Anhte A Makam Masham Hpe Garan Kachyan Ai Gaw Kade Daram Tsawm Htap Nga A Hka

Wa Sarabyin Francis kawn lai wa sai Pasaka Laban Bat Masum hta anhte ni hpe Karai Kasang hte rau anhte a hkum hpe gara hku matut mahkai nga ai lam hpe dum chye na hte anhte a makam masham hpe masha ni hpe garan kachyan ai (share), hting let ya ai lam galaw ai gaw kade daram tsawm htap nga ai ngu ai lam hpe dinglik yu na matu tsun lai wa ai. Anhte ni Karai Kasang hte rau hkrum shaga lu ai lam gaw gade daram wa tsawm htap nga a hka, ndai zawn re ai hpe anhte ni galaw lu ai kabu hpa lam hpe masha ni hpe bai garan kachyan ya na gaw ahkyak nga ai hpe tsun lai wa ai.

Lai wa sai Laban shani hta ya sha na lam hpe madung da nna tsun shadum lai wa ai. Dai shani hti ang ai Luke a kabu gara shiga hpe la kap nna tsun lai wa ai. Dai hta Emmaus kaw na bai nhtang wa ai Kasa marai Lahkawng gaw shanhte a Kasa manang ni hpawng nga ai hta Madu Yesu hte rau hkrum lai wa ai lam hpe tsun da ai lam rai nga ai. Wa Sarabyin kawn ndai lam hpe yu yu ga shan lahkawng a prat hpe kade daram galai shai kau ya nga ai ngu ai hpe myit sawn sumru yu na hte anhte mung Madu Yesu hte rau hkrum zup ai lam gaw anhte a prat ting hpe galai shai kau ya lu nga ai hpe myit yu na matu tsun lai wa ai.

Wa Sarabyin kawn anhte ni Karai Kasang hte hkrum zup ai a marang e anhte a prat ni galai shai mat ai rai tim, ndai zawn kade wa tsawmhtap nga ai lam ni anhte hta nga ai rai tim masha ni hpe tsun shapraw dan na mayak ni naw nga nga ai hpe tsun lai wa ai.  Anthe marai hkum shagu ndai lam hpe masha ni hpe sharin shaga ai hku nre ai sha, shi gaw kaja wa anhte a masin salum hpe kabu shangun nga ai, anhte a myiprwi ni hpe katsut kau ya ai, bai anhte hpe gwi na atsam jaw ya ai, anhte hpe myit dik myit pyaw lam jaw ai, n gun atsam jaw ai hte myit shadut ai lam ni (or) simsa ai lam, lanu lahku ai hte mara dat hkyem sa ya ai lam ni jaw ya ai hpe anhte ni gaw bai garan kachyan ra ai hpe tsun lai wa ai.

Wa Sarabyin kawn ndai zawn re ai lam ni hpe anhte a nta masha ni a lapran e, wuhpung wuhpawng hte manaw manang ni a lapran hta garan kachyan na grau ahkyak nga ai lam hpe tsun shadum lai wa ai. Wa Sarabyin kawn Karai Kasang kaw anthe a hkum hpe ap da ai a marang e anhte hta byin pru wa ai hkam sha lam hte myit sawn ai lam ni gaw anhte hkawm sa na lagaw lahkam ni hpe bai kaja wa hkra myit sawn shangun nga ai hte anhte a makam masham sak hkrung lam hta anhte shakut shaja nga ai atsam ni hte bungli ni hpe grau nna rawt jat chye na wa shangun ai hpe tsun lai wa ai.

Lama na anhte ni ndai hpe galaw ai rai yang” Madu Yesu shi a kasa ni hte rau hpang jahtum na dawsha poi “evening Passover” hta galaw ai zawn anhte hkum nan shi hte hkrum shaga ai zawn anhte a makau grup yin htingbu ni hpe mung grau nna tsawm htap wa hkra lu galaw na re ai hpe tsun lai wa ai. Anthe masha shagu gaw Karai Kasang rau hkrum zup lai wa ai hpe bai myit dum nna tinang hkum tinang bai myit sawn sumru na matu tsun lai wa ai. Wa Sarabyin Francis kawn “anhte jahkring mi azim sha nga nna”  ngai Karai Kasang hte rau galoi ten hkrum lai wa sai kun?“ngai Karai Kasang rau galoi ten hta ni htep lai wa sai kun?” ngu ai hpe myit sawn dinglik yu na matu saw shaga lai wa ai. Wa Sarabyin kawn anhte ni  Karai Kasang hte rau hkrum zup lu ai a majaw lu la ai chyeju ni hpe masha ni hpe bai garan kachyan nna , shi hpe shakawn kungdawn shagrau nga ai kun ngu ai hpe san lai wa ai. Dai zawn sha anhte hpe masha ni mung shanhte Karai Kasang hte rau hkrum lai wa ai lam hpe garan kachyan wa yang nanhte ni madat ya na kun? nga nna san lai wa ai. Wa Sarabyin Francis kawn anhte ni a makam masham hpe garan gachyan nna anhte a wuhpung wuhpawng hpe Karai Kasang hte rau hkrum zup ai shara kaba bai tai wa na matu Kanu Maria kaw garum hpyi let shangut lai wa ai.