Madu Yesu Gaw Hkrit Ai,Mara Lu Ai Ni Hpe Hkye Hkrang La Na Matu Shangai Wa Ai Re

Anhte Christmas Poi hpe shaning shagu lawm ai,Madu Yesu jam jau hkam nna shangai wa ai ngu hpe mung yawng chye chyalu rai nga ai.

Daini na Mungga hta lam yan lahkawng hku nna garan kachyan mayu nngai.

Nambat langai hta “ Hkum Hkrit” myit ngu ai re.Ndai hkum hkrit ngu ai hpe gara kaw mu lu ai ta nga yang, Chyoi Pra ai Nu Maria hpe lamu gasa ga sa shana ai shaloi tsun ai ga re.”Maria e hkum hkrit u, nang Karai Kasang a man e myi man pan ndai (‘ Luka 1:30 ).Yawhan Baptista a Kawa,Zahkria hpe Lamu Kasa dan pru dan ai shaloi mung mu lu ai.Zahkria hpe Lamu Kasa gaw ‘ hkum hkrit’ ngu nna tsun wu ai.Dai ni na Madu a Kabu Gara shiga hta mung lawm ai.Sagu Rem ni hpe lamu Kasa ga sa shana ai shaloi ‘ hkum hkrit myit, masha nlang hte a matu na chying Kabu Gara ai shiga ngai nan hte kaw  gun sa we ai’ nnga nna hkumhkrit ngu ai ga si hpe grai mu lu nga ai.Madu Yesu tara hkaw hkawm ai shaloi mung hkumhkrit ngu ai ga si hpe law law lang lang da ai hpe mu lu ai hku re.Yosep hpe lamu kasa ga sa shana ai shaloi mung ‘ Maria hpe hkungran la na matu hkum hkrit u’ nga nna tsun ai.

Shinggyim masha ni hpa majaw hkrit taw nga ma ta ? Npawt nhpang laika hta , Adam yan Ewa Karai Kasang hkum sha ngu ai Edin Sun na nam si hpe sha ai majaw, Karai Kasang bai sa wa ai shaloi shan hkawng hkrit nna hpun sumwum kaw makoi taw nga ai.Adam yan Ewa dai Karai Kasang tsun da ai ga hpe n  madat ai hte Mara lu ai majaw hkrit ai myit rawng pru wa ai.Dai kaw na shinggyim masha ni yawng hta hkrit ai myit rawng wa ai .

Hpa hpe hkrit ai ta nga yang, nkau ni gaw matsan na hpe hkrit ai,machyi makaw byin hkam ja lam nnga na hpe hkrit ai,n kau ni gaw tsawra myit n lu na hpe hkrit ai.Nkau ni gaw si na hpe hkrit ai.Ndai zawn hkrit ai lam amyu myu nga ai. Madu Yesu shangai wa ai ngu ai gaw n dai hkrit ai kaw na hkye hkrang la nna  Kabu gara ngwi pyaw ai hpe jaw ya na matu shangai wa ai re.Dai ni anhte Hkritmas poi galaw ai ,Hkritstmas Missa galaw ai ten hta n dai lam ni hpe kalang bai myit sumru yu ga.Anhte hkrit ai lam hpa baw nga ai kun.Madu Yesu anhte hpe hkrit ai kaw na,anhte shut ai mara kaw na hkye la  na matu shangai wa sai.Anhte ndai kaw du taw nga ai langai hkrai mung , Madu Yesu a hkye hkrang la ai hkrum na re.

Madu Yesu gaw mara lu ai ni hpe hkye hkrang la ai lam galaw ai zawn anhte ni mung, tinang makau grup yin hta hkrit taw nga ai ni hpe hkye  la ai lam galaw mai nga ai.Langai hte langai galaw ai lam gaw n bung na re.Jau Ma Ma ni nga yang , masha kaga ni a Wenyi ni hpe hkye hkrang la na matu galaw ai,nkau ni machye makaw hkrum, jam jau nga ai ni hpe hkye hkrang la ai lam galaw ai.Dip lu dip sha re ai kaw na hkye hkrang la na matu galaw shakut  ai ni mung nga ai.Namhpan lu sha hte matsan jam jau re ai ni hpe hkye hkrang la na matu shakut ai.Ndai hkristmas ten hta Madu Yesu anhte hpe hkye hkrang la na matu shangai wa ai hte maren, dai hpe myit dum nna anhte mung hkye hkrang la ai magam bungli hta shakut ga.

