Lusha Gam Ladaw Gaw Karai Kasang Hpang De Nhtang Wa Ai Hkrun Lam Re

February 17, bat masum ya shani, San Peter Nawku Htingnu kaba hta wan wu chya Misa Hkungga hpe Wa Sarabyin Francis woi awn nawng jau lai wa ai rai nna, Lusha Gam Ladaw gaw Kawa, Kasha, Chyoi Pra ai Wenyi Karai Kasang hpang de nhtang wa ai hkrun lam re ngu Hkristan masha ni hpe shadum n gun jaw da ai.

Nawku Hpung masha ni a matu Lusha Gam Ladaw hkrun lam hpang wa saga ai. Hpu nau ni hpe grau grau tsawra na aten hte ahkaw ahkang lu ai ladaw rai nga ai. Anhte a masin salum hte anhte a hkum hkrang wenyi myit masin yawng hte Shi hpang de sa wa na matu Karai Kasang anhte hpe saw shaga nga ai.

Anhte hkawm sa nga ai lam hpe sawn dinglik na aten rai sai hte maren, nga yawng nga pra gaw Karai Kasang hta shanu shabyi machyu nga ai hpe dum hprang let Shi hte hku hkau nga lu ai lam hpe tam sa wa ga. Dai lam gaw anhte hpe Karai Kasang hpang de du shangun na re.

Ndai Lusha Gam Ladaw gaw Hkristan masha ni mayam prat kaw nna lawt lu ai de hkawm sa ai ladaw rai nga ai.

Rawt jat galu kaba wa saga ai ni anhte gaw n kaja ai kyang lailen sat lawat  dingsa ni hte myit ningshut, myit e hkalem ai lam ni hta hkawm sa na matu gunglau hkrum chye ga ai. Anhte kade lang shut hpyit ga ai raitim, Karai Mungga hpe tam chye ai ni a matu gaw dingman dinghpring ai lam hpe bai mu tam la lu na ga ai.

Wan Gam Ladaw hta shawng lahkam ai lahkam gaw Kawa Karai Kasang hpang de gayin wa ai lam rai nga ai. Mara Raw Sakramentu Chyeju Kumla hpe hkam la ai gaw Karai Kasang hpang de gayin wa ai lam nan rai nga ai. Kawa Karai Kasang a mara dat hkyamsa ya ai gaw anhte a shut hpyi ai lam hpe jahkring kau let Shi hpang de bai gayin wa ai rai nga ai.

Bai, Anhte ni Yesu Madu hpang de gayin wa ra ga ai. Shamai shatsai hkrum, Manggang ana kap masha zawn Yesu hpang de nhtang wa nna shi hpe chyeju dum chye ra ga ai. Anhte a machyi ana ni hpe Shi kaw madun dan ra ga ai. “Yesu Madu e, mara lu ai wa ngai myit yawn myit malai let nang kaw sa du nngai.Nang gaw tsi sara rai ndai. Nang gaw ngai hpe shamai shatsai shalawt dat ya lu ai wa, nye a masin salum hpe mung tsi tsi ya lu ai wa rai ndai.”

Anhte gaw Chyoi Pra ai Wenyi hpang de gayin wa na matu mung saw saga hkrum ga ai. Wan wu hpe anhte a baw hta chya ya ai/ gabun ya ai gaw anhte ni ga yun kaw na tai wa ai ni rai ga ai hpe shadum ya ai. Raitim, dai ga yun kaw na tai wa ai anhte a asak hpe Karai Kasang a Wenyi hte gawut bang da ya ai rai nga ai.

Anhte ni Karai Kasang hpang de gayin wa ai lam gaw anhte ni galaw shatup lu ai re; hpa majaw nga yang Karai Kasang mahtang anhte hpang de shawng sa wa ai majaw rai nga ai; Yesu Madu anhte a mara hte si hkrung si htan lam hpe ahpum pawn la ya ai; dai majaw anhte a hkrun lam gaw Yesu Madu a lata hte anhte hpe lam woi la na matu Shi hta anhte a prat hpe ap ya ai lam rai nga ai.

Karai Kasang anhte hpe saw saga ai hpe bai htang ai lam gaw myit kraw lawang kata kaw nna nan myit malai majing hte galai shai lam hpe shadan shadawn ai magam ni rai nga ai.

Lusha Gam Ladaw gaw Karai Kasang hte hpu nau ni hpang de hkawm sa ai hkrun lam rai nga ai hpe shadum ya nga ai. Lusha Gam Ladaw gaw kaga masha ni hpang de shagrit shanem let yu sa ai lam rai nga ai. Hkyehkrang la lam gaw hpung shingkang arawng sadang hte lung wa ai lam n re ai sha, tsawra ai hte yu sa ai lam she rai nga ai hpe chye na hkawn hkrang da ra ai.

Anhte kade lang shut kataw ga ai raitim, Madu Yesu a wudang hpai ai lam hte aten shagu hkawm sa lawm lu ga ai. Shi nni nkri hkam ningma ni hte shagrit shanem ai lam ni hpe sung sung myit sumru let shi hpang hkan nang lu ga ai.

Shi a ningma ni hpe apup ai a marang e, prat hta machyi kaba ai ana ni hpe matsan dum tsawra myit kaba hte shamai shatsai ya na matu Karai Kasang anhte hpe ala nga ai hpe dum chye wa ga ai.

Vatican Shiga Dap kaw nna ndau da ai, February 17, bat masum ya shani na Wan wu chya Misa Hkungga hta Wa Sarabyin Francis hkaw tsun ai mungga rai nga ai.

Translated by Fr. Patrick Gawmaw Hkawng Yae

https://www.vaticannews.va/en/pope/news/2021-02/pope-francis-ash-wednesday-mass-lent-return-god.html