Lai wa sai Laban (2/7/2023) shani na Wa Sarabyin Francis A Mungga 05 July 2023

online image

Lai wa sai Laban (2/7/2023) shani na Wa Sarabyin Francis A Mungga

Kaga Masha Ni Tsun Ai (Hpaji Jaw Ai ) Ga Hpe Madat Ai A Marang E, MangHkang Byin Pru Na Lam Hpe Koi Gam Lu Ai nga nna, Wa Sarabyin Francis Tsun dat nga ai shiga.

“Anhte ni dawdan hparan ai lam ni hpe galaw sana nga yang, kaga masha ni chye na lu ai hte, hkap la wa lu na matu akyu hpyi ai hte Chyoi pra wenyi Karai hpe saw shaga ai lam hpe galaw ai gaw kaja ai lam langai rai nga ai” nga nna Wa Sarabyin Francis tsun lai wa ai.

Lai wa sai Laban shani Angelus kaw na Wa Sarabyin Francis tsun ai mungga gaw Mahte a kabu gara shiga hta na rai nga ai. “ Myihtoi a myiman hpe tau nna myihtoi hpe hkap hkalum la ai wa gaw, myihtoi a shabrai lu la na ru ai; dinghpring ai wa a myiman hpe tau nna, dinghpringg ai wa hpe hkap hkalum la ai wa gaw, dinghpring ai wa a shabrai lu la na ru ai” (Mahte 10 : 41)

Seint. Peter Square hta sa du hpawng chyawng nga ai kam sham ai kashu kasha ni hpe “Ya prat hta gaw, Karai Kasang lata san da ai, myihtoi ni hpe hkap hkalum la ra ai lam hpe Wa Sarabyin Shadum jahprang tsun lai wa sai mung rai nga ai.

Tsawra ai nu wa, hpu nau ni e, anhte marai hkum ngau shagu gaw Karai Kasang a lata la hkrum ai Myihtoi ni hkrai rai nga ga ai. Kashin kamung Hkam la ngut ai hpang, anhte marai hkum shagu gaw, Karai Kasang kaw na “Myihtoi” ngu ai magam bungli kumhpa ngu ai hpe hkap la sai ni hkrai rai nga ai.

 “Myihtoi” langai gaw Chyoi Pra Ai Wenyi Karai a Up hkang matsun ai n’pu hta ya na prat masa, byin wa na masa mahkra hpe chye nna, karum shingtau ai wa rai nga ai. Anhte galaw sa wa na myit nyan marai hte  yaw shada ai lam ni hpe chye na wa na matu hte, Chyoi Pra Ai Wenyi a ra sharawng ai lam byin pru wa hkra karum shingtau lam madun ai wa rai nga ai lam” hpe Wa Sarabyin Francis kawn nna tsun dan lai wa ai.

“Myihtoi” ngu ai wa gaw Madu Yesu hpe nchye ai ni hpe Madu Yesu hpang de sa dat ai wa rai nna, Madu Yesu sak hkrung hkawm sa lai wa sai lam ni hte Shi anhte hpe myit yaw shada nna gawgap sa wa na prat hkrung lam ma hkra hpe chye na wa hkra, karum shingtau ai wa, sakse hkam ai wa rai nga ai.

Anhte marai hkum shagu gaw Karai Kasang lata san da ai “Myihtoi”, Madu Yesu a lam sakse hkam ai ni hkrai rai nga ga ai. Madu Yesu gaw shi a n-gaw n-wai tsawra myit hte lakawn lanawn ai sakse ni hta Kawa Karai a Hpung Shingkangg hpe shadan shadawng nga ai zawn, Anhte ni mung Madu Yesu a nhtoi, hkum dawshan ni hkrai rai nga ga ai.

Kam Sham ai Kashu Kasha ni hpe “ Madu Yesu jaw ya ai Chyeju Nhtoi kaw na hkam la lu ai , anhte a chyeju nhtoi ni hte kaga masha ni prat hta htoi tu wa hkra karum shingtau ai hte Madu Yesu a lam sakse hkam nga ga” nga nna Wa Sarabyin Francis gaw shadum jahprang ai hte tinang hkum hpe san dinglik yu na lam tsun lai wa sai.

