2021 Shaning Na Matu Mungkan Sasana Nhtoi Masat Da Lu Sai shiga

Du na October 24 ya shani, 2021 shaning na matu Mungkan Sasana nhtoi hpe Wa Sarabyin Francis kawn masat da ya sai lam January 29 ya shani, Vatican Shiga Dap kaw nna ndau da ma ai.

“Sasana magam hta, grau nna ndai chyam bra ana tsin-yam hkrum ten, n gaw n wai tsawra myit hte sasana galaw ga” ngu Wa Sarabyin saw shaga da ai.

“Mu lu sai lam ni hte na lu sai lam ni hpe anhte ni tsun hkai dan na n loi la ai rai tim, tsun hkai shadan shadawng nga ga,” ngu ai Kasa laika hta na Kasa ni a sakse hkam ai gwi ai myit jasat hpe kasi la hkang shapraw sa wa na matu mung saw shaga da ai.

Karai Kasang a tsaw ra ai atsam hpe anhte ni hkam sha saga ai hte maren, Shi a Kawa myit hte masha hkum shagu hte wuhpung ni a prat hta nga nga ai hpe myit dum let anhte mu la na la ai lam ni hpe ndau shachyam shabra nga ga ngu bat manga ya shani Wa Sarabyin saw shaga da ai.

Kasa ni anhte hpe tsun da ai lam gaw hpa rai ta?

Madu Yesu a shagrit shanem ai myit hte Shi a Sape ni hpe hku hkau kanawn mazum ai gaw anhte shinggyim kabu pyaw ai hte jam jau hkam hkam jan ai lam ni hpe Shi a Karai tsawra myit hte anhte a myit mada lam shatai tai ya ai hte anhte hte galoi mung seng nga ai lam madun let anhte shinggyim prat hpe Karai Kasang shi a shatai la ai.

Madu Yesu hte seng ai lam yawng gaw anhte hpe shadum sadi jaw ai lam rai nga ai. Shi gaw anhte mungkan ga hpe hkrak chye ai. Mungkan ga gaw hkye hkrang la lam hpe ra kadawn nga ai. Dai hkye hkrang la lam lu u ga sasana galaw na matu Shi anhte hpe saw shaga nga ai.

Kasa ni a mahkrum madup hte, anhte gaw masha hkum shagu hta shi a shi byin nga ai hte maren Karai Kasang a tsaw ra myit a marang e, hku hkau masa hte hkrum shaga na matu Kasa ni anhte hpe tsun dan nga ai ngu Kasa ni a sasana labau hpe lakap let Wa Sarabyin Francis matut shadum da ai.

Karai Kasang a tsawra matsan dum lama ai myit hte manang majing tai let sharin shaga ya ai mahkrum madup gaw Kasa ni hta shaprai kau n’lu, malap kau n’lu ai matsing masat kaba nan rai nna, mau hpa lam ni hpe shabyin shangun ai; kabu pyaw lam ni jaw ya ai hte chyeju dum chye ai myit masa hpe mung shabyin ya ai.

Yesu hte rai yang anhte mung laklai ai lam ni hpe mu lu na lu nna laklai mahkrum madup hkam la lu na ga ai. Nawku Hpung masha ni hpawng de ai wuhpung wuhpawng gaw Karai Kasang anhte hpe shawng tsaw ra ai re ai hpe dum chye nna chyeju dum chye ai rai yang laklai kaba dik ai lam ni hpe madun dan lu na rai ga ai.

Shi nang kaw n rai sai, Shi hkung rawt mat sai ngu ai shiga gaw anhte a prat hta mau hpa atsam rawng ai shiga kaba rai nga ai. Dai shiga hpe anhte a myit masin salum hta na la lu saga ai hte hkaw tsun shachyam shabra saga ai.

Anhte a myit masin salum hta hkam la lu ai Mungkan Sasana Nhtoi mungga hpe kaga hpu nau ni kaw gun sa ya na matu mung n gun jaw da ai. Dai gaw daw jau na matu shaga la ai hta hkan nang ai rai sai.

N-gun kya ai, n hkum tsup ai, n galaw lu ai masat sadang ni nga ai, yak hkak jam jau lam ni nga ai masha ni rai tim, sasana magam hta shanhte galaw lu ai ladat hte mai kaja lam a matu garan gachyan ai lam ni nga ra ai ngu mung n gun jaw da ai.

Anhte hkum anhte myit shaja atsam dat ai a marang e, anhte hkum anhte n gun bai ban la lu na rai ga ai. Sasana magam gun hpai na matu shaga la hkrum ai gaw lai mat sai aten na matu n rai nga ai; du na ra ai aten a matu she rai nga ai. Matsan dum myit kaba hte Shi a Kabu Gara Shiga htawn ai ni tai na matu Yesu anhte hpe ra taw ai.

Galoi raitim, grau nna, ndai chyam bra ana tsin-yam hkrum ten hta, anhte hte hkum hkrang hku ni htep ai ni hpe shani shagu galaw lu ai lam yan ni hte garum ya na matu n gun jaw let Wa Sarabyin Francis shi a mungga hpe ginchyum dat da ai lam Vatican Shiga Dap kaw nna ndu da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-01/world-mission-day-pope-francis-calls-for-a-mission-of-compassio.html