Hpaji Jawng Ni Hta Shawang Myit Hte Maren Mara Chye Myit Ai Lam Hpe Dawk Bang Sharin Ya Ra Ai Nga Nna Wa Sarabyin Tsun

Jesuit Sasana Hpung kawn hpaw da ai Latin American Federation of Jesuit Schools (FLACSI) a (20) hpring ladu hkrum nhtoi hta Wa Sarabyin Francis Yana zawn, shi a Video message hta hpaji jaw ndau da ai rai nga ai.

Kahtawlik hpaji jawng ni gaw masha shagu hpe hkap la ai jawng rai nna, tinang hkum a hkam sha ana ni hpe tsi shamai hkam la ai zawn kaga hpu nau ni a ana ni hpe mung tsi shamai ya ai shara rai nga ai, ngu Wa Sarabyin Francis tsun da ai.

Aten ladaw hta hkan nna sharin hka ja la mai ai shara mung rai nga ai hte rawt jat lam a matu sawn dik lik lam ni hpe mung law law jaw ya lu ai. Masha shada garan ginhka ai lam ni hpe shabyin ai gaw grai nan n kaja ai rai nna, dai zawn galaw ai gaw gaya kahpa re ai ngu sharin ya ai jawng ni mung rai nga ai.

Latin American Federation of Jesuit Schools (FLACSI) gaw 2001shaning hta hpaw hpang ai rai nna, woi awn ai gaw Jesuit Sasana magam gun 92 rai ma ai. Dai mying hte hpaw da ai garan jawng ni gaw mungdan (19) hta nga ai. Jawng hpe hpang wa ai gaw “the Conference of Provincials For Latin America (CPAL) hpawng kawn hpaw hpang ai re lam chye lu ai.

Jesuit jawng hta Yesu Madu a kasi hpe hkap la hkan sa lu na matu madung da sharin shaga ai re lam mung chye lu ai. Yesu Madu gaw hpu nau ni hte hpan da hkrum nga yawng nga pra hte gara hku matut manoi nga ai lam hpe sharin ya ai hpe kasi kamang tai ya ai rai nga ai.

Hpaji sharin jawng ma ni hpe hkap la ai hta matsan jam jau ai ni shang sharin hkam la lu na matu hpe mung madun myit ra ai. Shanhte a matu chyinghkra galoi mung hpaw da ya ra ai. Hpaji Jawng ngu ai gaw Madu a Kabu Gara Shiga hta na hpaji byen-ya hpe sharin hkam la ai shara mung rai nga ai.

Hpaji jawng ngu ai gaw, tingkyen myit n mai nga ai shara re ai; shada hku hkau kanawn mazum ai hta masha hkum shagu hte nau na myit majin hte matut mahkai hku hkau kanawn mazum nga ra ai, ngu Wa Sarabyin Francis n-gun jaw shadum da ai mungga hpe Video message hku tsun da ai hpe Vatican Shiga Dap kaw nna ndau da ma ai.

#vaticannews #rvakachinservice

Source : Vatican News