Karai Kasang Anhte Hpe Jaw Ai Tsawra Myit A Lam Hpe Sharin Hkaja La Nga Ga

Wa Sarabyin Francis gaw lai wa sai Laban shani Missa Hkungga garai n galaw shi yang Madu Yesu tsun ai Tara Kanu Lam Shi hta na ( Great Commandment ) kaba daik ai tara lam ni hpe shawng myit sumru yu nna anhte ni a tsawra myit majing byin tai wa na matu Karai Kasang a tsawra myit hpe shawng hkrum katut lu la yang she mai ai lam re hpe tsun shadum lai wa ai.

Wa Sarabyin Francis kawn lai wa sai Laban Missa hta Mahte a kabu gara shiga laika (Mt: 22: 34-40)  hpe hti nna kaba dik tara kanu lam hpe myit sumru yu lai wa ai. Tara Kanu ni hta na Kaba dik ai Tara gaw hpa rai ta ngu nna san ai hta Madu Yesu bai htai tsun dan ai gaw “Na a Karai Kasang hpe na a myit masin, salum, myit mang mahkra, wenyi hte tsawra ai hte na a htingbu wa hpe mung na a hkum hte maren tsawra u” ngu ai lam re hpe tsun shadum da nga ai.

Wa sarabyin Francis kawn daini na kabu gara shiga gaw daw lahkawng hku na tsun shadum nga ai, langai hta Karai Kasang hpe Tsawra ra ai lam lahkawng hku na Karai Kasang hpe Tsawra ai zawn tinang a htingbu wa hpe mung tinang a hkum hte maren tsawra ra ai lam re ai hpe tsun lai wa ai.

Wa sarabyin Francis kawn “Karai Kasang a tsawra ai lam gaw shawng byin pru ai” hte Karai Kasang gaw anhte hpe Shi a nhtum ai tsawra myit tau nau na galoi mung anhte hpe myit mada ala nga ai lam Madung da na tsun shadum lai wa ai.

Dai majaw anhte a Kashu kasha ni gaw Kanu Kawa ni jaw ai tsawra myit a marang e tsawra chye wa hkra sharin la ai zawn, anhte ni mung Karai Kasang a tsawra myit jaw ya hkrum ai kaw na tsawra chye hkra sharin la ra nga ai lam hpe tsun lai wa ai.

Wa sarabyin kawn “Madu Yesu a Tsawra myit gaw anhte hpe tsawra ai lam hpe chye wa na matu n gun jaw shadut ya ai atsam rai nga ai” nga nna san Paul a laika hta shi mu mada ai lam a lachyum hpe tsun lai wa ai.

Wa sarabyin kawn “anhte hta jet ai Tsawra myit byin pru wa na gaw” “ anhte ni Karai Kasang hte hkrum katut ra ai” “ shi a tsawra myit hta anhte ni asum jaw” ai lam ni nga ra ai hpe tsun shadum da nga ai. “dai majaw anhte ni shi hpe n ning hkap ai sha anhte a myit masin salum hpe shi a matu shani shagu hpaw da nga ga” nga nna tsun lai wa ai.

Lahkawng hta gaw Wa sarabyin kawn Karai Kasang hte anhte a lapran tsawra nga ai tsawra myit zawn anhte a htingbu wa hpe mung tsawra ra ai lam tsun lai wa ai.

Anhte a Kahpu Kanau ni hpe tsawra ai a marang e Karai Kasang a Tsawra myit hpe Pat zawn bai nhtang mu mada nga ai. “Karai Kasang a Tsawra myit hpe anhte kawn na shi hpe garai  nchye shi ai hpu nau ni hpe Tsawra myit a lam hpe chye wa hkra anhte ni tsawra myit madun let kasi tai mai nga ai”.

“Ndai zawn anhte ni zawn gara hku lu tsawra lu na rai” Wa sarabyin kawn tsun shadum nga ai hta “shawng ningnan hta Karai Kasang anhte hpe tsawra ai lam galaw ya sai” “anhte kalang lang ndai hpe hkan sa na galaw na matu nloi nga ai majaw ndai hpe malap kau chye nga ai, rai tim anhte ni rau jawm nna galaw sa wa ga”ngu tsun lai wa ai.

Wa sarabyin Francis kawn jahtum daw e mungga madat ai ni hpe tinang hkum tianang myit sawn sumru yu ai lam galaw na matu ga san (question) nkau hpe jaw da ya lai wa ai.

“Tinang Hkum Tinang Ga San San Yu Ga” “ngai hpe shawng tsawra ai majaw ngai shi hpe chyeju dum nga ai kun?” “Karai Kasang a Tsawra myit hpe ngai hta lu hkam sha nga ai kun?” “ngai gaw chyeju dum chye nga ai kun?” “Ngai gaw shi a tsawra myit hpe sak se tai nga ai kun?” “tinang a Kahpu Kanau ni hpe tsawra na matu ngai hta yak nga ai kun?” ngu ai ndai ga san ni hpe tsun lai wa ai.

Wa sarabyin kawn “anhte a prat shani shagu hta Tara kanu lam shi hta na Tsawra myit hte seng ai Tsawra myit tara hpe hkan sa lu na hte Karai Kasang a tsawra myit hpe anhte ni hkap la chye na matu” “Chyoi Pra Ai Nu Maria Kawn” garum ya nga u ga, ngu tsun let missa hpe shangut lai wa ai.