Hkristu A Hkum Shan Gaw Mungkan Masha Yawng A Shaku Hta Karan Gam Sha Na Matu Re Nga Wa Sarabyin Tsun Ai

Wa Sarabyin Misa Hkungga Nawng Ya Ai Sumla

Wa Sarabyin: Hkristu A Hkum Shan Gaw Mungkan Masha Yawng A Shaku Hta Karan Gam Sha Na Matu Re

 September 25, laban shani, (27) lang ngu na National Eucharistic Congress hpawng shangut Missa Hkungga hpe Matera kaw, Wa Sarabyin Francis hkum nan woi awn nawng jau lai wa ai. Hkristan ni,matsan masha ni hpe matsan dum tsawra myit n nga ai rai yang, Missa Hkungga nawku daw jau lam mung nga na n re, ngu Wa Sarabyin tsun sang lang da ai.

 Lk 16: 19-31 hta na Madu Yesu tsun hkai dan ai ga shawn, sahti wa hte Lazarus a lam hpe lakap nna, Wa Sarabyin mungga hkaw tsun da ai.

 Missa hkungga gaw Karai Kasang hte seng ai ahkyak dik lam hpe myit shadum ya ai. Ga Shadawn hta na sahti wa gaw Karai Kasang hte matut mahkai hku hkau lam hpe pat shingdang la ai; shi hkum shi hpring tsup sai, shi a prat gaw pyaw dik htum rai sai, ngu hkam la lai wa ai. Tinang hkum myit dik ai wa, lu lai sha lai ai wa, Karai Kasang a matu shara n jaw ai wa rai nga ai. Shi hpe anhte ni sahti wa ngu shamying ga ai. Shi hta mungkan sutgan madu da lam law ai majaw shamying ai gaw rai nga ai.

 Raitim, shi hta wenyi shutgan n lu su ai, nga nna Wa Sarabyin shingdaw jahpra dan da ai.Matsan mayan re ai wa gaw Lazarus rai nga ai. "Lazarus" a lachyum gaw "God will Help", Karai Kasang Karum na ra ai, ngu ai rai nga ai.

 Matsan mayan rai masha ni e shingdu yin da hkrum ai rai tim, Karai Kasang hte matut mahkai nga lu ai Lazarus rai nga ai. Karai Kasang hte matut mahkai hku hkau ai lam gaw Karai Kasang jaw ya ai teng man ai shinggyim manu sari nan rai nga ai.

 Missa Hkungga nawng jau ai lam gaw Karai Kasang hpe nawku daw jau ai lam rai nga ai; tinang hkum hpe nawku ai lam n re ai.

 Karai Kasang a tsaw ra ai kasha, shaman da hkrum ai wa, Shi a daw sha poi de shang sha lu ai buhpun hte shatsawm jahtap da hkrum ai wa gaw Lazarus hkum nan rai nga ai. Karai Kasang hpe nawku ai wa gaw kadai a mayam mung n tai lu ai, kadai hpe mung mayam n shatai ai.

 

Hpu nau, nau na ni hpe tsaw ra ai

Missa Hkungga gaw hpu nau, nau na ni hpe tsaw ra na matu rai nga ai.

Missa Hkungga hta nawng jau ai muk gaw tsaw ra hte seng ai Sakramentu chyeju kumla rai nga ai. Hkristu gaw shi a hkum hpe anhte a matu ap nawng da ya ai; shi a hkum hpe jaw da ai; anhte hpe mung shi zawn, hpu nau nau na ni a matu, ap nawng daw jau na hpe shi ra sharawng ai.

 Anhte a shawng lam (hpang prat) gaw, ya, ndai prat hta gara hku nga ai ngu ai hte matut manoi nga ai. Anhte hte hpu nau ni lapran mading nhkun htu da ga ai rai yang, anhte hkum nan a lup sung hku hpe htu da nga ai hte bung na re, ngu Wa Sarabyin Francis sang lang shadum da ai.

 "Hpu nau ni hte ginhka la ai nhpan madin kum shatsaw ga ai rai yang, anhte hkum hpe anhte shingtai shatai la ai hte si mat wa ra na rai nga ai."

 Madu Yesu a ndai ga shadawn maumwi gaw ndai prat na anhte hpe shadum sharin shaga nga ai ga sadawn maumwi naw tai nga ai. N tara ai lam ni, n shabung la ai garan ginhka ai lam ni, arawng aya ni hpe shut shai ai hku jai lang nna matsan mayan n-gun n rawng ai ni hpe dip lu dip sha mawp lu mawp sha, dang sha ai lam ni, matsan mayan re ai ni a hkrap n seng hpe n na jahpai, n mu jahpai ai lam ni, ndai lam ni yawng gaw anhte ni hpe shingdu kayin shangun ai lam ni rai nga ai. Hkristan myit n rawng ai lam ni rai nga ai.

 Ndai lam ni galaw nga ai rai yang, dai masa kaw nna myit malai kayin wa nna matsan dum lama ai, garum shingtau ai, shawang tsawra myit kaba ai, hpu nau nau na myit majing rawng ai, ndai myit masa hta hkawm sa ra ai.

 Nawku Hpung gaw Missa Hkungga Nawng Jau ai Nawku Hpung (a Eucharistic Church) rai nga ai. Missa Hkungga nawng jau ai ngu ai gaw Madu Yesu hkum nan jaw da ai daw sha poi rai nga ai. Dai daw sha poi gaw hpu nau shada tsaw ra myit hte daw jau ai lam, Karai Kasang a hkye hkrang la ai daw sha poi rai nga ai.

 Missa hkungga hta anhte lahput hputdi nna Karai Kasang hpe daw jau ai gaw muk a nsam hta Karai atai Masha atai hku rawng nga ai Madu hpe hpu nau myit majing hte rau hpawng de nna Shi hpe nawku daw jau ai rai nga ai.

 Machyi makaw jam jau hkrum nga ai ni, matsan mayan ni, hkrap ngu hkrap ngoi ai ni hpe myit mada lam jaw ya ai, myit ngwi myit pyaw kabu hpa lam jaw ya ai rai nga ai.

 Madu Yesu a ga shadawn hta na Lazarus zawn re ai ni hpe n dau jau lu ai rai yang anhte nawng jau ai Missa hkungga gaw kaman sha rai mat na rai nga ai.

 Nawku Hpung nawng jau ai Missa Hkungga hta rau hpawng de dai muk a nsam hta rawng nga ai Madu Yesu hpang de kayin wa ga, shi a daw sha poi namchyim hpe hkam sha ga, yawng hpe tsaw ra myit kaba hte matsan dum lama lam jaw ga, Madu Yesu hpe hkalum la let Shi a bai hkrungrawt ai hta asak ningnan hte shang lawm ga, nga nna Wa Sarabyin Francis lai wa sai laban shani na Missa Hkungga hta hkaw tsun da nga ai.

 

Source; Vatican News

By Fr. Patrick Gawmaw Hkawng Yae

#vaticannews

#rvakachinservice

Add new comment

4 + 0 =