Ga Lajang Tsi Tsi Hkam La Nga Ai Wa Sarabyin Bai Hkam kaja Wa Sai Lam Tsun

Lai wa sai bat hta Wa Sarabyin Francis gaw, kan ga  tsi tsi  lajang ai lam hpe  hkam la sai wa sai raitim ya aten  bai hkam kaja wa sai lam “The Holy See Press Office” kaw nna Director Matteo Bruni kaw nna shiga jaw tsun shana lai wa sai. Kan ga tsi tsi hkam la ngut ai hpang, “The Holy See Press Office” kaw nga ai, tsi hte seng ai ni yu gawn lajang nga nna bai hkam kaja wa ai gaw kabu hpa shiga nnan langai rai nga ai.

Wa Sarabyin Francis gaw malu masha hpe mung atsawm sha aten hkrak sha taw nga ai lam, jahpawt shagu chyoipra hkum hpe  hkam la ai hte shi a bungli mahkra hpe Karai Kasang kaw ap nawng da nga ai lam Matteo Bruni tsun shana da nga ai.

Wa sarabyin gaw Laban Shani lam loi loi hkawm ai, dangdi ai daram bungli galaw ai, hkringsa ai hte akyu hpyi ai lam ni hpe galaw ai. Lai wa sai bat (3) ya shani  Wa Sarabyin kan ga tsi tsi lajang hkam la ngut ai hpang , kajawng kaja byin na lam hte tsang ra ai masa ni mung nnga ai sha , grau nna ngwi pyaw hkam kaja wa ai lam hpe mung Dr. Sergio Alfieri kaw nna tsun shana dan lai wa sai. Wa Sarabyin Farancis shamu shamawt hkawm sa nga sai lam, hkam kaja wa sai hte  shi a bungli ni hpe galaw hpang wa ra ai raitimung, laja lana re ai masa ni,  shaja ra ai lam ni hpe garai n galaw shi yang kaja ai lam hpe mung  Dr Alfieri tsun ai.

Tau nau sadi makawp maga la ai hku nna  Wa Sarabyin ya na hta grau nna hkam kaja wa na hpe kam let, ndai bat hta mung matut nna tsi rung hta tsi tsi hkam la na matu myit yaw shada nga ga ai.

Lai wa sai Bat(3) shana maga Shi a kam sham ai Hpung masha ni hpe du na ra ai June shata (18) ya shani du hkra naw hkring sa da na lam hpe mung “The Holy See Press Office” kaw nna  shiga jaw tsun shana lai wa sai.

Wa Sarabyin Francis gaw August shata hta Portugal hte Mongolia mungdan de hkrun lam hkawm (Apostolic Journeys) sa na lam hpe mung lajang da ai lam Vatican shiga dap kaw na chye lu ga ai.

Add new comment

7 + 4 =