Cardinal Charles Bo: Mungdan Asuya Hte Mung Shawa Masha Ni Gaw Kun Dinghku Langai Hte Bung Nga Ai

August 22, laban ya shani, Cardinal Charles Bo, Misa Hkungga nawng jau ai hta dai shani na chyum laika ni hte anhte Myanmar mungdan masa lam hpe sumru, sharin shaga da nga ai hpe CBCM-OSC Shiga Dap kaw nna ndau da ma ai.

Shinggyim masha ni hte shinggyim masha ni a lapran byin nga ai mabyin ni hta Karai Kasang anga nga u ga. Asak hte seng ai Madu Yesu a mungga gaw anhte a hkum hkrang, myit masin wenyi machyi ai hpe shamai shatsai ya u ga. Aten ladaw shagu, Yesu Hkristu gaw anhte a sagu rem wa kaja rai nna, manang kaja tai ya nga ai, lam matsun ya nga ai; Shi hta matut manoi kam sham nga ga, ngu ga hpaw tsun da ai.

Covid-19 tsin-yam hkrum hkra machyi ai lam yawm wa nga ai majaw chyeju dum ra ai; raitim, tinang a shakut shaja ap nawng ai lam ni, masin masa ni hpe shayawm kau na matu gaw n rai nga ai. Tsin-yam law law hpe rau mahtai tam hparan sa wa na ra ahkyak nga ai. Shinggyim nau na shada hkap la, garum shingtau ai lam, hkam ja lam hte seng ai hta garum madi shadaw ai lam ni hta shawng lam kaw ap nawng nga ai ni hpe myit kraw lawang kaw na nan chye ju dum ra ga ai.

Ndai akyu chyeju ni a majaw Karai Kasang hpe chyeju dum ra ga ai zawn, matut nna mung akyu hpyi chyeju hkam la ra nga dingyang rai ga ai.

Dai shani hti ang ai chyum laika hpe sumru woi ai hta, Karai Kasang gaw anhte hpe galoi mung n kabai da ai lam rai nga ai. “Karai Kasang hta kam sham ai anhte a makam hpe madun nga ga ai kun?” ngu ai ga san gaw shinggyim masha ni a matu htai yak ai ga san rai nga ai; Grau nna, ya ten, Myanmar mung shawa masha ni a matu htai yak dik ai ga san rai nga ai; hpa majaw nga yang ndai shaning ni hta sakse madun na nau n nga ai, nau n mu lu ga ai. Yak hkak jam jau lam law wa ai shaloi Karai Kasang hta kam sham myit mat mat taw ai kun?

Chyum daw langai hta Yawshu hkrum katut lai wa ai. Mawshe si mat ai hpang she, Ningbaw Yawshu hte Israel myusha ni Caanon mare hpe hkam la lu ai; Israel myu lakung 12 hpe lamu ga sutgan chyeju ni garan ya ai; Shanhte ni Karai Kasang a chyeju hpe dum chye let chyeju dum chyeju htang na ma ai hpe myit mada lai wa ai; Teng man Karai hpe nawku na malai, hpara sumla ni hpe naw mat ai ni hpe Yawshu gaw Mawshe zawn sha man hkrum hparan ra ai. Ga Shaka Dingsa prat hta Karai Kasang gaw Israel myusha ni hpe kasi kaja madun ai ni tai mu ga matu lata san da ai; hpara sumla ni hpe nawku na matu lata san da ai n rai nga ai.

Chyum laika gaw, shinggyim masha ni Karai Kasang hte nihtep hku hkau na lam mat mat nga ai hpe madi madun ya ai.

Lagawn lamawn ai ni gaw sak hkrung lam hpe n lata ai sha, si hkrung si htan lam hte hpara sumla ni hpe nawku ma ai. Kasi kaja madun ai ni hku sak hkrung nga pra na kun, shing n rai, hpara sumla ni hte si hkrung si htan lam hpe nawku na kun, ngu ai myit um ang ai lam ni byin nga ma ai; kasi kaja tai na matu gaw yak hkak ai lam ni law law nga ai teng nga ai. Hpara sumla ni hpe nawku ai gaw loi grau nga ai; hpara sumla ni hpe nawku ai hta hpyi shawn hkrum ai lam law law n nga ai.

Anhte Myanmar mungdan hta hpara sumla ni rai nga ai, gumshen ai mungkan arawng ya, daru magam, lai jan sutsu ai lam ni, tara n shang sut masa lam ni, shingra makau grupyin ni hpe jahten ai, ndai ni gaw hpara sumla naw ai lam rai nga ai ngu Cardinal madi madun da ai.

Up hkang ai ngu ai gaw, Chyum Laika lachyum hte rai yang, daw jau ai lam, shangun ma tai ai lam rai nga ai. Yesu Madu gaw Karai Kasang rai tim, Shi hkum shi Karai Kasang hku n hkam ai ai sha, shagrit shanem ai hte shinggyim masha hte maren mara shatai la ai. Karai Kasang ngu ai hkinghtawng amying shingten hpe tawn da nna shangun ma prat hpe dagraw la ai (Hpi 2:6-7).

