Kasa Pawlu Zawn Sha Bu Htawt Hkawm Tsin Yam Hkrum Masha Ni Hpe Manam Daw Jau Hkalum Hkap Tau La Ga, Nga Nna Wa Sarabyin Tsun

Bu htawt hkawm masha ni hte Wa Sarabyin hkrum nga yang / Vatican News

Sasana hkrun lam hkawm sa nga ai Kasa Pawlu, Malta zinlawng hta sang hpaw hten nna jam jau hkrum nga ai aten, jam jau hkrum nga ai Kasa Pawlu hte shi a manang ni hpe Malta zinlawng na masha ni hkap garum la lai wa ma ai zawn sha,  bu htawt hkawm tsin yam hkrum masha ni hpe manam daw jau hkalum hkap tau la lam ni jaw ya ga, nga nna Wa Sarabyin Francis tsun dat nga ai.

Jaunuary 22 bat masum ya shani, San Peter pa kaba hta du hpawng nga ai shawa hpawng kaba hpe sharin shaga lam galaw ai hta ya na zawn Wa Sarabyin tsun dat ai lam rai nga ai.

Wa Sarabyin tsun ai hta, “manam hkalum hkap tau la chye ai myit lai masa ni anhte hta grau rawt jat wa hkra shakut ra ga ai. Grau htap htuk ai prat masa hpe lu la na myit mada let rawt pru wa ai bu htawt hkawm tsin yam hkrum masha ni hpe grau nna hkap hkalum manam daw ai lam ni jaw ya ra ga ai” nga nna Wa Sarabyin tsun dat nga ai.

Kasa laika hta mu mada ai, Sanghpaw li ni hte Kasa Pawlu Sasana hkrun lam hkawm sa nga ai aten, Malta zinlawng makau hta Sanghpaw li hten nna jam jau hkrum nga ai aten Malta zinglawng na masha ni Kasa Pawlu hte shi a manaw manang ni hpe hkap garum shingtau la ai mabyin hpe tsun madi madun let Wa Sarabyin matut tsun ai hta, “dai ni na aten kalang bai Kasa Pawlu jam jau hkrum lai wa ai ndai pang lai hta, lai rap nga ai masha ni hkrit tsang hpa jam jau lam ni bai hkrum nga ma ai, kasat gala majan mang hkang lam ni, matsan chyaren re ai lam ni, adip arip di hkrum ai lam ni kaw nna lawt lu hkra hprawng pru wa ai mungkan jut shara shagu na masha ni, ndai pang lai hpe sanghpaw li kaji ni hte lai rap di lu hkra shakut nga ma ai aten jam jau lam ni law law hkrum nga ma ai, shanhte a sanghpaw li ni hpe gingau de kap jahkring na ahkang njaw ai sha pang lai de bai gau ging wa shangun ai lam ni a majaw tsin yam lam ni law law hkrum nga ma ai, dai re majaw dai ni na anhte a uhpung uhpawng hta manam ni hpe hkap hkalum hkap dau jaw chye ai myit masa ni rawt jat nga wa hkra galaw na ra nga ai. Grau nna jam jau hkrum nga ai masha ni hpe hkap lakawn garum la lam ni galaw let grau shinggyim jet ai masha ni, jet ai Madu Yesu sape ni, gahkyin gumdin ai Hkristian ni byin tai hkra jawm shakut ga” nga nna San Peter pa kaba hta hpawng nga ai shawa hpawng kaba hpe Wa sarabyin Francis tsun shadut dat nga ai lam Vatican shiga dap kaw nna shana dat nga ai.       

Source : Vatican News

Add new comment

12 + 5 =