“ Ngai mung nye hkum ngai san dinglik yu nga ai. Ngai gaw Madu Yesu a lam sakse hkam ai wa rai nga ai Kun? shingnrai , dai hku tsun ai lam ; nye hkum hpe ngai hkrai daw dan la taw ai wa rai kun? Nye a prat hta Madu Yesu hpe sakse hkam ai lam hpe  nanhte kara hku, mu mada nga ai kun? nga nna Wa Sarabyin tsun lai wa ai.

Masha shagu madat mara hkan nang hkan sa nga ga.

Wa Sarabyin Francis gaw “ Madu a kabu gara shiga hkaw tsun ai , Myihtoi ni hpe hkap hkalum la ai lam hpe galoi mung galaw lu na matu, Karai Kasang kaw akyu hpyi da nga ai” nga nna mung tsun dan lai wa sai.

Madu a kabu gara shiga hpe hkam la taw nga ai kam sham ai kashu kasha ni e, tinang nga ai mungdan, tinang nga ai mare, tinang galaw ai magam bungli lam shagu hta hkrum zup nga ai masha shagu hpe, langai the langai hkau chyap nna, kabu gara ai hte hkap hkalum karum shingtau la hkat ai lam gaw ahkyak dik ai lam langai rai nga ai.

Ndai lam ni gaw anhte ni a dinghku kata, Sasana galaw ai lam, Nawku hpung shingwang kata, Ginwang kata, nawku jawng ni hte masha wuhpung wuhpawng shagu hta sha n -ga, kaga shara hkan du hkra ...shada da karum shingtau hkat ai lam ni hpe galaw nan galaw ra ai magam bungli langai re ai lam hpe mung Wa Sarabyin Francis gaw tsun sang lang dan lai wa sai.

Chyoi Pra Ai Wenyi Karai gaw, kam sham ai, dinghpring san seng ai masha shagu hpe ‘Myihtoi’ ngu ai chyeju kumhpa karan jaw nga ai hpe chye nga ga. Dai majaw, ndai lam ni hpe masha shagu madat mara hkap la ai lam gaw grau kaja ai lam rai nga ai lam hpe Wa Sarabyin tsun dan lai wa ai.

Ga Shadawn : ahkyak dik ai dawdan hparang ai lam hpe galaw wa sa na nga yang, shawng nnan gaw akyu hpyi ai hte Chyoi Pra Wenyi Karai hpe shawng ap nawng da ra nga ai. Masha shagu kaw gaw kaji htum ai mi raitimung, nmu mada ai lam mi rai tim “ Karai Kasang kaw na lu la ai “myihtoi” chyeju kumhpa” lu da ai ni hkrai rai nga ai.Dai majaw anhte shada da tsun shaga ai lam ni hta atsawm sha madat mara let, shada karum shingtau hkat ai la, dawdan hparang hkat ai ndai lam ni hpe galoi mung galaw nga ga” nga nna, Wa Sarabyin tsun lai wa sai.

“Anhte Hkristan Hpung masha ni gaw “ kaga masha ni hpe atsawm sha hkap hkalum shaga ai lam ni galaw nga ga ai. Dai lam ni hta, dai kaga masha ni anhte hpe atsawm akawm nga nna shaga ai majaw anhte shaga ai nre ai sha, shanhte atsawm n shaga tim anhte kawn nna tsawra myit madun ai hte hkap hkalum ai lam galaw nga ga. Ding re nna lu galaw ai lam gaw, anhte ni... Karai Kasang kaw na chyeju kumhpa langai hpe hkam la da ai lam ngu nna hkap la kam sham nga ga” nga nna Wa Sarabyin gaw saw shaga nga ai.

Dai majaw, “shada da manghkang byin pru wa na masa shagu kaw na lawt kawt, koi yen kau lu na matu, shada da chye na hkat ai hte masha wa a myit hpe mung chye na ya ai hte, langai hte langai, shada da tsawra ai hte madat mara karum shingtau hkat nga ga”nga nna Wa Sarabyin tsun shadum lai wa sai.

https://www.vaticannews.va/en/pope/news/2023-07/pope-angelus-catechesis-...

Add new comment

3 + 0 =