Du Na World Youth Day Hpe Korea Mung Dan Seoul Kaw Galaw Na Lam

Mungkan ting na ramma nhtoi lamang shangut Missa galaw ngut ai hpang Wa sarabyin Francis kawn ndai lamang hpe byin tai hkra lam amyu myu hku nna shang lawm sai ni yawng hpe grai chyeju dum ai lam hte du wa na 2027 hta gaw Asia Mung dan langai ngai kaw World Youth Day hpe galaw sa wa na re ai lam hpe tsun shana lai wa sai.

Wa sarabyin Francis kawn du na World Youth Day hpe Korea Mungdan na Seoul kaw galaw sa wa na lam hpe garai n shana shi yang “moving from the Western edge of Europe to Far East” tsun let 2023 na World Youth Day hpe Lisbon kaw galaw byin wa hkra lajang ya sai ni yawng hpe chyeju dum ai lam tsun lai wa sai.

Ndai laman anhte ni na hta galoi shagu na taw ai gaw “Thank you” or “Obrigado” hpe hkrai shara shagu hta jahkring hkring na lu nga ai. Lisbon kaw na World Youth Day shangut Missa lamang hta Wa sarabyin kawn Chyeju dum ai ga hpe madung da nna tsun shana lai wa sai hpe chye lu ai.

Wa sarabyin kawn ndai lamang kaw na anhte ni hpa ni lu la sai kun, bai nna the “Obrigado” ngu ai gaw tinang lu la ai hpe chyu sha tsun ai nre sha tinang kawn jaw mayu ai myit ni rawng ai hpe mung tsun mayu ai lam re ai hpe tsun shadum lai wa ai. Ya anhte ni tinang a nta de bai nhtang wa na ten du sai hte maren nta de bai du wa ai ten hta anhte ni kawn tinang lu la sai ma hkra hpe kabu gara let bai garan gachyan sak se hkam ai lam hpe galaw sa wa na matu Karai Kasang kaw na anhte a myit masin hta chyoi pra wenyi atsam jaw bang ya sai lam tsun lai wa sai.

Wa sarabyin kawn Cardinal Clement, Lisbon kaw na Ningbaw, Nawku hpung hte Potuguese myusha ni hpe Chyeju dum ai lam tsun lai wa sai.

Wa sarabyin kawn President hte Lisbon kaw na seng ang salang ni hpe chyeju dum ai lam tsun lai wa sai, matut na Lisbon na ramma ni hpe mung galoi ma anhte a nta masha zawn, anhte a yup mang zawn dum nga na hpe gahtap nna tsun lai wa sai.

Wa sarabyin kawn ja gumhpraw hte shang lawm ai ni hte Volunteer ni hku, World Youth Day hpe ntsa kaw na yu nga ai ni yawng hpe Chyeju dum ai lam tsun lai wa ai, grau nna ndai World Youth Day hpe shawng nnan byin wa hkra galaw hpang lai wa ai John Paul II hpe mung chyeju dum ai lam tsun lai wa sai.

Matut nna du sa ai Ramma ni hpe mung Chyeju dum ai lam tsun let nanhte gade ram kaja ai hpe Karai Kasang gaw chye nga ai, shi langai sha nanhte a masin salum hta nli gat dat ai hpe chye nga ai, dai majaw nanhte ramma ni manu shadan chye ra ai. Ngai nanhte hpe tsun mayu ai gaw ndai nhtoi laman ni hta na kaja grau ai matsing hpa ni hpe myit hta galoi mung dum nga na lam tsun lai wa ai.

Wa sarabyin kawn ndai lamang hta du sa ai ramma ni hpe tinang hta myit ba ai lam ni, myit daw ai lam ni pru wa yang anhte ni myit hpe asum jaw kau chye ai tinang a hkum hpe pat shingdang kau chye ai, dai zawn re ai lam ni hkrum wa yang ya ndai laman anhte ni lu la sai mahkrum madup hte chyeju ni hpe anhte ni kalang bai myit dum n-gun la yang grau nna hkam jan lu ai chyeju ni hkam la wa na hpe tsun shadum lai wa sai.

Wa sarabyin Francis kawn shi hpang jahtum hku myit tawn da ai lam ni hpe World Youth Day hta nlu shang lawm ai Ramma ni, Mungkan ting na shara shagu hta Diocese hku galaw nga ai ramma lamang ni hta shang lawm nga ai ramma ni hpe shakram dat ai lam mung tsun let anthe kahpu kanau ni yawng gaw Tangier hta hkrum zup na hpe tsun shapraw lai wa ai.

Wa sarabyin kawn shawa de (crowd) jam jau ai lam ni, majan tsin yam a majaw World Youth Day hta nlu shang lawm ai ni hpe anhte ni myit hte sha n-ga akyu hpyi ya ai hte mung shang lawm garum ya ga. Bai nna ndai ginra hta lam amyu myu a majaw nlu shang lawm ai ni mung nga na re,grau nna majan a majaw jam jau nga ai Ukraine na matu myit npyaw lawm ai lam tsun lai wa ai. Matut ramma ni hpe nanhte hte rau ngai mung du wa na lam hpe myit shing ran let galaw shakut nga ai hpe rau chyawm garan na matu tsun let anhte ni sim sa ai hpe ya myit shing ran da ai lam, sim sa lam a matu akyu hpyi ai lam gaw anhte a (future) htawm hpang e sim sa wa na matu  gaw gap taw ai lam re ai hpe mung tsun lai wa ai.

Wa sarabyin kawn “Obrigado” hpe anhte hpe prat hpe jaw ya sai ni, anhte hpe makam masham jaw ya lai wa sai ni, anhte a kaji kawoi hte anhte a npawt nhpang ni hpe chyeju dum ai lam hpe tsun garan lai wa sai.

Wa sarabyin kawn anhte mungkan masha ni yawng a shawng lam hpe “Mary, Queen of Peace” a lata hta ap ya sai, ndai lamang kawn nta de bai wa mat sai ramma ni hpe mung matut na sim sa lam a matu akyu hpyi ya na hpe saw shaga tsun shadum lai wa sai.

Grau nna mung tinang hkum nan sim sa lam a kum la rai sai, dai rai yang anhte ni amyu, ga hpan, labau ni nbung tim langai sha rai nga mai ai. Anhte ni gaw shara nbung ai kaw na sim sa lam a myit mada shara rai sai. Ndai lam hte seng nna anhte a shawn lam a matu Yawng hpe chyeju dum sai.

Missa nngut shi yang Wa sarabyin Francis kawn Mungkan ting na ramma ni hpe du wa na Jubilee hta sa du shang lawm na matu saw shaga let du na World Youth Day hpe Seoul kaw galaw na lam hpe ndau shana lai wa sai. Aten nhtoi gaw du wa na 2027 re ai hpe tsun shana lai wa sai.

Bai nna ya WYD hta du sa ai ramma ni hpe du wa na 2025 hta Rome kaw galaw na “Jubilee of Young people” kaw sa du shang lawm na matu saw shaga lai wa sai.

Hpang jahtum hku “Obrigado” hpe gaw Madu Yesu hte anhte a kanu rai nga ai “Bless Mary” hpe grai chyeju kaba ai hpe tsun lai wa sai.

Wa sarabyin hpang jahtum hku nna anhte hte galoi mung nga nga ai, anhte a prat hpe galoi mung nhtoi nnan hpe jaw ya nga ai hte anhte hpe gadai hte n bung ai tsawra myit the tsawra nga ai lam tsun lai wa sai.

Add new comment

1 + 0 =