Hkristmas Ten Hta Marai Hkum Shagu Nga Gring Ai Myit Jasat Lam 3

Christmas ten hta

Tsawra ai Nu Wa hpu nau ni Madu Yesu gaw anhte shingyim masha ni hpe hkye hkrang la na matu  Mungkan ga de du sai wa ai, n dai x’mas ten hta, shangai wa na Madu Yesu hpe hkap tau hkalum na matu jin jin rai nga sai kun?

Anhte a myitmang ai lam , shamu shamawt ai lam ni gaw, Madu Yesu ra sharawng ai hku rai nga mali ai kun ? myit yu mai nga ai.

Christmas poi hpe htap htuk manu dan,  namnak rawng ai grau lachyum sawng ai hku shang lawm lu na matu marai hkum shagu hta nga gring ai myit jasat lam (3) hpe ,2017 ning December hta Wa Sarabyin Francis hpung masha ni hpe tsun shadum lai wa sai rai nga ai.Dai Mungga hpe mahta nna, n dai hkristmas ten hta anhte hkan sa galaw gring ai myit jasat lam masum hpe gam garan ya mayu nngai.

Shut hpyit mara lu ai shinggyim masha ni hpe , yubak kaw na hkye mawai la na Madu Yesu du sa na hpe shajin nga na matu Thesalonia Hpung masha ni hpang de Kasa Pawlu shagun dat ai laika langai hta anhte hpe shadum ya nga ai.Kasa Pawlu tsun ai hta, galoi mung dinggrin kabu pyaw nga lu na matu, Akyu hpyi ai lam hta n den marai rawng nga na matu hte hkying ten shadu chye ju dum chye ju htang ai lam hpe galaw  na matu rai nga ai.

Numbat langai hta, tut nawng dinggrin kabu pyaw ai myit rawng nga na matu tsun ai. Raitim anhte a prat hta hkying ten shagu pyaw pyaw  hte nga na matu gaw n loi nga ai.Lam shagu hta tinang myit ra sharawng myit mada ai hku byin wa na mung n rai nga ai.Myit hta tsang ai ,mayak manghkang lam dingbai dingna, awng dang ai hkrat sum ai ngu ai shoi hpa lam ni gaw, tinang n shaga tim hkrum katup wa na teng sha rai nga ai.Dai zawn hkrum sha ai ten, tinang a myit hta katsi katsang ,chyahkraw chyahkra rai , karen kari nga hkam sha wa chye ga ai.Masha hpawng hte tsan ai, kadai mung nnga ai shara ,kade marawn tim bai htan ya na masha nnga, zai bru jang hta tara hkaw hkawm ai Baptisma Yawhan a mabyin zawn tinang a n sen hpung tang kashawn ai hpe sha na ai zawn nga hkam sha chye nga ai.Raitim Hkalup Sara Yawhan gaw dai ten hta myit daw myit hten ai lam nnga ai.Shi hkaw tsun ai lam gaw lachyum n pru ai lam nrai nga ai.Masha a-ngawk a-ngak re ai ni ra sharawng ai hku hkaw tsun hkawm ai mung nrai nga ai.Kaja nan manu mana lachyum rawng a ai jaw ang ai lam hpe shi hkaw tsun hkawm ai rai nga ai.

Chyum Laika hte Mihtoi Esaia tsun ai gaw, Matsa mayan re ai ni hpe kabu gara ai shiga hkaw tsun na matu , Myitru myit hten yawn hkyen hkrum ai ni hpe shalan shabran ya na matu, sharen da hkrum ai ni hpe shalawt dat na matu hte Karai kasang a a-lu ai chye ju kri nam ta hpe n-dau shabra ya na matu, Kasa yawhan hkaw tsun ai lam re nga nna tsun da ai rai nga ai.

Karai Kasang gaw, shingyim masha ni a tenggyeng shut hpyit ai lam, Wuhpung Wuhpawng hku nna shut hpyit ai lam ni hpe galaw shangun ai mabyin masa lam ni hpe yubak hkrum ai kaw na lawt lu na lam n mu ai ni hpe mara dat shalawt ya na matu rai nga ai.Madu Yesu Mungkan ga de du sa ai lam gaw, hten za hkrat sum taw nga ai shi a masha ni  a arawng aya hte shanglawt ahkaw ahkang hpe bai jaw ya na matu rai nga ai.Ndai lam ni hpe Madu Yesu chyu sha galaw ya lu ai lam re.

