Karai Kasang Hpe Ga Sadi Dung Ai Wa Gaw Daw Jau Na Myit Sharawng Awng Ai Nga Nna Wa Sarabyin Tsun Ai

Wa Sarabyin: Karai Kasang Hpe Ga Sadi Dung Ai Wa Gaw Daw Jau Na Myit Sharawng Awng Ai

  September 19, laban ya shani, Madu A Lamu Kasa Akyu Hpyi Ten, Wa Sarabyin Francis, dau jau ai lam hte seng nna sumru woi da nga ai. Karai Kasang e ahpum apup la ai hpe hkam la lu ai anhte ni gaw hpu nau ni hpe daw jau na myit sharawng awng wa ai ngu Wa Sarabyin sharin shaga da nga ai.

  Karai Kasang a myi hta gaw awng dang lam hte hkithkam lam hpe mungkan shinggyim arawng aya, magam bungli ga baw, sut su ai lam ni hte shingdaw ai n rai nga ai; daw jau ai magam hte she shingdaw ya ai rai nga ai; masha langai gade lu mahkawng da ai, lu su ai hpe n yu ai, shi kade ram jaw lu ai hpe she yu ai, ngu Wa Sarabyin Francis shang lang da nga ai.

  Chyum Laika hpe mung dai shani na Kabu Gara Shiga Chyum Laika hpe sha lakap nna sharin shaga da nga ai. Kasa ni a lapran kadai gaw kaba grau ai rai nga nna tsun dang rang hkat ma ai hpe chye ai Yesu gaw shanhte hta na kaba grau mayu ai wa gaw yawng hpe daw jau ra ai, yawng a hpang kaw nga ra ai, sasana ma a myit jasat hpe bang tawn da ra ai;

  Shi hkum nan ndai mungkan ga de du sa ai gaw masha ni hpe yam sha na matu n rai, daw jau na matu, shanhte a matu Shi a asak hpe pyi ap nawng kau na matu du sa ai rai nga ai, ngu sharin shaga da ai hpe Wa Sarabyin Francis sumru woi da nga ai.

  Dai majaw, Yesu a hpang hkan nang mayu ai anhte ni gaw Yesu Madu hkum nan hkawn sa ai daw jau ai magam lam hta hkawm sa ra ai. Karai Kasang hpe anhte ni ga sadi dung ai ngu ai gaw anhte a daw jau mayu ai myit gade daram sharawng awng ai ngu ai hta hkan wa na re. Daw jau magang, Karai Kasang nga nga ai hpe dum chye hkam sha magang rai na re. Hpu nau ni hpe daw jau shagu, Karai Kasang a tsaw ra myit hte hkap ahpum apup la ai hpe bai hkam la lu na rai ga ai.

  Anhte shaga la hkrum ai gaw, Yesu Madu Kasa ni hpe madun dan ai kaji htum ai ma zawn re ai kaji htum ni, ra kadawn ai ni hpe daw jau na matu rai nga ai. Ra kadawn ai ni hpe hkap tau hkap hkalum daw jau ai rai yang Yesu Madu hpe dai wa hta hkap hkalum la ai rai nga ai, ngu Wa Sarabyin Francis matut sharin shaga da nga ai.

  Kabu Kara Shiga Chyum mungga a sharin shaga lam woi lam matsun ai hpe htep lahti rai hkan shatup nga na matu mung Wa Sarabyin anhte hpe saw shaga da nga ai.

  Hpang jahtum mungga ginchyum dat hta, Karai a shagrit shanem ai shangun ma, Chyoi Pra ai Nu Maria gaw, anthe ni daw jau ai magam hta kaji kadun ai ni n tai u ga, daw jau magam hta kaji kadun ai ni hpe grau grau daw jau lu ai ni tai wa lu u ga matu akyu hpyi htinglu htinglai ya nga na hpe kam hpa nga ga, ngu Wa Sarabyin, Nu Maria kaw kam hpa let akyu hpyi htinglu htinglai nga na matu saw shaga da nga ai.

Source:Vatican News

By Fr. Patrick Gawmaw Hkawng Yae

#vaticannews

#rvakachinservice