Karai Kasang gaw hti ndang hkra anhte hpe mara dat ya nga ai nga nna Wa Sarabyin tsun dat ai shiga

Wa sarabyin Francis kawn anhte a myit masin salum hta matsan dum tsawra myit galoi mung rawng nga ra ai, Madu Yesu anhte hpe shi a nhtum nwoi ai tsawra myit hpe madun dan lai wa ai, bai anhte ni Karai Kasang a hti ndang hkra mara raw dat ya ai lam hpe anhte ni matsing da nna hkan sa ra ai lam hpe lai wa sai Laban shini na Missa hta anhte hpe tsun shadum lai wa sai.

Wa sarabyin Francis kawn Christan hpung masha ni hpe Madu Yesu zawn galoi mung tsawra matsan chye dum ai hte  galoi mung mara dat ya hkat na matu tsun shadum lai wa ai.Wa sarabyin kawn St.Peter’s pa kaba hta galaw ai Laban Missa na Mungga hta “Forgiveness”ngu ai mara dat ya hkat ai lam hpe madung da nna Mathew a Kabu gara shiga hpe hti nna tsun lai wa ai hpe chye lu ai.

Kabu gara shiga hta san Petru gaw Madu Yesu hpe “nye kahpu kanau ni ngai a ntsa e bai shut shut rai yang ngai gade lang mara dat ya ra na rai ta?” “Sanit Lang du hkra rai Kun”? ndai lam hpe wa sarabyin gaw Chyum laika hta “Sanit lang” (7) ngu ai gaw grai hpring zup ai nambat langai re ai lam hpe san lang dan ai, dai majaw Petru shi a ga san gaw grai nan chye na ya ai lam rai nga ai.Wa sarabyin kawn Madu Yesu tsun ai hpe anhte ni bai mu hti ai hta “ngai nang hpe Sanit lang hkra sha nrai sanit shi e htam sanit lang du hkra mai rai nga ai ngu nna tsun lai wa ai hpe chye lu ai.

“Madu Yesu gaw Petru hte kasa ni hpe bai tsun ai hta nang masha hpe mara dat ya ai shaloi gade lang rai sai ngu ai hpe n matsing da ai gaw gaja dik ai mara dat ya ai lam rai nga ai”“Wa sarabyin Francis kawn Karai kasang anhte hpe galaw dan lai wa sai Mara dat ya ai lam hpe anhte mung shi zawn galoi mung hkan sa galaw shatup nga ra ai hpe Matsing la na lam langai hku nna tsun lai wa ai.

Wa sarabyin gaw Madu Yesu anhte hpe Karai Kasang gaw shadawn ai lam n nga ai sha mara dat ya nga ai lam hpe a san sha tsun dan lai wa ai.Wa sarabyin kawn Karai Kasang gaw tsawra myit hte manu jahpu nla ai sha anhte hpe shi hkum jaw ya nga ai lam anhte ni chye lu nga ai. “anhte ni shi hpe bai nlu htang ai rai tim anhte ni a kahpu kanau ni hpe mara dat ya ai lam hku” nna shi zawn hkan galaw mai nga ai. Dai majaw Mara dat ya hkat ai lam gaw gaja ai lam rai tim anhte ni lu galaw ai lam nga ai zawn n lu galaw ai lam ni mung nga chye ai.

Wa sarabyin kawn ndai gaw anhte Christan hpung masha ni a matu npawt rudi sat lawat “a fundemental condition” re ai lam tsun lai wa ai. Bai Karai Kasang gaw anhte a matu shi a asak hpe nawng kau ya ai, anhte mung dai madu a tsawra matsan dum ai lam hpe gara hku bai n htang lu na rai.

Karai Kasang jaw da sai tsawra myit hte rau Anhte a makau grup yin hta nga ai masha ni hpe mara dat ya ai hte anhte a prat hpe nnan gaw gap let Karai Kasang a mang hta sak se ni tai mai nga ai lam Wa sarabyin kawn tsun lai wa ai. Mara dat ya ai lam n nga yang anhte hta myit mada shara hte simsa  shara mung nga na lam n mai byin ai hpe matut na tsun lai wa ai.Wa sarabyin kawn “Forgiveness” ngu ai mara dat ya hkat ai lam gaw anhte a wuhpung wuhpawg kata hkan byin nga ai “nju ndawng ai myit pawt sindawng chye ai myit, ana law law hte” shara shagu hkan na nbung hpe maza hku byin taw nga ai prat hpe jahten kau ya mai ai ana ni hpe jasang jaseng kau ya ai “Oxygen” hte bung nga ai lam tsun lai wa ai.

Wa sarabyin kawn kam sham ai kashu kasha ni hpe tinang hkum tinang ahkyak ai ga san ni hpe san yu na matu tsun shadum da nga ai.“Karai Kasang kaw na grau htum ai mara dat ya ai Chyeju hpe ngai lu la nga ai hpe kam nga ai kun?” “Nye hkum ngai mara nlu dat ya ai, masha ni ngai hpe mara ndat ya lu ai ten hta Karai kasang ngai hpe galoi mung mara dat ya na matu jin jin rai nga ai hpe chye na kabu ai hte  ngai kam sham lu nga ai kun?”

Matut nna Wa sarabyin kawn tinang hpe myit machyi shangun ai masha hpe anhte ni mara dat ya lu nga ai kun? Ngu ndai ga san hpe san nga ai.Ndai lam ni hpe anhte a myit hta bang da nna “a small exercise” hpe galaw hpang na matu Wa sarabyin hku nna sharawng nga ai lam tsun lai wa ai.Ya kawn nna anhte ni hpe myit machyi shangun ai masha ni hpe myit sumru yu let mara dat ya lu na matu Karai Kasang kaw na n-gun ahtsam hkam la lu na matu hpyi nga ga. Bai nna Karai Kasang a tsawra myit hte anhte ni mara dat ya hkat nga ga.

Dai lam ni gaw anhte hpe gaja ai lam jaw ya ai hte anhte a kraw salum hta simsa lam jaw ya nga ai hpe Wa sarabyin kawn tsun lai wa ai.Hpang jahtum hku nna Wa sarabyin kawn anhte ni Karai Kasang a chyeju hpe hkam la lu na matu hte shada da mara dat ya lu na matu Matsan dum njin kanu Maria kawn hpyi htinglu htinglai garum ya  na matu kyu hpyi let hpung dim dat lai wa ai hpe chye lu ai.