Yesusalem Mare na San Pra ai Cyril a Poi Nhtoi (March 18)

San Pra ai Saradaw Cyril gaw, lai wa sai A.D 315 ning hta Yerusalem mare kaw shangai chyinghkai wa ai rai nga ai. Shi gaw, Ja Chyum Mungga ni hte laika hpaji ni hpe ningtawn ai hku nna sharin la ngut ai hpang Saradaw Maximus a lata hta Jau Tai Sacramentu hpe hkam la sai. A.D 350 ning hta, Saradaw Maximus a hkang galai na matu Saradaw tai wa sai.

Shi gaw, Madu Yesu a Karai Atai hpe n hkap la ai shut shai taw nga ai Arian makam masham hpung ni hte n htan shai ai majaw, shanhte shi hpe dai shara kaw nna masum lang gawt shapraw kau ma ai. Shanhte gaw, Saradaw Cyril hpe Nawku Jawng kaw na Chyoipra ai hpun palawng “Missa Hking” shajan ni dut nna matsan masha ni hpe gam garan jaw ai, nga nna mara shagun ai mung hkrum wu ai. Ja Chyum Mungga matsun ai hte maren galaw ai lam ni mung nga nga ai.

A.D 381 ning na Constantinople mare zup hpawng kaw nna “Kam Ra Ai Lam Ni” hpe lu madi shadaw shagrin na lu nna, San Pra ai Saradaw Cyril hpe Kahtawlik Makam Masham hte seng ai share shagan wa ngu shagrau dat sai rai nga ai.

Kashin Kamun Sacramentu hkam la na ni hpe makam masham hte seng nna sharin achyin ya ai shi ka ai “The Catechizes” ngu ai tara laika sharin buk gaw, shi kaw nna Nawku HPung lu la ai manu daw dan n lu ai kumhpa kaba langai mi rai nga ai. Ndai Laika Buk hta e, Chyum Laika kaw na malawm ni yawng hpe hkum hkum tsup tsup, lachyum ni hpe azin ayang rai hkra ka shalawm lajang da nga ai. “Yesu gaw, n hpaw n ya gam jaw ai wa rai nga ai majaw, shinggyim masha yawng hpe shi a hkungran poi de shaga nga ai. Shawa wuhpung ahkum ara du ai shaloi, la nnan gaw kadai hpe hkungran poi de shang shangun na lajang ai. Ndai gaw, Kashim Kamun Sacrametu a matu lajang shachyip da ra ai lam rai nga ai.” nga nna shi a laika buk hta ka shaleng da nga ai.

San Pra ai Saradaw Cyril gaw, A.D 386 ning hta Madu kaw yup pyaw ban sa mat wa sai rai nga ai. Kahtaw Nawku Hpung a makam masham hpe nden ja ja rai nna makawp maga da ya ai majaw, Nawku Hpung gaw, shi hpe Nawku Hpung a Hpaji Ninghkring ngu nna shagrau ya sai rai nga ai.

Shi n nga mat ai hpang, Nawku Hpung gaw, shi hpe e, San Pra ai Masha dang dat nna, Shi a Poi Nhtoi hpe mung, March shata (18) ya shani shagu hta masat shagrau galaw ya nga ai gaw, daini na aten du hkra rai nga ai.

Anhte hpung masha ni mung, San Pra ai Saradaw Cyril a Labau kadun hpe hti hkaja la nna, anhte hkap la da sai Makam Masham hpe anhte a sak prat tup hta n hkrit n tsang sak se hkam lu ai ni, Nawku Hpung a matu mai kaja ai magam bungli hpe galaw shakut kau da lu ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)