Yi Sun Galaw ai San Pra ai Isidore a Poi Nhtoi (May 15) 15 May 2022

Yi Sun Galaw ai San Pra ai Isidore a Poi Nhtoi (May 15)

 

San Pra ai Isidore hpe Yi Sun Hkaunau galaw sha ni a laksan kam shamyet ai San Pra ai Masha nga nna masat shagrau da ai rai nga ai. Shi gaw, tsaban (21) htum wa maga de, Spain Mungdan, Madrid Mare kaw matsan mayan re ai kanu yan kawa kawn shangai chyinghkai wa ai rai nga ai. Shi a asak grai naw kaji ai ten kaw nna mare shinggan na yi sun hkauna hkan nchyang galaw lai wa sai. Shi gaw, hkum gawng shingyan grai tsawm ai hkawnsek langai mi hte kun dinghku de wu ai. Shan hkawng a nnan lu ai ma gaw, asak grai naw kaji yang n nga mat ai majaw, shan gaw dinghku kanawn mazum lam hpe tawn kau na myit hkrum daw dan ma ai.

 

Isidore gaw, jahpawt shagu amu magam yingam de garai n sa shi yang, Nawku Jawng de shawng akyu sa hpyi ai; sun kaw amu galaw nga ai aten hta mung, akyu hpyi ai; Nawku Hpung a Poi Nhtaoi ni hta Madrid mare kaw na Nawku Jawng ni kaw sa du akyu hpyi hpyi rai wu ai. Kalang mi na shi hte rau bungli galaw nga ai ni gaw, Isidore a makam masham lam grai hkan shatup ai amjaw, amu sa hpang hkrat ai, nga nna mara shagun ma ai. Dai zawn rai mara shagun ai lam jaw n jaw chye lu na matu, amu madu gaw shara mi kaw makoi nna lagyim yu nga wu ai. Teng sha na, Isidore mung amu sa hpang hkrat ai hpe amu madu mu kau wu ai. Raitimung, Isidore hpe lamu kasa ni law law gaw, amu galaw garum ya nga ai hpe mung amu madu mu wu ai.

 

Isidore gaw, matsan masha ni hpe garum jaw ai lam kaga masha ni htan grau dawn jan nga ai, Matsan masha ni hpe shi jaw ai kaw na shanhte sha nna ngam tawn ai hpe sha shi hta sha chye nga ai. N-shung ta lani mi hta rin na matu hkainu buri mi hpe shi hpai sa wa nga yang, ahkraw ahkun re ai hpun lakung ntsa U Hkru-du ni dung nga ai hpe shi mu wu ai. Shaloi jang, shi a buri daw mi ting u ni hpe ru jaw kau da wu ai. Dai hpang shi rin na shara de du ai shaloi gaw, shi a buri mung mi na raw sha hpring tup nan nan rai taw nga ai. Dai hta sha n-ga, Hkainu shadung mung shawoi na htan htam mi jan naw pru ai lam shi a labau hta ka matsing da nga ai.

 

San Pra ai Isidore gaw, 1130 ning, may shata (15) ya shani hta Madu kaw yup pyaw ban sa mat wa sai rai nga ai.

 

Shi n nga mat ai hpang, Lamik kumla law law shi hte seng nna byin wa sai. Shi a madu jan gaw, shi si ai hpang, shaning grai na hkra naw sak hkrung nga lai wa sai rai nga ai. Dai amyu shayi a baw sumla hpe hku hku aten hta akyu hpyi yan hkawm ai shaloi hpai nna yan hkawm ma ai; dai majaw, dai Amyu shayi hpe Spain Mungdan kaw “Santa Maria de la Cabeza” nga nna hkungga shagrau ya nga ma ai.

 

Dai hta n-ga, Shi n-nga mai hpang, 1619 ning, May shata praw (2) ya shani hta, dai aten na Wa Sarabyin Pawlu (5) kawn, Shi hpe A-Lu ai Masha ngu masat shagrau dat ya sai rai nga ai.

 

Dai Hpang, 1622 ning, March shata (12) ya shani hta gaw, dai aten na, Wa Sarabyin Gregory (15) kawn, Shi hpe San Pra ai Masha dang dat let, Shi a Poi Nhtoi hpe mung, May shata (15) ya shani ngu masat shagrau dat ya sai rai nga ai.

 

Daini Nawku Hpung gaw, Yi Sun Galaw ai San Pra ai Isidore a Poi Nhtoi

hpe galaw nga ai ten hta, anhte mung, San Pra ai Isidore zawn, magam bungli kade mi kin ai raitim, Karai Kasang Wa hpang de akyu hpyi ai, aten jaw lu ai ni byin tai lu hkra shakut sa wa nga ga law.

 

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

11 + 9 =