Lam lahkawng hta , Madu Yesu gaw anhte hta du sa ai shaloi , Lamu kaw nna yu hkrat wa let kalang ta anhte a shawng hta buk nga nna yu sa wa na n re.Ga Shadawn tsun ga nga yang, Dingla langai mi Madu Yesu du sa wa na hpe shingran mu ai majaw, Christmas du na shana e Madu Yesu hpe ala nga ai shaloi, palawng shep shep re ai hpun nna hkyep din n din ai hkyep din chywi ai ai dingla  wa shawng shi a chyignhka sa akawk ai.Shi dai wa hpe matsan dum ai majw Madu Yesu hpe jaw na matu lajang da ai Hkyep din hte palawng   hpe jaw dat ai.Madu Yesu hpe bai matu a la nga ai shaloi, matsan mayan re ai dinggai langai bai shi a chyinghka sa kawk ai.

Dai gumgai gaw shat n lu sha ai masum mali ya rai sai nga nna shi hpe tsun dan wu yang, Madu Yesu hpe jaw sha na matu hkyen da ai malu masha hpe jaw sha dat wu ai.Dai gumgai wa mat ai hpang kade nna yang  ma hkrap ai n sen hpe na wu ai.Shi shinggan le yu yang lam dam taw nga ai ma kasha langai mi hpe mu wu ai.Dai shaloi mung shi atsawm sha pawn la nna dai ma a dum nta de wa sa da ai.Ma hpe wa sa ngut ai shaloi jan mung du wa ai hte shi a myit hta  ‘ Madu e nang ngai kaw sa wa na nga nna hpa majaw n sa wa n ta? Ngu tsun wu ai. Shaloi nsen kaba langai mi pru wa nna, “Ngai nang kaw masum lang sa wa se ai “  nga nna Madu Yesu gaw shi hpe htan ya wu ai.

Ndai ga shadawn hta mu lu ai hte maren, Ya shangai wa a Madu Yesu gaw anhte nang ngai yawng hta teng teng du sa wa na re. Gara hku ladat hte sa wa na re ngu ai hpe n chye ai.Ga shadawn hta mu lu ai Dingla wa zawn kun,dinggai wa zawn kun, ma kasha wa zawn hkrap nna sa wa na  kun, lam amyu myu hte sa wa na re ai.Dinga la wa gaw , shi shingran mu ai hte maren Madu Yesu sa wa na re majaw, n ta hpe jasan jaseng galaw nna kumhpa lajang da ai.Malu masha hkyen da ai.Ya anhte mung Madu Yesu sa wa ai shaloi hkap tau la lu na matu shajin da  na ahkyak ai.Shi a matu lajang da ai kum hpa ni hpe jaw lu na ahkyak ai.Du sa ladaw hta anhte Wenyi hkum hkrang lam amyu myu hte lajang da saga ai.Shi du sa wa ai shaloi tinang lajangda ai lam hpe jaw lu na matu anhte pat ai myit masin salum ni hpe hpaw nna Madu Yesu hpe hkap tau la lu hkra shakut ga.

Madu Yesu anhte hpe hkrit kaw na hkye hkrang la na matu,mara kaw na hkye la na matu anhte kaw du sa wa na re.Dai hpe myit dum let, kaja ai lam teng man ai lam,hkye hkrang la ai lam hpe galaw shakut ga.N mai hkrit ai,Kabu gara ra ai nga nna dai ni na kabu gara ai shiga hta sharin ya nga ai re.Lahkawng hta, Madu Yesu anhte a asak aprat hta,anhte a Masin salum anhte Dum nta de sa wa ai shaloi shi hpe hkap tau la lu na matu,shi hpe kumhpa jaw lu na matu, malu masha jaw sha lu na matu myit masin hpe hpaw da let jin jin rai nga ga ngu n-gun jaw dat mayu nngai.

Wajau Peter Bunghku Lawt Naw 

(December 24 ya shana na ,Myitkyina Jau Giwang,yup tung Missa Hkunga hta htawn tsun ai Mungga)