Tsawra ai Nu Wa Hpu Nau ni, ya dai ni na prat hta, Laban shani Nawku Jawng sa ra ai hpe ahkyak n shadu ai hpung masha ni grai law nga ma ai.Chye nga ninglen, Lagawn ai majaw, bungli law ai hpe jahpai nna Nawku Jawng n sa ai ni mung law law re. Ya ten Mungkan ting hta byin nga ai masha shada kap bra chye ai COVID-19 ana a majaw masha hpawng nmai galaw ai hte Laban Nawku Hpawng ni hpe mung pat da ra nga ga ai.Dai majaw “Laban Shani Nawku Jawng nsa yang mara lu na kun” ngu ai lam hte seng nna Wa Jau John Galang La Raw tang madun da ai lam hpe garan ya dat lu ga ai.
LABAN N’HTOI A LAM
Chyum Laika Ga Shaka Dingsa na shawng na Npawt Nhpang Laika hta, Karai Kasang gaw Lamu ga Jan Shata Sha- gan ni, Lamu ntsa na U ni, Hka kata na Nga ni, ga ntsa na Dusat Dumyeng ni hte, Shing-gyim masha ni yawng hpe Kru ya laman hpan ngut ai hpang, Sanit ya shani hta bansa la nna, dai nhtoi hpe shaman shachyoi shapra ai hte “Chyoi Pra ai nhtoi”masat da lai wa sai re.
Karai Kasang anhte hpe jaw da ai Tara Kanu Lam Shi na nambat Masum hta, "Laban nhtoi Chyoi Pra nga u ga. Amu bung-li ni hpe koi gam kau nna, Nawku amu hta shakut na myit dum u, nga nna ka da nga ai. Bai nna laban shani gaw, Madu Yesu si ai kaw na bai hkrung rawt wa ai nhtoi mung re. Dai majaw, Karai Kasang a kashu kasha Hkristan hpung masha ni a matu, Laban shani ram Chyoi Pra san seng ai, manu dan a, lachyum pru ai, wunli lu ai nhtoi n nga sai.
Ndai laban shani hta Nawku Jawng sa nna, Karai Wa hpe nawku shakawn nna Karai Wa hte ni htep hku hkau lu ai. Missa Hkung ga hta Madu Yesu a Chvoi Pra Hkum hte Sai hpe hkam la nna, Karai Kasang hte langa sha jawm pawng lu ai, Tinang a mara ni hpe hpyi nem tawng ban ai hte jasan jaseng la ai. Tinang a matu, nta masha ni hte manaw manang ni a matu, ra ai akyu chyeju ni hpyi la lu ai. Manaw manang Nawku Hpungg masha ni hte rau myit mang langai sha hte Karai Wa hpe jawm kyu hpyi shakawn lu ai, N dai daram Chyoi Pra san seng akyu lu ai nhtoi nga shalai kau ai, Mare hkan aten shama wam rai nna Nawku Jawng n sa ai sha, nta kaw maioi hkawm ai, sumla hkrung yu hkawm, gat mari hkawm ai, manaw manang ni hte mung jahta shalai kau ai rai yang, anhte ni a matu sum kaba rai na n re i?
LABAN SHANI NAWKU JAWNG SA AI GAW KADE MATU TA?
Maga mi hku nna bai myit yu ga nga yang, Laban shani Nawku Jawng sa kyu hpyi ai lam gaw, anhte a akyu matu sha re. Anhte Nawku Jawng n sa nna, Karai Kasanga Hpung shingkang yawm mat na lam n nga ai. Anhte nawku Jawng sa nna akyu hpyi ai majaw, Karai Kasang a Hpung Shingkang jat wa na lam mung n nga ai. Anhte Nawku Jawng sa sa, n mu Sa sa Karai Kasang kaw akyu yawm wa na la Jat wa na lam n nga ai. Dai majaw, Nawku Jawng sa kyu hpyi ai ngu ai gaw, anhte a akyu matu sha re. Anhte Nawku Jawng sa kyu hpyi yang, anhte akyu lu na. Anhte Nawku Jawng n sa yang, shaman chyeju n lu na rai nga ai. Ka- rai Kasang gaw anhte ni hpe shaman ya mayu ai majaw, anhte ni hpe tsawra ai myit hte La- ban shani Nawku Jawng sa kyu hpyi na matu htet da ai, hkang da ai lam sha rai nga ai. Karai Kasang gaw anhte ni hpe sha- man ya mayu ai majaw tsawra myit hte la- ban Nawku Jawng sa na matu hkang da ai re majaw, anhte ni Nawku Jawng sa kyu hpyi ai shaloi, Karai Kasang hpe chyeju dum tsawra ai myit hte sharawng shara myit mi alawm rai nna Nawku Jawng sa ra ai, kyu hpyi ra ai Nawku Jawng n sa yang, mara lu na tsang ai majaw, Karai Kasang ari dan jaw na hkrit ai majaw, Nawku Jawng sa ai ngu ai gaw n jaw ai myit masa re.
TSA CHYARU LU NNA, HPAIDA DA NNA, LAGAWN AI MAJAW, LABAN NAWKU N SA YANG MARA LU NA KUN?
