Kaja Ai Sagu Rem Wa Madu Yesu Gaw Shi A Lata Lahkawng Yan Ladawn Let Anhte Hpe La Nga Ai

Wa Sarabyin Francis kawn “Good Shepherd” Kaja Ai Sagu Rem Wa laban shani na Missa hta  “Madu Yesu gaw nhtum nwai ai tsawra ai myit hte anhte hpe tsawra  nga ai, anhte a matu shi a asak hpe pyi jaw kau ai daram tsawra ai lam hpe tsun shadum lai wa ai. Bai anhte ni kawn Karai Kasang hpang de sit shang na hte anhte a hkum gaw kaja ai sagu rem wa a majaw shakawn kungdawn shagrau sha-a ai hkrum lu na re ai hpe akyu hpyi na lam tsun lai wa ai.

Lai wa sai laban shani San Peter Shawa pa kaba hta du sa ai hpung masha ni hpe dai shani hti ang ai kabu gara shiga hpe hti nna Madu Yesu gaw kaja ai Sagu rem wa rai nga ai lam hpe tsun lai wa ai. Kaja ai sagu rem wa gaw sagu ni a matu shi a asak hpe jaw ya ai lam kahtap nna tsun lai wa ai hpe mu chye lu ai zawn shi mung anhte hpe shi a asak si hkam du hkra tsawra nga ai hte nhtum nwai ai tsawra myit hte tsawra nga ai hpe aja wa tsun shadum lai wa ai.

Wa Sarabyin kawn Madu gaw shi a ten hta sagu ni hpe jahkring jahkra ahkying hku sha nre shani hte shana aten tup sin rem ra ai hpe tsun sang lang lai wa ai. Kaja ai sagu rem wa gaw shi a sagu shagu hpe chye ai rai nna langai mi mat ai rai tim mu hkra hkan tam chye nga ai, shanhte ni a shim lum lam hte ra ai lam hpe galaw ya na matu shi hkum nan dai sagu ni hte rau nga let galaw ya nga ai hpe mung tsun lai wa ai. Madu Yesu gaw sagu wuhpung a matu shi a prat hpe ap nawng ai sha n re shi gaw marai hkum shagu a mying hpe chye nga ai hte anhte ni lam nshe de du mat yang mu hkra bai hkan tam la ai sha n ga, anhte a matu shi a asak ap nawng jaw let htani htani asak hpe jaw ya ai sagu rem wa kaja rai nga ai hpe Wa Sarabyin  tsun lai wa ai. Kaja ai sagu rem wa a nsam hku nna anhte hpe madun dan nga ai hta Karai Kasang gaw anhte hpe lam matsun madun ya ai sha n re sagu hpung ting a baw mung rai nga ai sha n ga, anhte marai hkum shagu gaw shi a prat ting na tsawra myit rai nga ai hte shi a prat hta anhte gaw ahkyak ai, galai n lu ai hte manu dawdan n mai ai ni rai nga ai hpe Wa Sarabyin tsun madi madun lai wa ai. Wa Sarabyin kawn anhte a matu gaja wa shi a asak hpe ap nawng kau ya ai,anhte a matu si ai lam hpe hkam nna bai hkrung rawt wa sai. Hpa majaw nga yang shi anhte hpe tsawra ai hte anhte hkum anhte n mu lu ai kata na tsawm htap ai lam hpe shi mu ya nga ai.

Wa Sarabyin kawn anhte masha law law gaw tinang hkum tinang hpe masha ni gara hku daw dan ya ai, mungkan masha ni gara hku mu ai, tinang a awngdang ai hpe yu nna manu shadan ai hpe yu nna ngai gaw n     hkum zup ai (or) shut taw nga ai ngu mu chye nga ai hpe tsun lai wa ai. Raitim Madu Yesu gaw shi a matu anhte gaw galoi mung manu dan nna hpring zup nga ai hpe tsun lai wa ai. Dai majaw anhte hkum kata kaja wa ngwi pyaw ai hte tinang hkum hpe mu chye lu na , bai nna tinang hkum kata hta Karai Kasang hpe hkap tau hkalum la ra ai hte kaja ai sagu rem wa a tsawra myit lata rau pawn ba shagrau ai hkrum lu na matu tatut hta Karai Kasang hpe akyu hpyi let tam ra ai lam tsun lai wa ai. Kaja wa anhte a prat hta Karai Kasang a nhtum nwai ai tsawra myit gaw anhte ni hpe manu dan ai hte lachyum rawng ai prat hpe jaw ya nga ai hpe kaja wa hkap la nga ai kun? ngu nna tinang hkum tinang san jep yu na matu tsun shadum da nga ai. Ndai lam ni hpe anhte ni akyu hpyi ai, shi hpe nawku hkungga kam sham ai, shi hpe shakawn kungdawn ai hte tatut hta Karai Kasang hpe sit shang akyu hpyi ai hku mai galaw ai hpe tsun lai wa ai. Anhte ni yawng a matu shi a prat hpe ap nawng kau ai hte anhte ni yawng gaw shi a matu grai ahkyak ai hte manu dan ai ni rai nga ai hpe myit dum let anhte mung anhte a prat hta ndai lam ni hpe kaja wa hkan sa shakut ai ni rai yang anhte a prat na secret ni hpe bai mu tam lu na rai nga ai lam hpe tsun let shangut lai wa ai.