JAU SHATAI AI SAKRAMENTU

JAU SHATAI AI SAKRAMENTU

  Ga shaka dingsa prat hta Karai Kasang gaw Aron hpe hkingjawng aya ap ya ai rai nna, shi a hpang, shi a kasha ni, dai hpang shanhte a kasha ni,.... matut manoi dai aya hpe hkam la ma ai. Dai gaw htinggaw langai mi a Sali wunli hte ahkaw ahkang, shing n rai, arawng aya langai mi hku yu hkrat wa ai rai nga ai. Raitim, Ga shaka Ningnan prat hta gaw dai hte n bung sai. Hkristu gaw ladat masa mahkra hpe galai kau sai. Shi gaw masha langai hkrai hpe shi kaw hkan nang na shaga la nhtawm Jau shatai ya ai n rai.

  Dai rai nna “Jau tai ai” gaw masha hkum shagu, dinghkrai shaga la ai lam rai nna, arawng sadang, mying, ru sai, sut su lam, machye machyang,... gara tsang madang hta madung da ai lam mung n nga ai. madu gaw shi ra ai kadai hpe raitim, lata la nna shi a jau aya hpe garan jaw nhtawm, Nawku Hpung hku nna Shi a amyu sha ni hpe “Daw jau” na matu shangun dat wu ai.

  Jau aya hpe garan jaw ai nga ai ga hte maren Hkristu chyu sha Jau daju rai nna, kaga Jau ni yawng gaw shi a Jau aya hta shang lawm ai ni rai nga ai hpe chyeju lu ai. Daw Jau na matu shangun dat ai nga ai hte maren, Jau tai ai wa gaw hpa atsam hte kaning re ai masa hta magam gun na shaga la hkrum ai raitim, daw jau na gaw shi a lit magam nan rai nga ai.

  Hkristu a Jau aya hpe garan hkam la ai hte maren, Jau tai ai wa a yaw shada lam mung, Hkristu a hkyel amagam hpe Hkristu hte rau Hkristu zawn galaw lu na matu, Hkristu hte tut nawng matut mahkai rai ai lam rai nga ai; akyu hpyi ai, Karai a Mungga hkaja ai hte Hkristu a myit masa hte maren asak hkrung nga sa na ahkyak la nga ai.

  Hkristu gaw gaw wudang ntsa e shi a hkum hpe nawng kau ya ai Jau daju rai nga ai hte dai wudang hkungga hpe chyoi pra ai Misa Hkungga hta bai nawng ya ai Jau mung rai nga ai. Jau a magam madung gaw Hkristu a malai Chyoi Pra Hkum shabyin ai, dai tawn ntsa e Hkristu a malai wudang hkunggga hpe bai nawng ya ai, shi tsun ai ga hte galaw ai magam mahkra hpe Hkristu a mying hte shi a amyu sha ni a man e galaw ai lam rai nga ai.

  Dai zawn galaw ai shaloi shi a mying hte n rai, shi hpe shangun dat ai Hkristu a malai shi a myit hte galaw nga ai hpe mung n mai malap ai. Shing rai shi gaw, hpang jahtum shana na daw sha poi hta Yesu galaw ai hte maren galaw nga ai. “ Ngai hpe adum nga na matu, ndai hpe galaw mu,” nga nna Shi a Kasa ni hpe Yesu htet da ai hte maren, Karai a amyu sha ni hpe Mungga hte mung, Hkristu a Hkum shan sai (Chyoi Pra Hkum) hte mung jahkru shakat ya nhtawm, shanhte a lapran ra kadawn nga ai kaga daw jau magam ni hpe matut galaw na matu bai shangun dat ai rai nga ai.

  Dai majaw, Jau tai ai gaw laksan shaga la hkrum ai lam rai nna, Jau a lit magam hpe gun hpai lu na matu mung Karai Kasang kaw na laksan chyeju jaw ai lam rai nga ai. Dai chyeju hpe “Jau shatai Sakramentu” hta jaw ya nga ai. Ndai Sakramentu n nga yang, Yesu a malai n nga na, kaga Sakramentu ni hpe jaw ya na lam mung n nga lu na re. Jau shatai ai Sakramentu gaw hpang jahtum shana na dawsha poi hta Shi a Kasa ni hpe Yesu shaman nna shangun dat ai zawn, Nawku Hpung gaw Shi a kashu kasha ni hta na lata la nna shaman ya nhtawm, Kabu Gara Shiga shachyam shabra na hte  shanhte shada daw jau na matu, Madu a amyu sha ni hpang de shangun dat ai rai nga ai.

