Hkristan Ni Ngu Ai Gaw Hku Hkau Kanawn Mazum Ai Lam, Makawp Maga Lam, Kabu Gara Ai Lam Rai Nga Ai Lam Wa Sarabyim Francis Tsun Lai Wa Sai Shiga

Paska Ladaw hta masum ngu na laban, 2021 April 18 ya shani  Wa Sarabyin Francis hku nna tsun ai Mungga hta, Hkristan langai tai ai ngu gaw hkam la da ai makam masham  langai (shnr) arawn alai madang langai n re ai sha, Madu Yesu hte ding yang matut mahkai let sak hkrung ai lam re nga nna tsun dat nga ai.

Wa Sarabyin gaw Laban shani shi a tara hkaw ai hkuwat chyinghka kawn San Peter Pa kaba de yu nna dai kaw du nga ai kam sham ai  masha ni hpe shakram let regina Coeli (Queen of Heaven) “Sumsing Lamu A Hkawhkam Jan” akyu hpyi  ga hpe tsun lai wa ai.

Coronavirus kap bra ai lam hpe makawp maga lu na matu Italy Asuya kawn matsun da ai amying hte maren hkan sa nna shawa masha ni hte hkrum ai lam March shata 14 ya hpang Wa Sarabyin kalang bai galaw ai lam rai nga ai.

Luka a laika Daw kaba (24) hpe mahta nna Yerusalam Mare, Cenacle hta Madu Yesu Si ai kaw na bai hkrung rawt nna shi hkum nan shi a Sape ni a ka-ang e shadan dan let ‘ nanhte ngwi pyaw nga myit ga’ ngu ai Chyum Mungga hpe mahta nna Wa Sarabyin hkaw tsun lai wa ai.

Wa Sarabyin tsun ai hta, “Sape ni gaw Madu Yesu shanhte a ka-ang e du nga ai shaloi minla jahkrit nga ai ngu myit la nna hkrit gari nga ma ai. Shaloi Yesu gaw shi a hkum na ningma hpe madun let ‘Nye lata hpe yu mu, Nye lagaw hpe yu mu, ngai nan rai nga nngai, ngai hpe jum yu mu ngu ai gaw Shi a Karai Tsaw Ra Myit nan rai nga ai.

Kawa hte Kanu gaw, shawang tsawra myit kaba ai tsi sara kaja zawn, shangai wa ai shan a kasha hpe yu dat, shan shada yu hkat dat rai nna hkrum ang wa na ru yak jam jau lam ni hpe dum shai let shada n-gun jaw hkat nga ma ai.

Jum masawp hkra ai ngu ai gaw shinggyim masha prat hta ni htep ai lam, matut mahkai ai lam hte garan kachyan ai lam rai nga ai.

Kaja ai Samaritan masha gaw shi hkum hpe shi masat shadang n tawn da ai sha, lam ntsa si maw sai masha hpe mu hkrum ai shaloi matsan dum lama myit kaba hte shi a nma ni hpe gawn lajang ya ai; manam jarawp de woi sa nna manam shara hte tsi lajang na lam yawng lajang da ya ai.

Dai gaw, Yesu Madu zawn, Karai Kasang hpe tsaw ra ai ngu ai gaw Shi hte ni htep dik ai hku dan dan dawng dawng matut mahkai hkrum ai lam rai nga ai.

Malu Masha gaw sak hkrung na matu ra ahkak ai

Shinggyim masha ni asak hkrung nga lu na matu ra ahkyak ai hta malu masha mung lawm nga ai. Anhte kun dinghku masha ni, bai manau manang ni hte rau lu sha ai shaloi, tsaw ra myit madun ai, rau langai sha re ai lam madun ai, myit hkrum mang rum ai lam hpe madun ai rai nga ai. Kabu Gara Shiga Chyum Laika hta Madu Yesu anhte hpe hkring hkring madun dan ai lam nan rai nga ai. Bai hkrung rawt ai hpang rai tim, Shi a kasa ni hte rau ndai lam ni hpe matut manoi galaw woi da nga ai.

Misa Hkungga hta Madu Yesu a Hkum hte Sai daw sha poi gaw Hkristan wuhpawng ni a matu ndai kumla hpe hkrang shala nga ai.

Yesu Madu anhte hte rau nga ai gaw mingla hku n re ai; wenyi hkum hkrang nawng rau sak hkrung nga ai re lam, Hkristan tai ai gaw nawku hpung a sharing shaga ai “doctrine” hte shinggyim lailen myit sumru ai “moral ideal” madang sha n re ai lam, bai hkrung rawt sai Madu Karai hte rau nga nga ai re lam, anhte gaw shi hpe yu let, jum tek da nna hpu nau ni hpe n-gun jaw nga ga ai re lam, Wa Sarabyin Francis, shi a mungga jahtum hta tsun sang lang da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

18 April 2021, 09:37

https://www.vaticannews.va/en/pope/news/2021-04/pope-francis-regina-coeli-catechesis-3rd-sunday-easter.html