Hkristu Madu hpe sak hkrung Karai re ngu dum chye ai gaw ngwi pyaw simsa ai prat a mau hpa mungsung re

San Petru hte Pawlu poi, June 29, 2020, prawan ladaw 13 ngu na laban shani na Madu Lamu Kasa akyu hpyi ga tsun ai shaloi, Wa Sarabyin Francis gaw Hkristan masha ni a sak prat hta kumhpa langai tai nga na matu Hkristu Madu hpe sak hkung Karai re ngu dum chye ai gaw ngwi pyaw simsa ai prat a mau hpa mungsung re lam tsun shadum da nga ai.

Dai shani, Madu Lamu Kasa Akyu Hpyi Ga tsun ai shaloi, San Petru hte San Pawlu yan a prat hkrun lam hpe sumru woi da nga ai. Bat langai ya shani na Misa hta hti ang ai Chyum mung daw langai (Kasa 12:1-11) hta Madu a Lamu Kasa San Petru hpe hkyuk hkawng kaw na shalawt dat ya ai lam; hkyuk htawng hta bang da ai hpang daw hte si hkam ai hpang daw na mabying ni hpe shingdaw sumru da ai.

San Petru gaw shawng de zingri zingrat ai kaw na lawt lu ai rai tim, hpang daw de hpa rai lawt lam nnga ai rai? Yesu Madu a kasi kamang hpe la nna San Petru hte San Pawlu yan zawn anhte hkum hpe sak jaw kumhpa shatai let Karai Kasang kaw ap nawng da ga. Karai Kasang gaw San Petru hpe akyu chyeju law law jaw bang ya nna, n kaja ai lam ni hta na shalawt dat ya ai zawn anhte hpe mung shalawt dat ya nga ai.

Anhte ra kadawn ai ten hta sha Karai Kasang kaw sa du kyu hpyi ga ai rai tim, Shi gaw anhte mu lu ai hta grau nna mu lu ai Wa rai nga ai hte maren, anhte hpe sung grau ai hku sumru na matu saw shaga nga ai. Karai Kasang jaw ya na kumhpa hpe sha n tam ai sha, Shi hpe tam mu na matu anhte hpe saw shaga nga ai re. Hkrum katut ai mayak mahkak ni hpe Karai Kasang a lata hta ap da ai hku sha ndi ga. Anhte a sak prak hpe mung shi hta ap tawn da ra ga ai.

Ndai zawn hkan shatup jang she Madu Karai anhte hpe sak jaw ai kaba dik ai chyeju hpe matsan dum myit kaba hte jaw ya na rai nga ai. Hpa majaw nga yang, shingyim prat hta ahkyak dik ai gaw shingyim prat hpe kumhpa shatai ai lam rai nga ai.

Karai Kasang gaw jaw jau ai lam hpe sha ra sharawng ai. Jaw jau ai hta sha anhte ni gaw manu sari shadang nga ai ni tai nga na re. San Petru gaw hkyuk htawng kaw na lawt wa ai majaw sari manu nga ai share shagan tai wa ai nre. Shi asak hpe ap nawng jaw jau kau ai majaw she sari manu nga ai share shagan San Pra Masha tai wa ai rai nga ai. San Petru si hkam ai shara gaw, anhte tinang hkum hpe tam la ai shara, myit mada shara de galai shai dat ya sai re.

Ngwi pyaw ai sak prat lu la na matu Karai Kasang kaw kaning re akyu hpyi la na ngu ai gaw dai shara hta nga nga ai. Ya ten, hkyak hkyak ra ai lam hpe sha hpyi ai hku nre ai sha, chyeju hpring sak prat hpe nan hpyi la ga.

Mt 16: 13-19 hta na mungga hpe lakap nna mung garan kachyan da nga ai. Kasa ni hpe Shi kadai re ai lam san ai shaloi, San Petru a mahtai gaw San petru shi hkum nan hpe galai shai shangun ai. “Nanhte mahtang ngai hpe kadai wa rai nga ai nga nga myit ta,” ngu Yesu san ai shaloi, Petru htai ai “Nang gaw Messiah ngu ai ahkrung nga ai Karai Kasang a Kasha rai nga ndai,” ngu rai nga ai. Yesu bai htan ai gaw “Yawhan a kasha Simun e, nang a lu ndai... (Mt 16:16-17).

Wa Sarabyin sanglang dan ai hta Yesu bai htan ai mungga hta “a lu ndai” ngu ai gaw “kabu pyaw ai” ngu lachyum rai nga ai. Yesu Simun hpe “Petru” ngu shaga ai gaw “Lunghkrung” ngu ai lachyum rai nga ai. Dai Petru ngu ai “Lunghkrung” hta Yesu Shi a Nawku Hpung hpe gaw de da na ngu Mt: 16:19 hta Yesu hkum nan ga sadi tawn da ai. “Petru ‘Lunghkrung’ gaw ngang kang ai wa rai wa ai gaw ‘Simun’ ngu ai ‘lungsha’ hpe Yesu ngu ai ‘Lunghkrung’ de gale dat ya ai rai nga ai” nga nna Wa Sarabyin lachyum salen da ya ai.

Yesu Madu gaw Labau hta mying dan hkung ai wa re ngu chye da na nra ai zawn, Shi tsun ai lam ni hte galaw ai magam ni hpe sharawt na mung nra ai. Ahkyak madung ra ai lam gaw “anhte a prat hpe Shi kaw ap tawn da na she rai nga ai. Ndai lam hte seng nna anhte a prat hpe gara hku masin jahkrat da ai? Ya hkyak hkyak ra kadawn ai lam ni hpe sha myit tsang nga ai kun? Shing nrai, Shi hkum hpe kumhpa shatai da ai Yesu Madu gaw anhte ni kaja wa sha ra taw ra taw ai wa re ngu hkam la kam sham nga ai kun? Tinang a prat hpe gara hku gaw de nga ai kun? Tinang hkum nan sha a atsam hte sha kun? Shing nrai, Sak hkung Madu Karai a Hpung dagu hte kun?

Mahkra dang chye ai Karai Kasang hta kanu Nu Maria gaw shi a prat hpe ap nawng da ai rai nna, Madu Karai Kasang hta anhte a shani shagu na magam daju salum (wundung) shatai lu u ga anhte hpe garum ya na matu akyu hpyi let Wa Sarabyin Francis, shi a mungga hpe ginchyum dat da ai.

Translated by Fr. Patrick Hkawng Yae

#rvakachinservice

#vatican

https://www.vaticannews.va/en/pope/news/2020-06/pope-at-angelus-the-secret-to-a-blessed-and-happy-life-is-recog.html

 

Add new comment

9 + 6 =