Machyi Masha Ni Hpe Yu Gawn Ai Lam Hta Myit Rawng,Myit Ra Lata N-na Nmai Galaw Ai Lam

   Lai wa sai laban shani, “Madu A Lamu Kasa Akyu Hpyi” ten, San Peter pa hta Wa Sarabyin Francis, Yesu Madu a shamai shatsai magam lam ni hpe sumru woi da ai.

  San Peter a kani hpe shamai shatsai ai gaw Madu Yesu a mau hpa shamai shatsai ya ai lam rai nga ai. San Marku a Kabu Gara Shiga hte maren, Madu Yesu gaw machyi masha a makau de sa nna, shi a lata hpe jum let machyi taw nga ai yupra kaw nna sharawt la wu ai.

  Shamai shatsai ya nna mai tsai wa ai hpang hkam sha wa ai lam hpe mung Chyum Laika hta tsun da ai. Shinggyim masha mara machyi mai wa ai hte mi na raw re ai hkum hkrang hte asak hpe bai hkam la lu wa ai hte kaga masha ni hpe daw jau chye ai. Daw jau ai ngu ai hta tinang hkum a matu n rai ai sha masha kaga ni hpe daw jau ai hpe tsun ai. Dai zawn re ai masha gaw kaja wa sha bai hkam ja wa ai lam hpe madun ai kumla rai nga ai.

Machyi kaba hkrum ai ni a ntsa Madu Yesu a laklai tsawra myit

  Peter a kani hpe shamai shatsai ya ai shani a shawng shani gaw  laban shani rai nga ai. Mare masha ni Yesu kaw shanhte hte rau machyi masha ni hpe woi sa wa ma ai. Kabu Gara Shiga Laika shawng daw hta Yesu Madu du sa wa ai gaw myit masin wenyi hta machyi ai ni hte yu yak jam hkrum masha ni hpe tsawra myit kaba hte yu lakawn ai lam tsun da ai.

  Sape ni gaw Yesu Madu a mau hpa lamik kumla ni hpe myi chyaw mu lu ai sakse ni rai ma ai. Gara hku mi rai rai, Yesu shanhte hpe spectators ni tai na matu gaw myit mada tawn da ai lam gaw n nga ai. Raitim, shi a sasana magam hpe garan gachyan na matu gaw shanhte hpe saw shaga ai rai nga ai. “Machyi masha ni hpe shamai shatsai ya na hte sadan ni hpe gawt shapraw kau lu ai hpung dagu atsam shanhte hpe jaw ya wu ai.”

  Dai Majaw Machyi Makaw Hkrum Ai Ni Hpe Yu Lakawn Ai Gaw Nawku Hpung A Sasana Hta Ahkyak Ai Daw Lawm Ai.Nawku hpung a matu, machyi ai ni hpe yu lakawn ai gaw kam ai shaloi she galaw na matu n rai nga hpe anhte hpe sharin shaga nga ai. Du na February 11 ya shani hpe “World Day of the Sick” “Mungkan Machyi Masha Ni Nhtoi” masat na matu san da ai lam tsun da ai.

  Ndai zawn masat ai gaw nawku hpung a ahkyak ai dai sasana lam rai nga ai machyi masha ni hpe yu lakawn na lam daini na nhtoi ni hta ra ahkyak kaba mung rai nga ai. Ya aten chyam bra nga ai coronavirus ana zingli tsin-yam mahkrum madup kaba nga sai rai nna magam bungli langai hku nna mung anhte ni machyi masha ni hpe yu lakawng ra ga ai rai nga ai. Dai gaw shinggyim sari manu hpe shatsaw ai rai nga ai. Anhte a hten run mat chye ai lam hpe mung shadum nga ai.

  Machyi hkam sha nga ai ni hpe tsawra myit hte yu lakawng na lit mung nga ga ai. Yesu Madu gaw ru yak jam jau hkrum ra ai hte seng ai ga san a mahtai hpe sang lang htai dan ai lam n galaw ai. Raitim, Shi a tsawra myit kaba hte machyi masha kaw sa du ai, shi hte rau nga ai, lata hpe jum nna sharawt la ai. Tsun mayu ai gaw, Peter a kani hpe zawn shamai shatsai ya ai hpe tsun ai rai nga ai. Karai a Kasha Yesu gaw shagrit shanem ai hte anhte hpe yu lakawn nga ai. Lahta kaw nna lawu de yu reng ai hku n re ai, tsan tsan kaw nna sha yu lakawn ai lam n re ai. Ni htep dik htum ai shara hta nga nna si mani ai hte matsan dum myit kaba hte yu lakawng taw nga ai.

  Hpang jahtum mungga hta dai shani hti ang ai chyum mungga gaw matsan mayan ni hte jam jau hkrum, machyi hkrum nga ai ni a ntsa Yesu a tsawra matsan dum yu lakawn ai lam anga nga ai; Kawa Karai Kasang hte matut mahkai nga ai zawn sha rai nga ai; Yesu Madu jahpawt jau jau rawt nna simsa ai shara de sa nna akyu hpyi ai; ndai gaw Yesu Madu Shi a sasana magam- daw jau magam, mungga hkaw ai magam, shamai shatsai ya ai magam ni hpe akyu hpyi ai kaw nna hkam la lu ai hpe madun dan nga ai.

Source; Vatican news