  Yesu Shi a Kasa ni hpe shangun dat ai, maren re ai Kabu Gara Shiga shachyam shabra ai magam; Wenyi hta ra kadawn ai lam, bawngban hpaji jaw ai lam, lam madun ai,... hte grau nna Sakramentu ni hpe jaw ya ai; Kashin Kamun, Mara Raw, Chyoi Pra Hkum, Num Hkungran ai hte machyi hkrum ai ni hpe shaman, sau chya ya ai,... yawng hta shi a shara jaw ai, hkum hkrang myit masin mahkra hpe Karai a amyu sha ni a matu jaw ya ai, shi hpe shaga la ai lam gaw shanhte hpe daw jau na matu re ai hpe dum let, Shi lu malu mahkra hpe shi a matu n rai, shanhte a matu tutnawng ap nawng ya ra nga ai.

  Kade wa mauhpa hte hkrit hkungga hpa Sakramentu rai nga a hka! Ndai Sakramentu a marang e, Prat shagu na Nawku Hpung gaw, Shi a Madu hte Sara rai nga ai Hkrsitu a magam hpe matut galaw lu ai hte shi a kashu kasha ni a wenyi hte seng ai ra kadawn lam mahkra hpe yu lajang ya ai rai nga ai.

Ga Shaka Dingsa prat na Jau

  Jau ngu ai gaw, Karai Kasang hte shinggyim masha lapran e htinglu htinglai matut mahkai na matu hkungga nawng jau ai wa rai nga ai. Moi Ga shaka Dingsa prat hta Karai Kasang hpang de hkungga nawng jau ai lam nga ai. Dai hkungga gaw shinggyim masha ni a atsam hte lu la ai U wa yam nga ni hpe shinggyim masha ni a malai hku nna Karai Kasang hpang de nawng jau ya na matu rai nga ai. Dai zawn galaw na masha hpung hpe mung san tawn da ma ai. Aron hte shi a kasha ni gaw Karai Kasang hpe wan nat hkungga nawng jau na matu lata san da nna, chyoi pra ai hpun palawng jahpun ya ai hte namman chya ya nhtawm hkinjawng aya hta shu mshi masha prat dingsa na matu tang shawn da sai (pru 40:12-15; Jaw Jau 8).

  Dai lu la sai ahkawn ahang hte maren Aron hte shi a shadang sha ni gaw, Hkinjawng amu gun let sagu bainam yam nga ni hte namsi nmsaw ni hpe wan nat hkungga shatai nna nawng ya ma ai. Dai hte maren mahku hkungga hte shut hpyit mara ni amatu htingrai htingrai hkungga ni hpe mung nawng ya ma ai.

Aron hte shi a kasha ni hpe garum shingtau na matu Karai Kasang gaw, “Levi” masha ni hpe lata san da ya sai (Bu 28:29) Shanhte gaw sumpan sum a arai ni yawng mayawng hpe yu lajang nna dai sumpan sum hta Israela kashu kasha ni a jaw jau ai amu gun na matu Israel kashu kasha ni hta na shanhte hpe lata la sai (Bu 3: 1-5; 3:8-9).

GA shaka Dingsa prat kaw nna Karai Kasang gaw hkin jawng mungdan hte chyoi pra ai amyu tai na matu tsun da sai (Pru 19:6).

  Aron hte shi a kasha ni hpe hkungga nawng ya na matu Jau aya tang da sai (Bu 1:48-53; Yh 13:33). Hkingjawng shagu gaww Karai Kasang hte seng ai lam hta mara a majaw kumhpaw kumhpa hte shinggyim masha ni a matu hkungga nawng ya na tang da hkrum ai wa rai nga ai (Heb 5:1; Pru 29:1-30). Shanhte gaw Karai Kasang a mungga hpe hkaw tsun na matu hte hkungga nawng akyu hpyi ai a marang e Karai Kasang hte jawm pawng nga ra ai (Mal 2:7-9).

Htani htana Hkingjawng “Melhkisedek”

  Karai Kasang a hkinjawng Melhkisedek gaw muk hte tsabyi ap ya let Karai Kasang hpe shakawn ai hte Abraham hpe shaman ya wu ai. Abraham mung shi lu ai sutgan a htam shi hta na htam mi, hkinjawng Melhkisedek hpe jaw wu ai (Beb 7:1; Npawt 14:18). Melhkisdek gaw, kanu kawa n nga, ahtik labau n lu, nhtoi ladaw n hpang mung, asak aprat htum ai mung n nga ai majaw htani htana Hkinjawng rai nga ai.

Source

#nawkuhpungnasakramentuni

#fr.lazumtushan