Hkrung Rawt Ai Madu Hpe Kam Sham Mu

Wa Sarabyin Francis kawn lai wa sai Pasaka Laban Lahkawng hta kam sham ai hpung masha ni hpe si ai kaw na bai hkrung rawt wa ai Madu a hpung shingkag hpe anhte ni hkrum lu ai zawn anhte a makam masham,kyu hpyi ai lam, tsawra ai myit hte Pasaka a kabu gara ai lam hpe grau nna chyambra wa hkra galaw sa wa na matu tsun lai wa ai.

Wa Sarabyin Francis kawn shi a mungga hpe tsawra matsan dum chye ai Sanpra ai John Paul II hpe yaw shada let hpaw hpang ga tsun lai wa ai. Dai shani na mungga hta anhte hpe tsun taw nga ai gaw Karai Kasang a Kasha Madu Yesu hpe kam sham nga nna anhte shi a amying shingteng hta ahkrung nga na ra ai, “asak hkrung ra ai ngu ai gaw hpa hpe tsun mayu rai kun” ngu san lai wa ai.

Anhte ni yawng gaw sak hkrung na hpe ra sharawng ai ni rai nga ai, dai hte maren anhte ni hta gara hku sak hkrung na ngu ai lam law law nga ai hpe tsun lai wa ai. Anhte ni pyaw hpa myit dik hpa lam amyu myu hpe lu la na matu ra marin ai myit hpe shayawm ya ai masha n kau mi nga ai, dai gaw nnan daw hta anhte hpe myit dik ai lam jaw ya lu ai zawn nawn da tim tatut hta anhte a salum hpe myit dik ai lam n lu jaw ya nga ai. Dai majaw ndai gaw anhte a prat hpe kaja wa myit pyaw ai lam jaw ya lu ai lam n rai nga ai hpe Wa Sarabyin tsun lai wa ai.

Wa Sarabyin kawn anhte marai hkum ngau shagu hpe hkum zup ai prat gaw Madu Yesu hta sha nga ai lam re hpe chyum laika hta asan sha tsun da ai hpe tsun lai wa ai. “Dai hpe anhte ni gara hku galaw ra na rai, gara hku hkrum lu na rai? ngu nna anhte hpe san lai wa ai. Wa Sarabyin kawn “Having Life” ngu ai gaw wudang hta jen noi si hkam nna bai hkrungrawt wa ai Madu Yesu hpe ding ding yu ga, anhte a kyu hpyi ai hte Sacrament hta Madu Yesu nga ai hpe dum nga ga, shi hpe kam sham ga, shi a chyeju a majaw anhte ni shamu shamawt lu nga nna shi galaw lai wa ai kumla ni hpe yu nna anhte ni kasi la nna hkan sa nga ga, shi anhte hpe tsawra nga ai zawn anhte mung dai tsawra ai hpe garan kachyan nga ga. Madu Yesu shi hte rau sak hkrung nga ai lam mahkra gaw anhte hpe grau nna sak hkrung ai lam hpe jaw ya nga ai.

 Hpang jahtum hku nna Wa Sarabyin kawn anhte hpe “Madu Yesu gaw si ai kaw nna ,hkrit tsang ai lam hte mara kaw nna hkrung rawt wa sai hpung shingkang hpe ngai kamsham nga ai kun?, bai nna nye hkum a madu hte rau kanawn mazum na matu ngai ahhkang jaw nga ai kun? Shi ngai hpe tsawra ai zawn ngai mung nye a kahpu kanau ni hpe shi zawn shani shagu e tsawra lu na matu myit mada shakut nga ai kun? ngu anhte hpe san lai wa ai. Wa Sarabyin kawn “hkrungrawt sai Madu Yesu hpe kamsham nna sak hkrung na matu hte Pasaka a kabu pyaw hpa lam hpe karan lu na matu Kanu Maria kaw garum hpyi ya let” shi a mungga hpe shangut lai wa ai hpe chye lu ai.