Karai Kasang A Matsan Dum Ai Myit Hpe Lu La Na Matu

Karai Kasang A Matsan Dum Ai Myit Hpe Lu La Na Matu

Anhte Shani shagu nlaw htum lahkawng lang daram prat hpe mada sawn yu nna shatsawm chye ga ai. Prat hpe mada yu ai shaloi tinang a myi man hpe mu ga ai. Dai mu mada ai myi man gaw ajet n rai nga ai.

Raitim, prat hta, shi hpe mada yu ai wa a myi man hpe asan sha wan htawng madi madun lu ai atsam rawng nga ai. Dai rai nna prat hta mu mada ai na a myi man, hkum hkrang hte nang gaw langai sha rai nga ai.

Yesu hpe anhte mada yu ai shaloi Kawa karai Kasang a myi man hpe nan anhte mu mada ga ai. Shi hte Kawa gaw langai sha rai nga ai.

“Ngai hte nye Wa gaw langai sha rai nga ai,” nga ai (Yawhan Laika 10:30) “Ngai nanhte hte nde nlaw wa nga nga sati mung, nang ngai hpe n chye nni? Ngai hpe mu yu ai wa gaw, Wa hpe mu yu nu ai, dai re ai mi, Wa hpe anhte e, madun mi, nga nna hpa rai tsun nta? nga nna Yesu Philipi hpe tsun da sai " (Yawhan laika 14:9)

 Yesu hte hkrum zup yu sai masha shagu gaw Kawa a tsawra myit hpe mu la, hkam la lu nga ai.Yesu gaw, Kawa karai Kasang a matsan dum ai myi man re. Dai gaw Hkristan makam masham a mung sung lam rai nga ai.

 Shi gaw Kawa shangun dat ai n gaw n wai matsan dum ai Hkye la Madu rai nga ai.Karai Kasang shanhte hpe hkye la ai gaw tsawra ai hte n gaw n wai matsan dum ai majaw rai nga ai. Shi a matsan dum ai myit kaba a majaw, Shi hte anhte matut mahkai lu ai hte hkrum zup lu ga ai.

Karai Kasang a matsan dum ai gaw, Kasha shingtai Yesu hta dik wa sai. Yesu gaw shi a ga, amu magam hte asak hkrung lam mahkra hta Kawa Karai Kasang a matsan dum ai myit hpe ta tut hkrang shapraw ya sai. Shi hpe kam sham ai hte Kawa a myit ra ai lam hpe hkan shatup ai ni nlang hte hpe dinghta ga ntsa e asak hkrung chyeju ra mara hpe jaw ya nna, hpang na prat hta mung htani htana asak jaw ya na re lam hpe aja awa sharin shaga ya sai.

Ndai mau hpa hkye hkrang la ai mung sung lam ni hpe sumru yu nna hkan sa shatup ai a marang, kawa karai Kasang a tsawra matsan dum ai chyeju amu magam hpe anhte a prat hta mung teng teng mu mada hkam sha lu na rai nga ai.

Kawa Karai Kasang a tsawra matsan dum ai hpe hkam la sai kasha yawng gaw, chyeju dum ai myit hte dai lam ni hpe sakse hkam ra ai.

 “ Shing rai, tawt lai ai bungli a jaw e, anhte chyasi rai nga ga timung, nachying matsan dum chye ai Karai kasang gaw, Shi a tsawra ai myit kaba a marang e anhte hpe tsawra nna, Hkristu hte hpawn jahkrung ma ni ai; chyeju hte sha nanhte hkye hkrang la ai hkrum mani ai, ” (Ephesu Laika 2:4,5)

Shi a chyeju mung masha shagu a ntsa e hta ni htana agrin nga ai (Shakawn Kungdawn laika 136). Chyeju dum chye ai gaw anhte a asak hkrung hkawm sa lam hta tengman ai hte tsawm dik ai makam masham rai nga ai.

Karai Kasang kaw na matsan dum ai hpe ante shawng lu la sai majaw, matsan dum ai hpe hkrang shapraw sa ai ni anhte tai ra ga ai.Karai Kasang Shi a mai kaja ai chyeju ni anhte a ntsa e, n-hpaw n-ya, ru jaw ya sai hpe dum let, kaga masha ni a ntsa e mung, anhte tsawra shawang myit kaba tawn da ra nga ga ai.

Mahta la ai laika

-Matsan Dum Myit by Jau Leo Gopal