MaduYesu Hta Maren Mara Rai Nga Ga Yang Anhte A Mayak Mang Hkang Ni Hpe Hparan Tawt Lai Lu Na

Wa Sarabyin Francis gaw, September 8, bat masum, Nu Maria A Shangai Nhtoi shani, Hpung Shawa Masha Ni Hte Hkrum Shaga Ai Lamang hta, Hkristan masha ni yawng gaw Hkristu hta Kashin Kamun hkam la sai re majaw Hkristu hta maren mara rai nga ga ai rai nna, dai myit masa hte anhte a mayak manghkang lam ni hpe hparan lu na, tawt lai lu na rai ga ai, ngu tsun shadum da nga ai.

San Pawlu ahkyak madung da tsun ai Madu Yesu hta kam sham ai makam masham lam hpe sumru woi da let ndai tara mungga hpe Wa Sarabyin hkaw tsun da ai rai nga ai. San Pawlu tsun ai gaw Madu Yesu hta kam sham ai ni gaw Karai Kasang a kashu kasha majing ni tai wa ai hte Shi a sumsing sutgan hpe madu lu ai ni mung tai wa na lam rai nga ai.

Hkristan masha shagu gaw anhte tinang a kashin kamun hkam ai hpe bai myit dum nna dai kashin kamun chyeju hpe laklai ai hku hkam la saga ai hte maren dai chyeju hta sak hkrung nga sa ra ga ai rai nga ai.

Makam Masham gaw anhte hpe Madu Yesu hta Karai Kasang a kashu kasha ni shatai ya ai

Yesu Hkristu hta kam sham ai chyeju hkam la lu ai hte rau, Karai Kasang a kashu kasha ni tai lu ai ningnan re ai lam hpe hkam la lu saga ai.

Karai Kasang a kashu kasha ngu hkam la lu ai gaw shinggyim num sha, la sha yawng a matu rai nga ai. Ahkyak gaw anhte ni Hkristu Madu hta kam sham nga ra na rai nga ai.

Kashin Kamun gaw anhte hpe tsawm htap ai hku galai shai shatsawm ya ai

Kashin kamun hkam ai ngu ai gaw Yesu Madu a mungsung lam ni hta hkum hkrang, myit masin wenyi nawng, teng man ai hte akyu pru ai hku shang lawm ai hpe tsun ai rai nga ai ngu San Pawlu hkaw tsun da ai hpe Wa Sarabyin bai shang lang da nga ai.

Roma ni kaw shagun dat ai laika hta, San Pawlu hkaw tsun ai gaw, kashin kamun hta anhte ni Hkristu hte rau si hkam saga ai, lup makoi kau hkrum saga ai, dai hpang bai hkrungrawt let Hkristu hte rau htani htana asak hpe hkam la lu saga ai ngu ai rai nga ai (Roma 6:3-14). Kashin kamun hkam ai gaw ntsa lam, kumla hkrang sha n rai nga ai. Dai kashin kamun hpe hkam la ai ni gaw myit masin kata hta nan galai shatsawm hkrum ai hte asak ningnan hpe mung hkam la lu ai, Karai Kasang hpang de bai htang wa lu ai, Shi hpe Abba, Wa e, ngu shaga lu ai rai nga ai, ngu sang lang dan let, Hkristan masha shagu gaw tinang a kashin kamun hkam ai nhtoi hpe matsing da let dai nhtoi hta Karai Kasang hpe chyeju dum poi masat dingsat galaw na matu mung shadum n-gun jaw da ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-09/pope-francis-general-audience-baptism-equality.html