yesu hpe chye lu hkra galaw ai nam bat masum ngu na tsang naw nga nga ai. Dai gaw Madu Yesu a hpang hkan nang ai, shi hta rau hkawm sa ai lam rai nga ai.

      Madu Yesu a sharin shaga ai lam hta hkawm sa ai hku nna shi madu hte rau hkrun lam hkawm ra ga ai. Ta tut shamu shamawt ai sak hkrung nga sa prat hku nna Madu Yesu hpe chye hkra galaw ai ngu ai lam ahkyak nga ai. Myit hte, masin salum hte, bai ta tut sak hkrung hkawm sa ai prat hte, ndai hpan masum hku nna Madu Yesu hpe chye hkra anhte galaw ra ga ai. Ndai masa hpan masum hte Madu Yesu hpe ngai chye sai rai yang nye a prat hta Madu Yesu rawng nga na rai nga ai.

      Nye a prat hta Madu Yesu rawng nga ai kun, ngu ai ga san ni nsan yu ai sha, shing nrai nye a prat hta Madu Yesu rawng nga ai lam nnga ai masa hta Madu Yesu hpe chye ai ngu ai masa nbyin lu mai nga ai. Madu Yesu hpe, ndai wa gaw, kadai wa rai ta? nga ai ga san hpe anhte hkum shagu kaw nna hkawt masha law law mung san ai ga san rai nga ai. Ndai ga san hte seng nna Karai Kasang a Mungga anhte hpe bai san nga ai lam gaw, shi kadai re ngu ai hpe nanhte chye mayu nga mi ni? Ngu ai ga san rai nga ai. Shi kadai re ngu ai hpe chye mayu ga ai rai yang, Nawku Hpung kaw nna ka da ai shi kadai re ngu ai shi a lam ka da ai hpe hti yu ga, akyu hpyi ai lam hta shi Madu hte ga tsun shaga yu ga, shi a lam hta shi Madu hte rau hkawm sa nga ga, shaloi anhte shi kadai re ngu ai hpe chye lu na rai ga ai.

 

2013 ning September shata 26 ya shani hkaw tsun lai wa ai mungga rai nga ai.

 

Wajau Bernard Dashi Tang Ji

RVA Jinghpaw N-sen Shapoi Dap Lithkam

 

 

 

 

 

Add new comment

6 + 9 =