Christan Hpung Masha Ni A Makaam Masham Gaw Tsawra Myit Hpang Gara Nga Ai Ni Hpe Tsawra Myit Jaw Ya Lu Ai Mahtai Rai Nga Ai

Lai wa sai Laban shani na Missa hta Wa sarabyin Francis kawn anhte masha shagu hta byin nga ai “hpang gara ai” hpe gaw “Tsawra myit hte sha mai jahpring shazup ya lu ai” lam hpe tsun lai wa ai.

Zai bru jang hte Bum ni a tsit lali tsawm ai mabyin ni a majaw Mongolia Mungdan gaw Labau hte Htunghking mau mwi mau sa lam ni lusu ai Labau shang shara langai mi rai nga ai. Dai mungdan gaw, Shinggyim masha shagu a myit masin hta byin nga ai tsawra myit hpang gara ai lam hte myit ngwi myit pyaw sim sa ai lam ni hpe jaw ya ai Mungdan langai mi re ngu ga shadawn jaw mai nga ai.

Ulaanbaatar’s Steppe Arena ngu ai shara na Laban Missa hkungga hta Wa Sarabyin Francis gaw “ Anhte ni a kraw kata hta Hka Hpang gara ai hte tsawra myit hpang gara ai lam nga chye ai hpe Shakawn Kungdawn Laika hta mahta nna tsun shadum dan lai wa sai. Matut nna akyu hpyi ai lam gaw : Karai Kasang Wa e, nye wenyi gaw hka hpang gara nga ai. Hka n nga ai shara hkun hkraw ai hte myit shuk shak ai lam ni law la nga ai nye a hkum hkrang asai ashan ni gaw hkun hkraw nga sai” nga nna akyu hpyi ap let, tsun shana hpang lai wa sai.

Shakawn Kungdawn Sara wa ka da ai laika daw kaji langai mi hta, “ Anhte a myit masin kraw lawang kata hta Mongolia mungdan zawn hkun hkraw nga ai hte hpang gara ai prat hkrun lam ni hpe shawng myit dum let yin la nga ga” ngu nna Wa Sarabyin shawng nnan saw lajin da nga ai. Anhte ni yawng gaw Karai Kasang a lagaw katsut ni hkrai rai nga ga ai. Myit pyaw lam hpe lu la na matu shara shagu hta hkawm sa let kawan hkawm ai , Hpung masha ni yawng gaw tsawra myit ngu ai hpe tam kawan hkawm nga ai kam sham ai kashu kasha ni hkrai rai nga ai.

“ Tsawra ai Nu Wa Hpung Masha ni yawng hte anhte Hkristan Hpung masha ni gaw tsawra myit hpang gara nga ai ni a matu mahtai rai nga ai zawn mahtai tai nga ga. Hpa majaw nga yang ya ten Mungkan hta tsawra myit hkun hkraw nga sai re.

Dai Tsawra Myit Hpang gara ai lam gaw anhte shinggyim masha ni a matu ahkyak dik ai hte sung dik ai lam langai mung rai nga ai. Dai hta Anhte Hkristan Hpung masha ni gaw Karai Kasang kaw na hkam la lu ai myit simsa ai lam, tsawra myit ni hte san seng ai salum ni hte asak hkrung nga let, Chyoi pra ai Wenyi jaw ai atsam hte hkam la lu ai, anhte a kashu kasha, anhte a magam bungli, anhte a myit yaw shada ai lam ni hpe mu nna, kaga masha ni Karai Kasang a tsawra myit hpe mu mada wa lu na matu kasi kaja tai ai hte hpang gara nga ai ni hpe garan gachyan let Madu a Hpung shingkang hpe shadan shadawng let hkawm sa nga ga. Ndai lam ni gaw mai kaja ai lam ni rai nga ai “ nga nna Wa Sarabyin Francis tsun dan lai wa sai.