Mungdan Asuya shagu, shanhte hta nga ai daru magam arawng aya ni gaw Karai Kasang kaw na daru magam re ngu hkam la hpap la n chye dingyang gaw mung shawa masha ni hpe daw jau na, shangun ma tai na magam hpe galaw sa wa lu na n rai nga ai. Dai hku n galaw ai sha, gumshen ai daru magam arawng aya hta, lai jan sutsu lam hta sha matut hkawm sa ai rai yang, Karai Kasang ra sharawng ai hte n htan shai nga ai. Daru magam arawng aya lu ai, up hkang na daru magam ngu ai gaw shinggyim masha ni hpe daw jau na matu re ngu Wa Sarabyin Francis mung chyahkring hkring tsun shadum da ai lam Cardinal Charles Bo sakse hkam tsun dan da nga ai. Mara n nga ai masha ni hpe n tara ai hku up hkang, dang sha, shangun sha na matu n rai nga ai; Daw jau na matu she rai nga ai, ngu mung Cardinal matut sang lang shadum da nga ai.

Mungdan daru magam up hkang ai Asuya hte mung shawa masha ni gaw kun dinghku langai hte bung nga ai ngu San Pawlu madi madun da ai ngu dai shani na chyum daw 2 hpe sumru woi let sharin shaga da nga ai.

Daru magam arawng aya ngu ai gaw ntsa de nna lawu na ni hpe up hkang shangun sha ai lam n re ai, arang shaw arang bang ai lam shagu hta n-gum atsam marai byin shangun ai rai ra ai. Kun dinghku shagu hta, Nawku hpung ntsa Hkristu tawn da ai tsaw ra myit zawn, tsaw ra myit hte makyit makai da ra ai.

Anhte myi hte lama ma hpe yu jang myi lahkawng yan gaw maga mi de sha rau yu ai. Myi langai gaw maga mi de kaga myi langai gaw laga kaga maga de yu ai rai yang myi n da ai ngu tsun ga ai. Asuya ngu ai gaw myi langai, mung shawa masha ngu ai gaw myi langai rai nga ai; ndai myi lahkawng gaw bangdung langai hpe sha rau yu ra ai.

Mungdan hpe tara rap ra ai hta gaw de ra ga ai.

Kabu Gara Shiga hpe mung sumru woi ai hta, Yesu Madu shawa masha 5000 hpe lusha daw jau ai hpang kasa ni hte san htai sang lang dan ai lam hpe sumru woi da nga ai. Hkristu gaw asak hkrung na lam hte seng nna tsun ai rai nga ai. Kasa ni hte rau asak muk rai nga ai Hkristu hpang hkan nang na ga ai kun? Anhte langai hpra gaw tingkyen myit ni hte hpring nga ai mungkan hta shangai wa ga ai. Tingkyen myit myit ai gaw tinang hpe shingtai hkam sha shangun ai zawn, kaga masha ni hpe mung sharu shayak lam shabyin ya ai. Anhte a makau grupyin kaw dai lam ni hpe mu lu nga ai. Wenyi hte hpring ai ni gaw teng man dinghpring ai masin salum hpe madu lu na myit sharawng awng ai hte shakut nga ma ai. Myit san seng ai hte teng man dinghpring ai lam hpe hkap la hkan sa na gaw anhte a matu ahkyak dik la nga ai.

Anhte a prat gaw agung alau ni hte hpring nga ai; dai agung alau ni hpe shabyin ai gaw tingkyen myit rai nga ai. Nhprang sut rai ni hpe manu dan n hprang ja gumhpraw sutgan ni tai na matu wan hte jasan jaseng la ra ai zawn, Karai Kasang mung anhte hpe jasan jaseng ya na matu mara ni hpe kashin shatsai ya nga ai; Karai Kasang a wenyi hte bung pre ai ni tai nga na matu Karai Kasang anhte hpe aten shagu jasan jaseng ya nga ai. Ja hpe wa hte nat nna chyam yu ai zawn, anhte a masin salum hpe gaw Karai Kasang e chyam dinglik ya ra nga ai.

Ngai gaw sumsing lamu de na yu hkrat wa ai asak jaw ai muk re ngu Madu Yesu sakse hkam da ai. Shawng na laban anhte na lu ai hta Yesu Madu muk hte nga hpe shalaw nna lusha jaw sha ai hpe hkam la ai ni, Yesu Madu gaw sumsing lamu na yu wa ai muk re ai, htani htana asak hpe madu mayu yang shi a hkum hte sai hpe hkam la ra na ngu tsun ai shaloi, dai masha 5000 hte rau sape ni shi kaw na pru mat ma ai. Hpang jahtum kasa 12 sha ngam ma ai. Nanhte mung pru mat mayu ai rai yang pru mat mai ai ngu Yesu tsun ai shaloi, Kasa Petru gaw nang gaw htani htana asak lu ai wa, Karai a kasha rai nga ndai, anhte sa na shara kaga n lu ga ai ngu bai htan ai.

Labau hta mying dan hkrung lai wa sai ni yawng hpe mung Karai Kasang chyu sha jahkrung sharawt la lu ai. Shanhte mung Karai Kasang lajang da ai hta sha nga lu na rai ma ai ngu sang lang jahpra dan let, Mungdan Asuya hte Mung shawa masha ni gaw kun dinghku langai zawn, masha hkrum hkrang hta na myi lahkawng zawn bung pre ai ban dung hta hkawm sa na matu n-gun jaw shadum da nga ai.

By Fr. Patrick Gawmaw Hkawng Yae

#cbcmosc

#vaticannews

#rvakachinservice