Yerusalem Mare na San Pra ai Angelo a Poi Nhtoi (May 5) ( 05 May 2022 )

Yerusalem Mare na San Pra ai Angelo a Poi Nhtoi (May 5)

San Pra ai Angleo gaw, Yuda Hpung kawn Hkristan Hpung de gale shang wa ai kanu kawa yan kaw na Yerusalem mare kaw shangai chyinghkai wa ai San Pra ai Masha rai nga ai. Shi a asak (18) ning du ai shaloi shi a kahpu marun hte rau Carmelite Mama ni a laika sharin jaw kaw laika hpaji sharin hkam la lai wa sai.

Dai hpang (5) ning tup tawra tai na nna tara shadik let nga ai; Sicily mungdan kaw tara hkaw ai lam hta mying grai kaba lai wa sai. Shi a tara hkaw atsam ningtawn ai majaw hte kam shamyet lu ai kasi ni a majaw, makam masham de masha law law shang wa ma ai; grau nna Yuda mung na ni Hkristan byin tai wa masai rai nga ai.

San Pra ai Angleo gaw, Karai Kasang a Mungga hpe n hkrit n tsang nden ja ja rai nna hkaw matsun shadum ya ai, n kaja ai akyang lai len ni hpe mung mara tsun shagun sharin matsun ya ai. A.D (1220) ning, May shata (5) ya shani hta Berengarius mying ai n kaja ai masha langai mi gaw, shi hpe nhkyi hte galun sat kau wu ai. Shi nsa hti wa maw ai shaloi makau kaw sa yu nga ai ni a matu hte shi hpe lamu ja mungdan a janmau hpe shagup ya nna sat kau ai wa Berengarius a matu akyu hpyi kau da ya wu ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, May shata (5) ya shani masat shagrau dat ya sai rai nga ai.

San Pra ai Angleo gaw, shi hpe Karai Kasang jaw ai ga shaga atsam hpe manu jashawn nna masha ni hpe Madu Yesu hpang de woi gayin la ai lam a kasi kaba langai mi tai nga sai re. Shi lu malu shaman chyeju atsam hpe Karai Kasang a matu, hkrak nan manu shadan lai wa sai hte masha ni a wenyi hkyen hkrang la hkrum lu na matu, shi a asak hpe n lahpawt hkra galaw let sak hkrung lai sai mung rai nga ai.

Daini, Nawku Hpung gaw, Yerusalem Mare na San Pra ai Angleo a Poi hpe galaw nga ga ai hte Maren, anhte hpung masha ni mung, San Pra ai Angleo zawn, tinang hpe Karai Kasang Wa jaw da ya sai chyeju atsam ni hpe atsawm sha chye jai lang ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)