Jau Ni, Hkristu Hte Bung Hkra Nga Ga Ngu Wa Sarabyin Saw Shaga Ai Shiga

March 29, bat langai ya shani, Wa Sarabyin Francis, Roma kaw nga ai “the Pontifical Mexican College” na Jau ni hte rau Jau tai jawng ma ni hpe hkrum shaga ai hta daini na prat hta Jau ni a matu hkan shatup ra ai law law nga ai rai nna Madu Karai zawn shanhte a prat hta nga sa ra ai lam, Shi a tsaw ra ai hpe azi yu sumru let sak hkrung ra ai lam, si mani tsawm htap ai lam, prinem htingram ai lam, galung kahkyin gumding ai lam ni gaw dai ni na prat hta grai nan ahkyak nga ai lam shadum n-gun jaw da nga ai.

Lai wa sai 2016 shaning hta Wa Sarabyin Francis Mexico de “Apostolic Visit” hpung kawan lai wa sai rai nna shaning shagu Guadalupe Nu Maria Poi shani hta Vatican Basilica na Guadalupe Nu Maria sumla kaw akyu hpyi let Vatican Nawku Htingnu hta Misa Hkungga nawng jau ai rai nga ai.

Jawng Up Wa Jau Victor Ulises Vasquez Moreno kawn Mexico Mungdan hte America Dan hta matut hkrum hkra nga ai chyam bra ana Covid-19 tsin-yam a lam Wa Sarabyin hpe tsun hkai dan ai lam mung chye lu ai.

Karai Kasang si mani ai hte tsaw ra let yu lakawn nga ai

Daini na aten hta hkan nna hkan shatup ra ai lam law law nga ai hta Hkristu hte bung hkra nga shakut na lam hte Karai Kasang anhte hpe tsaw ra ai hpe sumru let sakse hkam nga pra ra ai lam Wa Sarabyin Francis Jau ni hpe shadum n-gun jaw da nga ai.

Shinggyim wuhpung wuhpawng hta dawsa ai lam ni, gumshen ai lam ni, rapra sut su lam n nga ai sut masa lam, myit garan ginhka ai lam, jahten sharun ai lam hte myit mada shara n nga ai lam ni gaw grau nna kaji htum ni hta byin nga ai mahkang kaba rai taw nga ai hpe Karai Kasang mu mada nga ai hpe dum hprang let si mani tsawm htap ai hku shanhte hpe yu lakawn na gaw ahkyak nga ai ngu nna mung Wa Sarabyin Francis tsun da nga ai.

Dai majaw Hkunset Maria mung kasi kamang tai ya let Karai a tsaw ra myit hte shi kanu langai a si mani tsawm htap ai myit masin hte hkap tau la nga ai hpe kasi la hkan galaw nga ga ngu mung tsun shadum da nga ai.

Karai Kasang gaw lam dam mat ai ni hpe Jau ni a mauhpa tsawra matsan dum myit hte sagu ni hpe bau sin makawp maga ya nga ai re. Shi a marang e sha sagu rem magam rai nga ai garum shingtau ai lam hpe Nawku hpung gaw akyu hpyi let galaw shaja nga ai re. Ndai lam ni hpe galaw lu na matu anhte a masin salum hpe hpaw da let Shi a magam hpe gun hpai ra ga ai. Anhte a dum nta hta rung gawk hta, anhte myit lawm ai hpe galaw nga ai ten hta lai nna, hpu nau ni hte ra kadawn ai ni kaw pru sa nna, garum shingtau ya na ra ga ai, ngu mung matut tsun da nga ai.

Shinggyim wuhpung wuhpawng hta yak hkak ai lam ni a lapran, garan ginhka, hten run, hkrat sum lam ni a lapran Prinem htingram hkra nau na myit majing hte gaw de sa wa ra ai ngu mung tsun da ai.

“Shangun dat hkrum ai sagu rem wa Hkristu hte rau anhte ni yawng a myit mada bandung langai tawn da let nau na myit majing hte dam lada la ai htung hking lailen hkum ai Nawku Hpung hpe gaw de sa wa ga,” ngu Wa Sarabyin tsun da nga ai.

Mungga jahtum hta makam masham ru jung shangang shakang, Kanu Nu Maria hpe hkung ga lara di akyu hpyi htinglu htinglai let Karai Kasang a Sasana magam hta Hkristu hte bung hkra sak hkrung nga pra let sagu hpung ni bau sin makawp maga hkri awn la ga ngu Wa Sarabyin Francis Wa Sarabyin kawn Wa Jau ni yawng hpe Saw Shaga da nga ai lam Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

29 March 2021, 12:30

https://www.vaticannews.va/en/pope/news/2021-03/pope-francis-mexican-college-vatican-tenderness-reconciliation.html