Kashin Kamun Hkam Yang Npawt Shut Mara Raw Ai Kun?

Anhte Cathalic nawku hpung masha ni hkam ai kashin kamun gaw npawt shut mara raw mat lu ai. Bai Inggalegan ni mung shanhte hkam ai kashin kamun mung npawt shut hpyit mara raw mat ai. Bai kaga hpu nau hpung ni a hkalup hkam ai ni gaw npawt shut mara n raw mat ai majaw anhte cathalic de bai shang jang kashin kamun bai hkam la ra ai nga nna shada da tsun dang rang hkat ai ni na lu ai. Bai anhte cathalic ni kaga hpu nau hpung ni kaw num wa mat ai rai yang hkalup hkam ai lam ni n galaw ra sai nga tim bai hkam ya rai ai mung mu lu nga ai. Ndai lam ni hpe gara gaw jaw ai shut ai lam ni yawng hpe htai sang lang dan ya na matu RVA de hpaji hpyi san dat lu nngai law. Grai chyeju kaba sai. Manmaw saradaw ginwang namlim pa jau aseng mung hkawng san luka nawku jawng wang na hpyen yen dabang hta shanu nga ai Magdalena lasang hkawn ra a ga san hpe htai ya na nngai.
Htai: Kashin kamun Sakramentu hpe Greek ga hku “Baptizein” ngu ai re. Lachyum gaw, hka hta lup tsing ai, hka hta dip shalup ai, ngu ai rai nga ai. Kashin Kamun hkam na wa hpe hka hta lup ai gaw Hkristu the rau lup makoi kau ai hkrum nna shi hte rau hkrung rawt wa ai, jasan jaseng shachyoi shapra ai chyeju hpe hkam la ai lam rai nga ai.

Greek ga hte “Baptizein” jinghpaw hku “Kashin kamun” ngu ai ga si hpe Madu a shaning n du shi ai BC 145 kawn lang taw sai lam, Mormon ngu ai laika buk hta alma ngu ai wa ka da ai hpe sawk sagawn da ma ai. Raitim masha ga si ngu ai hpe hkrak sagawn lu na gaw yak nga ai.
Ga shaka ningnan hta Kashin kamun sakramentu chyeju kumla hte seng nna mu mada lu ai hku shawng shachyan ya ai gaw Yawhan Baptista rai nga ai. Raitim, shi tsun da ai hte maren, shi hpang du sa na wa gaw wenyi hte kashin kamun jaw na ra ai nga tsun da nga ai. Dai Wa gaw Yesu Madu nan rai nga ai.
Anhte Jinghpaw Wunpawng myu sha ni hta ndai “kashin kamun”, ngu ai hte “Hka lup hkam ai” ngu ai ga si a majaw myit um ang, n chye na ai grai naw law nga ai hpe mu lu ai. Shi a ga madung hpe yu yu ga. Greek ga si “βαπτισμος” kaw na yu hkrat wa ai hpe English ga hku “Baptism” ngu ai ga rai nga ai. Shi a lachyum gaw, hka kaw dip lup ai ngu ai lachyum rai nga ai. Dai hka hta dip lup ai ngu ai a lachyum naw nga nga ai. Hka hta tsing ai, lup ai ngu ai gaw hkum hta na n san n seng ai maza ni hpe kashin kau ai ngu ai lachyum rai nga ai. Anhte lang ai ga si hta sha hkan mat ai rai nga ai. Lachyum gaw maren sha rai nga mali ai.
Anhte Jinghpaw ga si hte tsun ga ai “Hkalup hkam ai” Kashin Kamun hkam ai” ngu ai a lachyum gaw hpa hpe tsun ai rai ta. Anhte Hkristan masha ni hta na dai ga si a lachyum hpe hkrak n chye ai ni law law naw nga na ma ai. Grau nna gaw dai ga si e lachyum shalen ai sung grau ai lachyum hpe n chye ai ni grau law nga ma ai. “Hkalup hkam ai” a lachyum mung, “Kashin Kamun hkam ai” a lachyum mung gaw mara hpe kashin kau ya ai lachyum rai nga ai. Dai zawn kashin kau ya ai mung Yawhan a mying hte n rai nga ai; Kawa, Kasha, Chyoi Pra ai Wenyi a mying ningsang hta she rai nga ai; Hkam la ai hta loi li shai hkat mat ai gaw nga na kun?
Anhte Kahtawlik makam hta gaw Kashin Kamun Sakramentu Chyeju kumla hkam la jang “npawt shut hpyi mara raw dat hkam sha hkam la ai, chye myit chye mang sai, shut hpyi mara re, n kaja ai lam re ngu chye na sai asak aprat kaw hkam ai ni gaw tinang shut hpyi ai mara ni mung raw dat hkam sa hkam la ai, Karai Kasang a Kasha majing ni tai wa ai, Nawku Hpung hta kahpu kanau majing tai wa ai, ngu hkam la ai makam nga nga ai.
By Fr. Patrick Gawmaw Hkawng Yae