“Chyoi Pra Ai Wenyi Anhte Hpe Kashin Kamun  Chyeju Ningnan Jaw Ya Na matu Hpyi Ga” nga nna Wa Sarabyin Tsun

Lai wa sai laban , October 17  ya shani na shani ka-ang Angelus akyu hpyi hpawng hta sa du hpawng nga ai shawa masha ni hte hkrum ai shaloi Wa Sarabyin Francis gaw, “ Chyoi pra ai Wenyi  anhte hpe kashin kamun chyeju ningnan ni jaw ya na matu akyu hpyi ga’ nga nna Mungga htawn tsun lai wa ai.

Dai laban shani hti ang ai Madu a kabu gara shiga (Marku 10:35-45) hpe mahta nna Wa Sarabyin Mungga htawn tsun lai wa ai rai nga ai. Chyum Laika hta Kasa Yaku hte Yawhan gaw Madu Yesu hpung shingkan hte shi a mungdan na ting yang hta dung nna up lu ai shaloi Yesu a makau hta dung nga lu na matu ahkang hpyi shawn mu yang Madu Yesu gaw npawt nhpang madung sharin shaga ai mahtai lahkawng hpe jaw da ai lam Wa Sarabyin tsun shadum da nga ai.

“Kaja wa hkikhkam ai hpung shingkang arawng sadang ” ngu gaw masha wa a ntsa hta nga lu ai hpe tsun ai nre sha, Jerusalem Mare hta Yesu hkam la na kashin kamun baptisma  zawn anhte hkam la chye nga ra ai lam,  Kashin kamun hkalup hkam ai ngu gaw “ dip shalup ai, tsing tawn da ai lam” ngu ai lachyum rai nga hte maren Madu Yesu gaw  “anhte shinggyim masha ni hpe hkye hkrang la na ngu ai myit hte  Shi a asak prat hpe dip shalup da Hkalup hkam la ai lam re, dai majaw Madu Yesu a hpung shingkang gaw arawng sadang hte masha hpe dip ka-up  na matu shakut ai lam n re ai sha tsawra ai hte sak jaw apnawng  ai magam bungli  tai wa ai” nga nna tsun madun lai wa ai.

Bai Wa Sarabyin Francis gaw anhte hta  myit mang sumru ai lam lahkawng rai taw nga ai nga nna matut tsun ai.

Langai hta, Madu Yesu gaw sak jaw apnawng shangun mayu ai ten shi a sape ni gaw arawng sadang power rawt kaba mayu ma ai. Dai zawn anhte ni mung dinghta ga ntsa lam magup hpe hkam sha mayu ai, galaw mayu ai,  tinang a  pandung du na matu, arawng sadang lu na matu chyu sha shakut hkawm sa wa ai shaloi gaw Wenyi lam hta gawng kya wa ai hte kaja ai lam ni a shingdu de du wa chye ai lam tsun shadum da ai.

“Kaja wa hkikhkam ai hpung shingkang arawng sadang ” ngu gaw masha wa a ntsa hta nga lu ai hpe tsun ai nre sha, Jerusalem Mare hta Yesu hkam la na kashin kamun baptisma  zawn anhte hkam la chye nga ra ai

Dai majaw  “anhte a myit masin hta kaja ai teng man ai  yaw shada lam ni hpe galoi mung dinglik yu nna chye ginhka la na ahkyak ai lam, hpa mi galaw tim masha wa tinang hpe matsing masat shakawn shagrau na matu, tinang a arawng aya a matu galaw nga ai kun (shing nrai) kaja wa nan masha hpe daw jau ai, akyu jaw ai magam bungli galaw nga ga ai kun ngu ai hpe myit yu ra ai lam” tsun sharin ya lai wa ai.

Lahkawng hta gaw tinang hkum hpe shagrit shanem ai myit hte  masha ni atsa garum shingtau tsawra myit madun ai hta baw bang da na matu tsun ai rai nga ai. Madu Yesu gaw “tsawra matsan dum myit kaba hte anhte hkrum katup ai masha ni a ntsa hta baw bang let daw jau nga na matu saw shaga da ai, Wudang ntsa ningma hte jen noi si hkam ai Madu Yesu hpe yu ai shaloi Karai Kasang anhte hpe kade  tsawra ai ngu ai shi galaw ai amu lam hpe anhte mu lu ai.  Kasa ni hpe  lagaw kashin ya ai sungdik ai shagrit shanem ai lam hpe galaw ai. Karai Kasang gaw tsawra myit re ai, tsawra myit gaw shagrit shanem ai:  Tsawra myit gaw shagrau sha-a ai lam nnga ai, Tsawra myit gaw Lamu na hkrat ai marang zawn rai nna asak hka hpawk shatai ya ai” nga nna Wa Sarabyin tsun shadum da nga ai.

Hpang jahtum hta tinang hkum tinang “ madang tsaw la ai, arawng aya lu mayu ai myit jasat ni  kaw na  “shagrit shanem let  daw jau ai lam hta gara hku baw bang na” shing nrai, “masha hpe gara hku garum tsawra myit madun lu na” ngu ai hpe anhte myit ga, ap awng ai lam kaja ai zawn anhte hkam la da ai kashin kamun hpe hkrang shapraw lu na matu  Madu Yesu a lam hpe hkan nna anhte ra marin ai lam hpe tawn kau let masha wa matu daw jau ai lam hta shang lawm ga, Nu Maria zawn shagrit shanem let Karai Kasang a matu  shi a prat ting lup da ai hpe katsi la let, Chyoi pra ai Wenyi gaw anhte hpe dai zawn re ai kashin kamun  chyeju ningnan jaw ya na matu hpyi ga, ” nga nna Wa Sarabyin tsun madun lai wa ai lam Vatican shiga dap kaw nna shana dat ma ai.

Source: May the Holy Spirit renew the grace of Baptism in us - Vatican News