Numbat lahkawng hta , akyu hpyi ai lam hta n-gun dat na matu tsun ai.N-sim n sa akyu hpyi nga na matu Kasa Pawlu shagun dat ai laika hta lawm nga ai.Akyu hpyi ai lam gaw, Karai Kasang hte matut mahkai lu na matu chye ju shalat ya ai.Dai chye ju gaw anhte a myit masin Wenyi ni hpe teng man kabu gara ngwi pyaw ai lam hpe byin shangun ya nga ai.

Christan Hpung masha ni a kabu awlu ai lam gaw, Kam sham ai myit hte Madu Yesu kaw sit shang nna, shi hpe myit masin kraw lawang kaw nna kaja nan lu la ai aten hta paw pru wa ai rai nga ai.Madu Yesu kaw myit manoi manat nga jang shani shagu, tinang galaw sa wa ai magam bungli lam ni hta, yaw shada da ai hku nrai, ninghtan shai mat ai lam ni nga tim mung, Myit masin kyraw lawang hta kabu myit pyaw simsa ai lam hpe hkam sha lu nga ai.Madu Yesu hpe kaja wa nan lu la ai wa gaw, nshawp nkap re ai lam galaw na n rai nga.De ai malai, Kabu Gara shi hkaw tsun gat hkai ai masha langai zawn  tai wa na ra ai.Ndai kabu pyaw ai lam hpe shinggyim masha shada da garan kachyan hkat nna, Mungkan a pyaw hpa lam hpe tawn kau da let Madu Yesu hta kabu pyaw ai lam kanan lawm nna, galu la ai Mungkan a hkrun lam hta, angwi apyaw hte hkawm sa lu na matu grai ahkyak nga ai.

Numbat masum hta, chye ju dum chye ju htang ai lam galoi mung galaw nga na matu tsun shadum ai.Karai Kasang a hparan hpara jaw ya kam ai , matsan dum lama ai myit galu ai hte myit kaja ai lam ni hpe hkam la lu ai christan hpung masha langai gaw, Karai Kasang hpe tut nawng e chye ju dum let sak hkrung nga ra ai.Madu Yesu a kanu Chyoi Pra Maria gaw, Karai Kasang jaw ya ai shi a asak hkrung lam hpe Chye ju htang ai hku nna, Karai Kasang ra sharawng ai lailen hpe dagraw let shangun ma langai a myit jasat zawn sak hkrung lai wa sai rai nga ai.Maria gaw anhte a matu kabu hpa lam hpe jaw ya ai re.Hpa mjaaw nga yang Nu Mari a shagrit shanem ai hte Karai Kasang a lajang ai lam hpe shi hkap la ai majaw shinggyim masha ni hpe hkye hkrang la na Madu Yesu shangai  wa ai lam re.

Tsaw ra ai Nu Wa Hpu Nau ni , dai majaw ndai hkristmas ten hta,  anhte langai hkrai mung, tinang hkum nan kabu pyaw nna, dai kabu pyaw ai lam hpe manaw manang jinghku jingyu n ta masha ni hte ginlen hkat nna yawng hpe kabu shangun lu ai ni, akyu hpyi ai ai lam hta myit n-gun dat ai ni ,lam shagu hta chyeju dum chyeju htang chye ai ni byin tai hkra shakut let sak hkrung hkawm sa nga ga ngu n-gun jaw dat lu nngai .Shiga madat nga ai Nu Wa Hpu Nau ni yawng, ngwi pyaw hkam kaja let Christmas hte shaning nnan hta myit masin nnan hkum hkrang nnan hte kabu gara shang lawm lu uga ngu akyu hpyi ya let lamang hpe ndai kaw jahkring sai rai.

Thomas Chyahkyi Mung Hpan

23.12.2019

 

Add new comment

2 + 0 =