Yawhan Bapstita a Shangai Nhtoi 24 June 2022

Yawhan Bapstita a Shangai Nhtoi (June 24)

San Pra ai Yawhan gaw, Chyoi Pra ai Nu Maria hte maren sumsing lamu ja mungdan na htani htana asak de du shang wa ai nhtoi sha n-ga, ginding aga ntsa shangai chyinghkai wa ai nhtoi masat shagrau hkrum ai wa rai nga ai. Yawhan a kanu hte kawa gaw makam masham grai kaba timung, ma n lu ma ai. Kanu gaw maudung num tai ai hte shan lahkawng asak grai kaba mat masai.
Lani mi hta Yawhan a Kawa Zahkari gaw, Nawku Htingnu kaba kaw hkinjawng a lit magam hte maren, daw jau ai amu galaw nga yang, Lamu Kasa Gabriel dan pru nna, “Zahkari e hkum hkrit e; nang hpyi shawn ai ga hpe Karai Kasang na ya sai. Na a madu jan Elizabeth gaw, na a matu kasha shangai na rai nna, shi a mying hpe Yawhan ngu na rin dai.” nga nna sa tsun ai. Shaloi Zahkari gaw, shan la asak grai kaba mat sai lam bai htan ya ai. Shaloi Lamu Kasa gaw, “Ngai tsun ai ga hpe nang n kam ai majaw, n dai lam ni byin pru wa ai nhtoi shani du hkra nang ma-a mat na ndai.” nga nna bai tsun ai.

Shata Nhtoi gu ai shaloi Elizabeth gaw, shadang sha shangai nu ai. Shan a jinghku ni sa du shajang nna ma hpe Kawa a mying Zahkari ngu nna shingteng amying jaw shahtawng htu na matu myit hkrum ma ai. Shaloi Kanu Elizabeth gaw, “N re, Shi hpe Yawhan ngu shamying na.” ngu nna tsun pru wa ai. Shanhte a htinggaw hta ndai mying shamying ai kadai n nga ai majaw jinghku ni yawng mau nga ma ai. Shaloi Kawa Zahkari gaw, lungpa hpyi nhtawm dai kaw e, “Yawhan gaw shi a mying re” nga nna ka pru wa ai. Dai shaloi jang, Shi a n gup hpaw wa nna Karai Kasang hpe shakawn kung dawn let, “Isarela a Karai Kasang, Madu kaw shakawn kungdawn anga nga u ga law” nga nna shakawn mahkawn pru wa ai. Ma chyangai Yawhan mung, hkum shing yan galu kaba wa nna, Hkye La Madu, Israela amyu masha ni kaw dan pru ten du hkra Zaibru jang kaw nga nga wu ai.

Daini Nawku Hpung gaw, Yawhan Bapstita a Shangai Nhtoi hpe galaw nga ga ai aten hta, Karai Kasang Wa a mau hpa atsam gaw, kade daram kaba nga ai lam hpe myit dum sawn sumru yu nna, anhte hta ra nga ai akyu ara ni hpe shagrit shanem ai myit hte Karai Kasang Wa hpang de hpyi la nga ga, shaloi teng sha lu la na rai nga ai.  

By;
Sister Rose Angeline Maran Nang Doi (SFX)

RVA-Kachin Service (Myitkyina)