Anhte a prat hta kalang lang hkun hkraw ai, pu ba ai hte hpa n nga ai zai bru jang hta hkawm sa nga ai zawn nga na hkam sha ai, asak hkrun lam nga wa ai ten hta mung Madu a chyum mungga ngu ai ntsin hte bai shalan shabran la ai hte tinang a myit masin chyinghka ni hpe bai hpaw jasan da nga ga. Anhte a Madu Yesu Hkristu gaw anhte hpe mungga hkaw tsun ai ni yawng hpe Chyoi pra wenyi Karai up hkang jai lang ai hte n-gun jahpring ya let, anhte a hkun hkraw let hpang gara nga ai prat hpe mungga ngu ai hka ntsin jaw ya ai re.

Anhte ni gaw Karai Kasang a tsawra myit hpe galoi shagu hkam la lu nga ai ni re. Dai tsawra myit gaw anhte a makam masham hpring ai salum hpe galoi mung bai shalan shabran ya nga ai hte , anhte nan mung dai tsawra myit hkungga hpe Karai Kasang hpe galoi mung ap nawng da ra nga ga ai. Dai majaw Karai Kasang jaw ai tsawra myit langai hte sha dai hpang gara nga ai lam mahkra hpe shazim shamai ya ai hte simsa ai lam hpe jaw ya nga ai.

Wa sarabyin kawn Kabu gara shiga hta na Petru a lam hpe la kap nna anhte ni hpe tinang hkum tinang hpe nyet nna Madu Yesu zawn Udang hta si hkrum ai hpe hkam la na matu myit shajin da ai rai yang anhte a prat hta hpang gara ai lam hpe myit shadik la lu na re ai lam hpe tsun lai wa ai.

Dai lam gaw Karai Kasang gaw anhte hpe mu tam shangun mayu ai lam langai mi mung rai nga ai. Anhte ni yawng hte Mongolia mungdan hpe mung tengman ai sim sa lam lu la shangun mayu ai lam mung rai nga ai. Nang myit sim myit sa na matu, mying kaba nra ai, gumhpraw lu n ra ai, Arawng power nga nra ai, anhte a hpang gara nga ai myit masin hpe sim sa ya shangun lu ai gaw Karai Kasaw kaw na lu la ai tsawra myit langai sha rai nga ai. Dai tsawra myit gaw anhte a ningma ni hpe shamai ya lu ai zawn, tengman ai tsawra myit ni hpe jaw ya lu nga ai” nga nna Wa Sara byin Francis tsun shadum lai wa sai.

Madu Yesu gaw Petru hpe ...Shi a ga hpe madat mara let, myit kraw lawang hta hkan nang hkan sa na matu hte, Mungkan ting hta nga ai masha ni hpe shi a sape shatai na matu, Madu hkawm lai wa sai lagaw lahkam shagu hpe hkan galaw shatup lu na matu hte Mungkan myit myit let Karai Kasang hpe myit shut, kam shut ai lam ni hpe n galaw na matu saw shaga nga ai zawn, dai ni anht1e hpe mung Karai Kasang saw shaga nga ai lam” Wa Sarabyin Francis tsun dan lai wa sai.

Anhte ni dai zawn galoi mung galaw nga ai teng yang gaw, Madu Yesu hte Chyoi pra ai Wenyi a lam woi matsun madun ya ai tsawra myit hte galoi mung sak hkrung hkawm sa nga lu na rai nga ai. Dai Madu a Kabu Gara Shiga gaw anhte a prat hkrung lam hten za maw nga ni hpe bai asak ningnan jaw let jahkrung ya lu nga ai. Anhte a Kawa Karai Kasang gaw htani htana anhte hpe shi a tsawra myit hte kabu gara shangun ai myit masin hpe galoi mung jaw ya nga ai, kaup kahprwi nga ai,” nga nna Wa Sarabyin Francis gaw tsun shana dan lai wa sai.