“Catechism of the Catholic Church” ngu ai Nawku Hpung a makam masham hte seng nna sharin shaga da ai laika buk nambat 2041-2042 hta, Karai Kasang hpe kam sham ai Hkristan Hpung masha rai nga ninglen, lagawn ai majaw, n kam ai majaw, Nawku Jawng n sa ai gaw, mara kaba re nga nna asan sha shadum da nga ai. Karai Kasang jaw da ai Sanit ya nga ai nhtoi hta, bat Langai ya kaw nna bat Kru ya shani du hkra, na a kanbau bungli a matu, prat galu kaba lam a matu aten la mai nga ai, galaw mai nga ai. Nhtoi Sanit ya hta, Laban shani sha, dai Laban shani hta pyi Hkying hkum mi daram sha aten la nna, Nawku Jawng sa lawm nna, daw jau na aten nlu jaw ai nga yang gaw, anhte ni Karai Kasang hpe chye ju ndum ai ga re. Dai hta grau nna, Laban Nawku sa na gaw aten n lu jaw tim, pyaw hkawm sa na gaw aten jaw ai, Tsa Chyaru Ka-ni lu, Hpaida da hkaw ai gaw Karai Kasang shachyoi shapra da ai Laban shani hpe, awu asin di ai hte bung wa na rai nga ai.
LABAN SHANI NAWKU JAWNG N SA TIM N RA AI, TINANG NGA AI SHARA KAW KYU HPYI YANG MAI NA KUN?
Anhte hpung masha ni n-kau mi mung myit chye nga ai, Laban shani Nawku Jawng n sa tim, bungli n galaw, Mara galaw ai hku nga yang rai sai nga nna, chye tsun, chye myit la ma ai. Dai lam ni gaw shut ai re. Laban shani Nawku Jawng n sa ai majaw, Mara lu sai. La-ban shani hta Nawku Jawng sa tim mai nga ninglen,
Nawku Jawng n sa ai sha tinang nga ai shara kaw kyu hpyi ai ngu ai gaw, n-jaw amu re. Nang hkrai na a nta gawk kaw na shing nrai, sun hkauna kaw, nam kata kade na hkra myit lawm ai hte akyu hpyi lu na kun?. Akyu hpyi ai ngu ai hta mung tinang hkrai hpyi ai hte. masha law law hte myit hkrum myit ra rau jawm hpyi ai gaw shai nga ai. Mahte a laika 18:20 hta, "Nanhte marai Lahkawng Masum nye a Mying Ningsang hte jawm hpawng, jawm hpyi ai rai yang, nanhte a lapran e ngai nga nna, nanhte hpyi ai hpe madat ya na,
nga nna Madu Yesu htet da nga ai.
Nawku Hpung a makam masham hte seng nna sharin shaga da ai laika buk nam- bat 2181 hta, Hkum n ngwi n pyaw machyi hkrum ai ni, machvi makaw sak kaba ai ni hte ma ni hpe yu mada ai ni, bai nna tinanga dum nta, sun hkau na hta nta masha langai sin yang, lagut lagu hkrum, Dumsu ni shang sha hkrum na hkrit tsang ra ai majaw, nta sin, sun sin ra ai ni gaw, Nawku hpawng nsa tim n-ra ai. Raitim ndai ni gaw, tinang nga ai shara kaw, mai byin ai aten hpe la nna Karai Kasang hpe myit dum kyu hpyi ra ai nga nna Nawku Hpung sharin ya nga ai re.
Ya ten Mungkan ting hta byin nga ai masha shada kap bra chye ai Corona ana zinli zawn re ai manghkang ni a majaw masha hpawng n mai galaw ai aten hta rau jawm Nawku daw jau ai lam n mai galaw ai re majaw ndai zawn re ai ten hta Nawku Jawng nsa ai gaw mara lu ai ngu hkam la nmai nga ai.Anhte hpe Karai Kasang gaw, chye myit ai bawnu nyan marai bang da ya ai re majaw dai hpe jai lang nna ana zinli nkap hkra tinang hkum tinang makawp maga la chye ra nga ga ai.Dai hta n-ga, ndai zawn yawng hte seng ai manghkang byin ai shaloi, seng ang ai Mungdan Aasuya hte Nawku hpung kawn masat da ai tara ni hpe hkan nang ra nga ga ai. Mahte ai laika 13:1-2 hta “Mungdan up hkang ai ni a ga hpe madat mara nga mu ga, hpa majaw nga yang, ahkang aya lu ai ni mung, Karai Kasang kaw na ahkaw ahkang hte sha n rai yang n nga, n tsap lu ai. Ahkang aya hte nga nga ai ni hpe mung Karai Kasang e san da manu ai. 2Dai re ai majaw ahkang aya lu ai ni hpe lale ai wa kadai mung, Karai Kasang galaw lajang hkang tawn da sai lam hpe ninghkap ai wa rai nga ai. Dai wa gaw tinang nan tara dara ai hkrum na ra ai.” nga nna shadum da nga ai.Lahta de tsun lai wa sai hte maren, ndai zawn re ai aten hta tinang nga ai shara kaw dum nta masha ni rau Karai Kasang hpe aten jaw let akyu hpyi ai lam ni anhte galaw ra na ga ai.
Sumla : www.jdgivens.com
Add new comment