Hkristu Si Hkam Ai Wudang Gaw Myit Mada Lam Jaw Ai Nhtoi Kumla Re ( 02 April 2021 )

Wa Sarabyin: Hkristu Si Hkam Ai Wudang Gaw Myit Mada Lam Jaw Ai Nhtoi Kumla Re

March 31, bat shagu, masum ya shani shawa masha ni hte hkrum shaga ai lamang hta, Wa Sarabyin “Easter Triduum” ngu ai Chyoi Pra ai laban bat mali, manga, kru ya shani ni hta galaw ai nawku daw jau lamang ni hte Hkristu Madu a nni nkri hkam, si hkam nna bai hkrung rawt ai mungsung lam ni hpe madung da tsun dan da nga ai.

Tsaw ra ai hte seng ai tara ningnan

Chyoi Pra ai mali ya shana na Madu Yesu a hpang jahtum “Daw Sha Poi” hte Kasa ni a lagaw hpe kashin ya ai lam gaw Madu Yesu a tsawra tara ningnan rai nga ai. Dai tsaw ra tara ningnan gaw Misa hkungga hta Shi a Hkum hte Sai hpe nawng jau ya ai a marang e yawng a matu hkye hkrang la ai lam jaw ya ai.

Wudang hpe hkung ga shagrau ai lam

Chyoi Pra ai manga ya shana na nawku daw jau lam hta anhte ni hkung ga shagrau na matu wudang hpe tawn da ya na rai nga ai. Dai wudang hpe hkung ga shagrau nna mungkan mara la kau ya ai, mara n kap ai Sagu kawa hpe hkungga nawng jau ai hkrun lam hta hkawm sa ai hpe bai hkam sha shangun ai.

Dai n’htoi hta anhte a myit masin salum gaw machyi makaw hkrum ai ni, matsan mayan re ai ni, hte kau da hkrum ai ni a nni nkri, jam jau jam hkau lam ni hpe hkam sha lawm let hkungga nawng jau ya sai Karai a Sagu kasha hpe bai myit dum nawku daw jau nga ra ga ai. Majan tsin-yam hkrum sha nga ai ni, gumshen lai lang ai ni a jingri roi rip ai hpe hkrum sha nga ai ni, shani shana dawsa hkrum nga ai ni, ma shabrai hkrum ai ma ni mung mungkan mara la kau ya ai Karai a Sagu kasha a marang e hkye hkang la hkrum lu mu ga akyu hpyi ya ra ga ai.

“Hkristu hpe jan da ai wudang sumla a shawng kaw sa nna, anhte a prat hta zingri zingrat hkrum nga ai ni yawng a matu akyu hpyi ya ga.Hpa majaw nga yang zingri hkrum ai ni a nni nkri lam a lachyum hpe Yesu Madu a nni nkri hkam si hkam ai wudang hta nga nga ai rai nna, dai wudang hta shalan shabran n-gun awai la lu na rai nga ai.”

Yesu Madu shinggyim hkum sa la nna si hkam ai a marang e, Karai kasang a tsaw ra ai gaw ga sau n rawng ai zaibru pa zawn re ai anhte a myit masin wenyi hta hka jaw bang ya ai a marang e apu asi hkam la lu ga ai; n’sin htawng hta rawng nga ai anhte hpe n’htoi jahtoi ya ai.

Anhte a mungkan gaw nsin chyip rai taw nga ai gaw hpa majaw ta? Majan ni a majaw rai nga ai; kaw si hprang gara hkrum ai ma ni hte shanhte a hpaji hparat lam hpe n myit ya ai majaw rai nga ai; nang hpam lusha dut lu sha ai majaw rai nga ai; tinggyen myit jasat rawng ai ni law ai majaw rai nga ai. Shanhte a myit masin hta gaw grau kaja ai hpe myit mada ma ai. Dai grau kaja ai hpe tam sa wa lu na matu Yesu Madu Karawari kawng hta wudang hpai nni nkri hkam si hkam ai lam hpe Yesu Kasa ni hta madun dan ai zawn shanhte hpe mung madun dan ra ga ai.

Yesu Madu a nni nkri hkam ai nma ni a majaw anhte ni shamai shatsai shalam shabran hkrum nna shi a si hkam ai a marang e yawng gaw n-gun ningnan hte sak ningnan hpe bai hkam la lu ga ai. Shi hpe chyeju dum ga. Wudang hta si hkam ai Yesu a marang e, kadai mung, galoi mung si du a lata hta hkrat sum sana n re ai.

Kam sham ai ni a Kanu

Chyoi Pra ai kru ya shani gaw Chyoi Pra ai Maria a n’htoi mung mung rai nga ai. Kru ya shani hta Yesu a sape num sha ni hte Kasa ni hkrup ngu hkrap ngoi ai nhtoi rai nga ai. Raitim, Kanu Nu Maria hte rau sape ni a myit masin salum gaw kamsham, myit mada, tsawra ai hte hpring rai nga ai.

wudang lagaw nhpang e tsap nga ai Karai a Kanu Nu Maria a masin salum hta nri hte galun wu hkrum ai zawn hkam sha ru nga ai. Raitim, yawng ngut mat ai hpang bai hkrung rawt sai Karai Kasang ga sadi jaw da ai myit mada shara shi hta anga nga ai.

Nsin chyip re ai dai kru ya shana hta kabu pyaw lam hpe jaw ya ai nhtoi shingkang gaw “Easter Vigil” nawku daw jau ai hta htoi tu wa sai. Alleluia mahkawn shakawn nga na ga ai.

Myit mada lam hpring tsup ai n’htoi

Chyam bra ana tsin-yam hkrum nga ga ai ni dai ana makawp tara hte maren Chyoi Pra ai laban bat magam hpe galaw ai a marang e myit mada lam hpe jaw ya ai n’htoi hpe hkam la lu na ga ai; Madu Hkristu a wudang ngu ai nni nkri hpe hkam la ra ai masa lam law law a lapran anhte hkawm sa ra nga ga ai.

Dai gaw myit mada lam hpring tsup hkam la na kumla ni nan rai nga ai. Dai myit mada lam ni hpe hkum kau da ga; kadai mung hkrap myi pri n hkrat ai rai yang gaw Karai Kasang a hkye hkrang la ai masin hpe hkam la lu na n rai ga ai, ngu Wa Sarabyin Francis bat masum ya shani shawa masha ni hte hkrum shaga ai lamang hte hkaw tsun ai mungga hpe Vatican kaw nna ndau da ma ai.

Ka Lajang ai  - Fr. Patrick Gaw Maw Hkawng Yae

                         Coordinator Of RVA Kachin

                         Myitkyina.