Yawhan Baptista Baw Kahtam Di Kau Hkrum ai Nhtoi (August 29)

Yawhan Baptista gaw, Madu Yesu hte lawu lahta kahpu kanau daw ai; shi gaw, Judea mung daidaw ai rai nna, Zakari hte Elizabeth yen a kasha rai nga ai. Shi a asak (30) ning du ai shaloi, shi gaw Mesia Hkyen la madu du sa na matu tau hkyen lajang ra ai tara hpe Yawdan Hkau kau mayan e hkaw lai wa ai. Madu yesu hpe Yawdan Hka kaw Kashin Kamun jaw ya ai hpang, shi a lit gun ten ngut mat ai. Dai hpang kade n na yang, Herod hkawhkam e rim la nna sat kau hkrum ai. Herod hkawhkam gaw, shi a kanau Filip a mau jan Herodias hte num shaw ai amu galaw nga ai hpe Yawhan myit n hkrum lawm ai. Dai majaw, Yawhan hpe Herodias gaw grai n ju mat nna matai dawk sat kau na matu gyam nga ai.

Aten ladaw gaw kaja nan byin wa sai. Herod Hkawhkam a shangai nhtoi a matu, galaw ai poi lamang hta Herodia a kasha jan Salome ka shangwi shapyaw nga ai. Salome ka ai nau yu tawm nna Herod gaw, Salome hpe shi ra ai hpyi u, jaw na nga nna ga sadi jaw ai. Kanu e hpaji daw, masa dawk bang ya ai hte maren, Salome gaw; “Ndai ban kaw Yawhan Baptista a baw bang ya rit.” nga nna hpyi ai. Herod hkawhkam grai myit n pyaw mat ai raitimung, manam ni a man kaw myi man n hten mayu ai majaw, hpyi ai hpe hkan shatup ya mat ra ai. Yawhan Baptista a baw hpe kahtam di nhtawm ban kaw bang nna Salome hpe jaw ya ai. Salome mung, dai hpe kanu kaw wa jaw ai. Yawhan a sape ni gaw, shi a hkum tsawp hpe sa hpai la nna makoi mayang kau ma ai.

Yawhan Baptista gaw, Madu Yesu Wudang ntsa jen noi sat kau hkrum na laning mi naw ra ai aten kaw nna, makam masham a majaw, sat kau hkrum mat wa nu ai.

Daini Nawku hpung gaw, Yawhan Baptista Baw Kahtam Sat kau hkrum ai shani hpe myit dum let, shi kaw akyu hpyi nga ga ai zawn, anhte hpung masha ni mung, jaw teng ai lam ni hta Yawhan Baptista zawn tsun gwi ra ai hte tinang lu da sai makam masham a matu, galoi mung sak se hkam lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)