Iraq Hte Mungkan Ting Nau Na Myit Majing Nga Ra Na Gaw Grai Nan Ahkyak Nga Ai Lam Wa Sarabyin Tsun

Wa Sarabyin Francis Iraq hkrun lam hpe March 5-8 lapran hpung kawan masin galaw ngut na Vatican de bai nhtang wa ai. Bat shagu shawa masha hte hkrum shaga ai aten, bat masum ya shani, Iraq hkrun lam hpe madung da sumru woi let shi a mungga hpe htawn ya ai.

Madu Hkristu a mying ningsang hta shi hpe alum ala rai hkap hkalum la ma ai lam tsun let ga hpaw da ai.

“Wa Sarabyin Yawhan Pawlu II a masin hte maren, Iraq hte hkawm lu na matu Karai Kasang hkum nan lajang ya lai wa ai re. Wa Sarabyin Yawhan Pawlu II gaw Abraham a buga de n du lu mat ai. Raitim, majan hte gasat gala shaning ni lai mat ai hpang, ya na zawn chyam bra ana zingli tsin-rat hkrum ten, Sarabyin langai hku sa kawan lu ai gaw myit mada shara hkum tsup wa ai nan rai sai.”

Ndai hkrun lam gaw Karai Kasang a mara dat hkyamsa hkam la lu ai bu hkawm akyu hpyi nawku daw jau lu ai hkrun lam nan rai sai lam, shi hkum nan n hkrum lu ai masha ni, n du lu ai nawku jawng ni de Kahkawlik Nawku Hpung a malai wudang hpai let shanhte hte rau nga ai ni a matu arawng la shagrau ai lam Wa Sarabyin Francis tsun da ai.

Shi hpe hkap hkalum la ai gaw Hkristu a mungga hpe hkalum la ai re lam, simsa lam hpe hpaw ya ai re ai lam, nau na myit hpe gaw de ai re lam, dai gaw “Nanhte gaw kahpu kanau ni rai ndai,” ngu Mt 23:8 hta Yesu madu tsun ai manoi ga hte Iraq de sasana hkrun lam gabaw de sa kawan ai re lam Wa Sarabyin Francis matut tsun ai.

Iraq mung shawa masha ni simsa ai hku nga pra lu na ahkaw ahkang nga ai lam, Shanhte shinggyim sari sadang hte maren nga pra lu na ahkaw ahkang nga ai lam mung madi madun ai.

Labau hta Baghdad gaw akyu hpyi bu hkawm shara langai rai nga ai lam, mungkan hta laika hti sum hting la mai dik shara mung rai nga ai lam mung tsun dan da ai.

“Rai yang dai hpe kadai jahten kau ai rai? Majan rai nga ai ngu Wa Sarabyin madi madun da ai. Majan gaw Baren zawn prat dep galai shai na lam hte shinggyim myu sha ni a galai shai na lam ni hpe mayu kau ai zawn rai nga ai. Majan hpe majan hte bai tai ai baw n re ai. Laknak ni hpe laknak ni hte bai tai ai baw mung n re ai. Bai tai ai lam gaw nau na myit jasat hte bai tai ai lam rai nga ai,”

ngu Wa Sarabyin mahtai tam shang lang da ai.

Iraq kaw nga ai Hkristan ni, Muslim ni hte kaga makam hpung ni yawng gaw kahpu kanau ni hkrai rai nga ai. shanhte gaw Ur ngu ai shara hta rau hpawng de na akyu hpyi ai ni rai ma ai. Dai shara gaw lai sai shaning hkying mali (4000) daram aten hta Karai Kasang Abraham hpe shaga la ai shara rai nga ai, ngu mung labau hpe tsun dan ai.

Mosul hte Qaraqosh na mung shawa masha ni a nau na myit masin hpe mung matut tsun dan ai. Dai mare kaba lahkawng gaw ga shaka dingsa prat na Chyum laika hta rawng ai Tigris hka hte Nineveh mare makau hta nga ai mare ni rai nga ai. Islamic State hpe gaw de hpang ai aten kaw nna Hkristan ni hte zingri hkrum myu sha kaji ni Yazidis de hpawt hkawm lai wa ra ma ai lam mung labau hpe matut tsun dan ai.

Shanhte ni n-gun pawng atsam dat let shinggyim wuhpung wuhpawng hpe ningnan kaw na bai hpang sa wa na matu shanhte a matu akyu hpyi ya let n-gun jaw da ai lam mung tsun hkai dan ai.

Jahtum hta Wa Sarabyin Francis Iraq hkrun lam a matu Karai Kasang hpe chyeju dum ai lam tsun let Iraq mung shawa masha ni a nau na myit kaba hte mungdan gaw de sa wa lu na hpe myit mada lam tsun ai hpe Vatican Shiga Dap kaw nna ndau da ma ai.

Source : Vatican News