Chyoi Pra Ai Wenyi Gaw Tsang Gang Nga Ai Hpe Mahkrai Hkrai Ya Ai Wa Rai Nga Ai Nga N na Tsun Ai

Wa Sarabyin Mungga Htawn

Wa Sarabyin: Chyoi Pra Ai Wenyi Gaw Tsang Gang Nga Ai Hpe Mahkrai Hkrai Ya Ai Wa Rai Nga Ai

 Chyoi Pra Ai Wenyi gaw Kabu Gara Shiga anhte a masin salum hta jung nga hkra garum ya ai; anhte shada a lapran tsan gang hkat ai hpe gara hku ni htep hkra galaw ra ai hpe mung sharin ya ai.

 San Peter Basilica Nawku Htingnu Kaba kaw Chyoi Pra Ai Wenyi yu hkrat wa ai poi laban Missa Hkungga nawng jau ngut ai hpang shani ka-ang “Sumsing Lamu A Hkawhkam Jan Akyu Hpyi Ga” tsun na shawng hta, “Madu Yesu gaw nanhte hpe yawng mayawng sharin ya na ra ai, bai Madu Yesu gaw ngai tsun ai lam ni yawng hpe mung nanhte myit dum na ra ai.” (Jn 14:26)

“Ndai lam ni gaw Chyoi Pra Ai Wenyi galaw ai lam ni rai nga ai; Shi gaw Madu Yesu anhte hpe shadum sharin ya ai lam ni hpe dum hprang hkrawn hkrang shangun ai rai nga ai.

Ta tut magam hta galaw ra ai lam lahkawng nga ai. Dai gaw (1) sharin shaga na, (2) shadum jahprang na lam rai nga ai. Dai rai yang she Madu a Kabu Gara Shiga gaw anhte a masin salum ni hta jung nga na ra ai.

Chyoi Pra Ai Wenyi Anhte Hpe Sharin Ya Ai

Chyoi Pra ai Wenyi anhte hpe sharin ya let garum ya nga ai. Tut dang ai lam ni hpe tawt lai lu na matu garum ya ai. Makam masham hta ngang grin nga na matu garum ya ai. Shada tsang gang hkat ai lam ni hpe shani ya ai.

 Madu Yesu gaw lai wa sai hkying lahkawng jan ni hta mungkan ga ntsa nga lai wa ai. Dai majaw Kabu Gara Shiga gaw labau zawn rai mat ai ngu myit la yang myit la na ma ai. Raitim, dai hku n rai nga ai. Madu Yesu hte Shi a Kabu Gara Shiga gaw mani, daini, hpawtni, aten shagu hta a nga nga ai.

Chyoi Pra ai Wenyi gaw tsan gang hkat ai hpe matut mahkai ya ai. Dai zawn tsan gang hkat ai hpe gara hku matut mahkai shani la ra ai hpe sharin ya ai. Chyoi Pra ai Wenyi hte rau Madu Hkristu a Mungga gaw anhte hta sak hkrung nga ai. Chyoi Pra ai Wenyi gaw Madu Yesu a sharin shaga ai lam  ni hpe aten shagu masha shagu hte matut mahkai ya ai.  Chyoi Pra ai Wenyi gaw anhte a myit hpe jahprang ya ai. Kabu Gara Shiga hpe bai myit dum shangun nna anhte a masin salum hta dawk bang da ya ai.

 Kasa ni gaw Yesu Madu hte masum ning tup rau nga rau hkawm let Shi a mungga law law hpe madat na la lu ma ai raitim, kachyi kajaw sha chye na matsing la lu ma ai. Chyoi pra ai Wenyi yu hkrat wa ai shani kaw nna gaw Yesu Madu a sharin shaga ai lam ni, Shi galaw ai magam ni, lamik kumla ni hpe bai myit dum let masin salum kaw nna nan chye na hkam sha wa ma ai.

 Kasa ni gaw Chyoi Pra ai Wenyi a chyeju hte Madu a mungga hpe kabu gara hkap la let shanhte a prat hta akyu jasawn jai lang ma ai. Chyoi Pra ai Wenyi gaw anhte a prat hpe galai shai ya ai. Shi gaw Madu Yesu a sumru ai lam hpe anhte a sumru ai lam shatai ya ai.

 Madu Yesu a lam Chyoi Pra ai Wenyi shadum shadut ya ai lam n nga ai rai yang anhte a makam gaw malap mali hpa tai na re. Dai majaw Hkristan ni yawng Chyoi Pra ai Wenyi hpe kam hpa kam sham let nawku daw jau akyu hpyi nga ga, ngu Wa Sarabyin hpang jahtum mungga hte Hkristan ni yawng hpe saw shaga da nga ai.

Source: Vatican News

 

By Fr. Patrick Gawmaw Hkawng Yae

#vaticannews

#rvakachinservice

#popefrancis

 

Add new comment

8 + 3 =