Anhte Nawng Jau Ai Misa Hkungga Ni A Marang E, Mungkan Ting Hpe Galai Shai Shatsawm Ya U Ga

Wa Sarabyin: Anhte Nawng Jau Ai Misa Hkungga Ni A Marang E, Mungkan Ting Hpe Galai Shai Shatsawm Ya U Ga

June 6, Madu Yesu a Hkum hte Sai Poi Laban shani na Misa Hkungga hta, Anhte nawng jau ai Misa Hkungga ni gaw mungkan ting galai shai tsawm htap wa na matu rai u ga ngu Wa Sarabyin Francis tsun da nga ai.

Chyum Mungga hpe dai shani hti ang ai San Marku a Kabu Gara Shiga hpe lakap nna mungga hpe htawn tsun da ai.

Hka ja sa ai ai masha gaw kasa yan hpe daw sha poi a matu hkyen lajang da ai nta ntsa gawk hpe madun dan ya ai. Ndai mabyin sumla hkrang gaw anhte Karai Kasang hpe hpang gara nga ga ai hpe shadan shadawng ya nga ai; Shi hpe anhte ra kadawn nga ga ai ngu ai hpe shadum ya nga ai; Shi anhte hte rau nga nga na hte anhte ntsa tsaw ra ai lam ra kadawn nga ga ai hpe shadan shadawng ya ai; anhte hkrai n nga lu ga ai, htani htana asak lusha hpe hpang gara nga ga ai ngu ai hpe shadan shadawng ai ngu Wa Sarabyin sumru sang lang da nga ai.

Daini na Nawku Hpung gaw prat hta hkan nna masha ni hte gara hku matut mahkai tsun shaga na hpe Kabu Gara Shiga a lam matsun ya ai mung rai nga ai.

Madu Yesu hte Kasa ni Shalai Wa Ai Daw Sha Poi hpe nta ntsa gawk kaw galaw nga ma ai. Dai gawk gaw muk hpe ahkyep alep di nna jawm sha ai ram daw kaba ai gawk rai nga ai. Yesu Madu dai gawk hta Shi hkum hpe kaji ji rai garan ya ai shara rai nga ai. Dai hpe myit dum na matu grai kaba la ai salum anhte hta nga ra na ga i? Anhte hta nga ai salum hpe Yesu Madu a matu hpaw da ya na gaw ahkyak madung rai ga ai. Anhte a hkum hpe mung ahkyep alep di nna dai nta ntsa gawk, Yesu Madu nga ai shara, kaw sa du na ahkyak ga ai. Dai shara gaw Madu Yesu a Hkum hte Sai nga nga ai Misa Hkungga nga ai shara rai nga ai.

Nawku Hpung mung gawk kaba ra ga ai, gawk kaji sha n mai re ai; wuhpung kaba hku shang lawm ai ni yawng lata ladawn garum shingtau ya mai ai hte yawng hpe hkap hkalum la mai ai shara rai ra ai. Misa Hkungga ngu ai gaw hkri ba lit li gun ai ni hte kaw si hpang gara hkrum nga ai ni hpe daw jau na matu rai nga ai.

Madu Yesu Muk hpe ahkyep ai lachyum gaw Misa Hkungga hta lak lai kaba lam langai rai nga ai. Madu Yesu nni nkri hkam si hkam nna Shi a hkum hpe anhte a matu ap nawng kau ya ai rai nna anhte hpe asak ningnan hta bai shangai shangun ai rai nga ai. Karai Kasang a sagu kasha Yesu Hkristu gaw anhte hpe asak jaw ya na matu Shi a hkum hpe nawng jau kau ya ai rai nga ai. Dai majaw Misa Hkungga gaw tsawra Karai Kasang hpe nawku daw jau ai magam hta hkum tsup dik htum nawku daw jau lam rai nga ai.

Misa Hkungga jawm nawng jau ai a marang e, anhte shada da a matsan jam jau yak hkak jam jau lam ni hpe garan gachyan hkat let tsawra myit kaba hte shada ra kadawn ai lam hpe garum shingtau ya hkat ga ai rai nga ai.

Hpu nau ni a matu muk ahkyep let Misa Hkungga nawng jau nga ga ai rai yang, anhte a Misa Hkungga nawng jau ai lam ni gaw ndai mungkan ga hpe galai shai shatsawm jahtap sa wa lu na rai ga ai.

Mungga jahtum hta, Yesu Hkristu a Chyoi Pra ai Hkum hte Sai poi masat dingsat hku Chyoi Pra Hkum hpai shinggyup akyu hpyi ai lam hpe galaw na lam, dai gaw anhte Yesu Madu hpe hpu nau ni hpang de woi sa ya ai re lam, dai zawn galaw ai lam hpe shani shagu anhte hkrum ang ai hpu nau ni a matu Yesu Hkristu hpe gun sa ya ai re majaw kam sham ai wuhpung masha ni yawng jawm hpawng de ai Nawku Hpung rawt jat galu kaba wa shangun ai tai ai rai nna masha hkum shagu Karai kasang hte hkrum matut lu ai kaba la ai gawk hta hkap tau la ai mung rai nga ai ngu Wa Sarabyin Francis Yesu Hkristu a Chyoi Pra ai Hkum hte Sai poi laban shani na mungga hta hkaw tsun da nga ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-06/pope-francis-may-our-eucharistic-celebrations-transform-world.html